ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីតម្រង់ទិសជំនាញសិក្សានិងការងារ កាលពីថ្ងៃ៥កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអាទិត្យទី០៦ ខែកម្ភៈ ឆ្នាំ២០២២ នៅទីស្ដីការក្រសួង ដោយមានការចូលរួមពីថ្នាក់ដឹកនាំក្រសួង ឯកឧត្តមប្រតិភូរាជរដ្ឋាភិបាលទទួលបន្ទុក ជាប្រធានអគ្គនាយកកំពង់ផែស្វយ័ត វាគ្មិនកិត្តិយស វាគ្មិនក្រសួង សាស្រ្តាចារ្យ បុគ្គលិក សិស្ស-និស្សិត សរុបប្រមាណ៥០០រូប។ នៅក្នុងឱកាសនោះ ឯកឧត្តមទេសរដ្ឋមន្ត្រី បានមានប្រសាសន៍អំពីគោលដៅនៃការអភិវឌ្ឍធនធានមនុស្ស ឱ្យមានការរីកចម្រើន និងប្រកបដោយភាពសម្បូរបែប ដើម្បីប្រែក្លាយពីប្រទេសដែលមានចំណូលមធ្យមកម្រិតទាប ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ។ ឯកឧត្តមក៏បានលើកឡើងអំពីគោលបំណង នៃការបង្កើតវិទ្យាស្ថានតេជោសែន សាធារណការ និងដឹកជញ្ជូននេះ ដើម្បីអភិវឌ្ឍន៍ធនធានមនុស្ស បណ្តុះបណ្តាលវិស្វករកម្ពុជាឱ្យចេះធ្វើផ្លូវ សង់ស្ពានឆ្លងទន្លេ និងប្រព័ន្ធហេដ្ឋារចនាសម្ព័ន្ធឱ្យមានគុណភាពរឹងមាំសម្រាប់កូនខ្មែរជំនាន់ក្រោយ និងមានសមត្ថភាពដូចបុព្វបុរសសម័យមុនដែលមានសមត្ថភាពអាចកសាងប្រាង្គប្រាសាទដ៏ស្រស់បំព្រង និងមានគុណភាពរឹងមាំជាប់បានយូររាប់រយឆ្នាំ និងល្បីល្បាញពាសពេញសកលលោកថែមទៀតផង។ ទន្ទឹមនឹងនេះ ឯកឧត្តមទេសរដ្ឋមន្ត្រីបានមានប្រសាសន៍បន្ថែមទៀតថា វិទ្យាស្ថាននេះ ជាគ្រឹះស្ថានសិក្សាតែមួយគត់នៅកម្ពុជា ដែលផ្តល់ការបណ្ដុះបណ្ដាលជំនាញសាងសង់ផ្លូវ ស្ពាន ដឹកជញ្ជូន និងភស្តុភារកម្មនិងជំនាញជាច្រើនទៀត ឱ្យកូនខ្មែរជំនាន់ក្រោយចេះកសាងហេដ្ឋារចនាសម្ព័ន្ធ ដោយខ្លួនឯងប្រកបដោយគុណភាពមិនពឹងលើបរទេស និងបានផ្តល់ដំបូន្មានដល់សិស្ស-និស្សិត ឱ្យធ្វើខ្លួនជាមនុស្សល្អក្នុងសង្គម និងខិតខំរៀនសូត្រឱ្យកាន់តែខ្លាំងបន្ថែមទៀត ដោយបានលើកពាក្យស្លោកមួយចំនួនឱ្យសិស្ស-និស្សិតបានយកទៅអនុវត្តន៍ ដើម្បីប្រែក្លាយជីវិតរបស់ខ្លួនឱ្យមានអនាគតល្អផងដែរ ។ ក្នុងនោះមានពាក្យស្លោកមួយឃ្លាថា “បើអ្នកមិនដឹងថាទៅផ្លូវណា ផ្លូវណាក៏នាំអ្នកទៅទីនោះដែរ” និង បណ្តាពាក្យស្លោកជាច្រើនមួយចំនួនទៀតផងដែរ។ ជាមួយគ្នានេះដែរ ឯកឧត្តមទេសរដ្ឋមន្ត្រីបានគូសបញ្ជាក់ថា ដើម្បីអនុវត្តន៍គោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ និងប្រែក្លាយជាប្រទេសដែលមានចំណូលខ្ពស់បាន យើងត្រូវធ្វើការងារអាទិភាពចំនួនបួនឱ្យបានគឺ៖ ទី១-ត្រូវបញ្ចុះតម្លៃអគ្គិសនីឱ្យនៅកម្រិតទាប ។ ទី២-ត្រូវមានធនធានមនុស្សល្អ ។ ទី៣-ត្រូវបញ្ចុះតម្លៃភ័ស្តុភាកម្ម និងដឹកជញ្ជូន ។ ទី៤-រៀបចំខេត្តព្រះសីហនុទាំងមូលឱ្យក្លាយជាតំបន់សេដ្ឋកិច្ចពិសេស ដើម្បីទាក់ទាញវិនិយោគឱ្យមកបណ្ដាក់ទុនបង្កើតការងារធ្វើជូនបងប្អូនប្រជាពលរដ្ឋយើង។ ឯកឧត្តមទេសរដ្ឋមន្ត្រីបានមានប្រសាសន៍លើកទឹកចិត្តឱ្យសិស្ស-និស្សិតទាំងអស់ដាក់ពាក្យប្រឡងចូលរៀននៅវិទ្យាស្ថានតេជោសែន សាធារណការ និងដឹកជញ្ជូន ចូលរួមចំណែកក្នុងការអភិវឌ្ឍប្រព័ន្ធហេដ្ឋារចនាសម្ព័ន្ធរូបវន្ត របស់កម្ពុជាឱ្យមានការរីកចម្រើនថែមមួយកម្រិតទៀត។ សូមបញ្ជាក់ថា កម្មវិធីតម្រង់ទិសជំនាញសិក្សា និងការងារនេះត្រូវបានរៀបចំឡើងដោយវិទ្យាស្ថានតេជោសែន សាធារណការ និង ដឹកជញ្ជូន ដើម្បីផ្ដល់ឱកាសឱ្យសិស្ស-និស្សិត ទទួលបានព័ត៌មានគ្រប់គ្រាន់ និងគ្រប់ជ្រុងជ្រោយ ដើម្បីធ្វើការសម្រេចចិត្តជ្រើសរើសជំនាញសិក្សាឱ្យបានត្រឹមត្រូវ និងជាវិថីដ៏ល្អសម្រាប់ឱកាសដើម្បីស្វែងរកការងារបានជោគជ័យនៅពេលបញ្ចប់ការសិក្សា៕ ដោយ ទេស ច័ន្ទសុធារី (ប្រភព៖ ក្រសួងសាធារណការ និងដឹកជញ្ជូន) សម្រួលផ្សាយដោយ៖ ធូ កុសល