(ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានជំរុញ និងលើកទឹកចិត្តដល់បណ្តាអ្នកវិនិយោគ ក៏ដូចជាអ្នកប្រកបជំនាញផ្តល់សេវាជួសជុល និងថែទាំរថយន្តប្រកបដោយគុណភាពខ្ពស់ស្របតាមកម្រិតស្តង់ដារបែបទំនើបនៅកម្ពុជាឲ្យបានកាន់តែច្រើនដើម្បីផ្តល់ទំនុកចិត្តដល់អ្នកប្រើប្រាស់។ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន នៅព្រឹកថ្ងៃទី២៨ ខែកុម្ភៈ ឆ្នាំ២០២២ ក្នុងឱកាសអញ្ជើញជាអធិបតីសម្ពោធដាក់ដំណើរការជាផ្លូវការនូវយានដ្ឋានជួសជុល និងថែទាំរថយន្តបែបទំនើប និងទាន់សម័យ A Klasse Auto សាខាទី៣ មានទំហំសរុប ៤,៤៦៨ម៉ែត្រការ៉េ ស្ថិតនៅផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញបានលើកឡើងថា បច្ចុប្បន្ននេះ កំណើននៃចំនួនរថយន្តនៅកម្ពុជាមានការកើនឡើងយ៉ាងខ្លាំថ ដែលគិតរហូតមកពេលនេះមានចំនួនជិត១លានគ្រឿង ដែលក្នុងនោះមានទាំងរថយន្តធុនធ្ងន់ និងប្រភេទរថយន្តធុនស្រាល។ លោកបានបន្តថា «កាលពីឆ្នាំ១៩៩៨ ក្នុងមួយឆ្នាំយើងចុះបញ្ជីរថយន្តបាន៣៣០០គ្រឿង និងមានចំនួនរថយន្តសរុបចំនួន ៦២ ០០០គ្រឿង ប៉ុន្តែឆ្នាំ២០២០ មានចំនួនរថយន្តសរុបជាង ៩២ម៉ឺនគ្រឿង ហើយនៅឆ្នាំ២០២១ យើងចុះបញ្ជីរថយន្តបានចំនួន ៦១,០០០គ្រឿង និងមានន័យថា កើនឡើង២០ដងបើធៀបទៅនឹងឆ្នាំ១៩៩៨»។ លោកបន្តថា «ទោះជាមានបញ្ហាកូវីដ ឆ្នាំ២០២១យើងចុះបញ្ជីរថយន្តមានការកើនឡើងជាង១០ភាគរយ ធៀបទៅនឹងឆ្នាំ២០២០។ ឆ្នាំ២០២០ កើនឡើង១៣ភាគរយ បើធៀបនឹងឆ្នាំ២០១៩ ហើយឆ្នាំ២០១៩ កើនឡើងជាង២០ភាគរយ បើធៀបទៅនឹងឆ្នាំ២០១៨។ ដូច្នេះមានន័យថា ទោះជាមានបញ្ហាប្រឈមនឹងវិបត្តិកូវីដ-១៩ ក៏ប្រជាពលរដ្ឋយើងនៅមានលទ្ធភាព និងមានមធ្យោបាយក្នុងការទិញរថយន្តសម្រាប់ប្រើប្រាស់ផ្ទាល់ខ្លួន ឬធ្វើអាជីវកម្ម»។ នៅក្នុងឱកាសនេះ ទេសរដ្ឋមន្ត្រីបានថ្លែងឱឲ្យដឹងថា បច្ចុប្បន្ននេះ សម្រាប់យានដ្ឋានជួសជុល និងថែទាំរថយន្តនៅទូទាំងប្រទេសមាន ៣,៧៩៦កន្លែង ក៏ប៉ុន្តែកន្លែងជួសជុល និងមានស្តង់ដារលក្ខណៈអន្តរជាតិដូចជាយានដ្ឋាន A Klasse Auto មិនមានច្រើននោះទេ ដូច្នេះយានដ្ឋាន A Klasse Auto គួរតែពង្រីកសាខាបន្ថែមទៀត ដើម្បីចូលរួមជាមួយរាជរដ្ឋាភិបាល ទាំងការបណ្តុះបណ្តាលជំនាញដល់បុគ្គលិកបន្ថែម ក៏ដូចជាផ្តល់ឱកាសការងារ ជាពិសេសបង្កើនទំនុកចិត្ត និងសុវត្ថិភាពដល់អ្នកប្រើប្រាស់រថយន្ត។ លោក Herfried Hasenoehrl ប្រធានក្រុមប្រឹក្សាភិបាលនៃក្រុមហ៊ុន Iron Capital PLC បានមានប្រសាស៍ថា «បេសកកម្មរបស់ក្រុមហ៊ុន Iron Capital បានឈានដល់ការដាក់ដំណើរការយានដ្ឋានជួសជុល និងថែទាំយានយន្តសាខាទី៣នេះ ស្របជាមួយនឹងការផ្តោតសំខាន់លើអតិថិជនដែលអាចទទួលបានសេវាកម្ម ស្តង់ដា មានគុណភាពខ្ពស់សម្រាប់យានយន្ដដ៏មានតម្លៃរបស់ពួកគាត់។ យានដ្ឋាន A Klasse Auto គឺជាយានដ្ឋានហ្រ្វែនឆាយស្តង់ដា មានការបញ្ជាក់កម្រិតស្តង់ដា ISO ត្រឹមត្រូវ និងដំបូងគេបង្អស់នៅកម្ពុជា និងជាមជ្ឈមណ្ឌលតែមួយគត់ដែលផ្គត់ផ្គង់ជូនសេវាកម្មជួសជុល ថែទាំ និងលាងសម្អាតរថយន្តប្រព្រឹត្តតាមស្តង់ដា និងទំនុកចិត្តខ្ពស់»។ យានដ្ឋាន AKlasse Auto បានប្តេជ្ញាមុះមុតសម្រាប់ផ្តល់បទពិសោធន៍យ៉ាងល្អបំផុតជូនប្រជាជនកម្ពុជា ពីផលិតផល និងសេវាកម្មជួសជុលរថយន្តគុណភាពខ្ពស់ ជាមួយអ្នកឯកទេសមានជំនាញវិជ្ជាជីវៈត្រឹមត្រូវ ផ្តល់ផាសុកភាព និងមានអារម្មណ៍សុវត្ថិភាពក្នុងការប្រើប្រាស់សេវាកម្ម ហើយស័ក្តិសមបំផុតក្នុងការចំណាយយ៉ាងមានទំនុកចិត្តខ្ពស់។ លោកបានបញ្ជាក់ថា A Klasse Auto គឺជាយានដ្ឋានហ្រ្វែនឆាយស្តង់ដាខ្ពស់ ដែលមានការបញ្ជាក់កំរិតស្តង់ដាISO ដំបូងគេនៅក្នុងប្រទេសកម្ពុជា មានឯកទេសច្បាស់លាស់ផ្នែកជួសជុលយានយន្តកម្រិតស្រាល កម្រិតធ្ងន់ សេវាថែទាំយានយន្ត ពិនិត្យជួសជុល តោន បាញ់ថ្នាំ ស្ទូច-សណ្ដោង និងសេវាជួសជុលចល័ត តាមដងផ្លូវ។ ក្រុមហ៊ុនបាន និងកំពុងកសាងកិត្តិនាមជាបណ្ដើរៗ ក្នុងការផ្ដល់ផលិតផល និងសេវាកម្មដែលមានគុណភាព ដោយការចាប់ដៃគូជាមួយរោងចក្រ និងភ្នាក់ងារចែកចាយដែលមានទំនុលចិត្តខ្ពស់ រួមជាមួយនឹងសមត្ថភាពរបស់ខ្លួនក្នុងការថែទាំ ជួសជុលរថយន្តម៉ាកល្បីៗចម្រុះ រាប់តាំងពីរថយន្តធម្មតារហូតដល់រថយន្តទំនើបប្រណីត៕