យោងតាមសេចក្ដីជូនដំណឹងរបស់រដ្ឋបាលខេត្ដព្រះសីហនុនៅរសៀលថ្ងៃទី១៦ ខែមករា ឆ្នាំ២០២២ បានឲ្យដឹងថា អាជ្ញាធរនឹងធ្វើការផ្អាកចរាចរឆ្លងកាត់វិថីតេជោ (ទីលានតេជោ) ជាបណ្ដោះអាសន្នចំនួន ៣ ថ្ងៃដើម្បីរៀបចំវេទិកាទេសចរណ៍អាស៊ានលើកទី៤០ ឆ្នាំ២០២២ រួមទាំងកិច្ចប្រជុំស្ថាប័នទេសចរណ៍ជាតិអាស៊ាន(NTO) និងកិច្ចប្រជុំរដ្ឋមន្រ្ដីទេសចរណ៍អាស៊ានថ្ងៃទី២២ ខែមករា ឆ្នាំ២០២២ ស្ថិតនៅសណ្ឋាគារសុខា និងទីលានតេជោ សង្កាត់លេខ៤ ក្រុងព្រះសីហនុ ខេត្ដព្រះសីហនុ។ ដើម្បីឲ្យកម្មវិធីខាងលើប្រព្រឹត្ដទៅដោយរលូន មានសន្ដិសុខ សុវត្ថិភាព និងរក្សាបានសណ្ដាប់ធ្នាប់សាធារណៈល្អប្រសើរ ព្រមទាំងបញ្ចៀសបាននូវការកកស្ទះចរាចរណ៍ រដ្ឋបាលខេត្ដនឹងផ្អាកការធ្វើចរាចរយានជំនិះគ្រប់ប្រភេទឆ្លងកាត់វិថីតេជោ ជាបណ្ដោះអាសន្ន ចាប់ពីចំណុចត្រីកោណប្រសព្វព្រះស្គន្ទទ្រង់ក្ងោក (ជិតកន្ទុយនាគឆ្នេរសុខា) ដល់ចុងផ្លូវលេខ៥០២ (ផែទូកទេសចរណ៍៥០២) ចាប់ពីវេលាម៉ោង ៦ ព្រឹកថ្ងៃទី១៧ ដល់ថ្ងៃទី១៩ ខែមករា ឆ្នាំ២០២២។ ជាមួយគ្នានេះ រដ្ឋបាលខេត្ដក៏បានស្នើសុំដល់សាធារណៈជន និងប្រជាពលរដ្ឋទាំងអស់ដែលត្រូវធ្វើដំណើរឆ្លងកាត់កំណាត់វិថីនេះ សូមមានការយោគយល់អធ្យាស្រ័យ ចំពោះការបញ្ចៀសការធ្វើដំណើរដោយក្ដីអនុគ្រោះ។ ហើយនៅពេលផុតរយៈពេលនៃការហាមឃាត់បណ្ដោះអាសន្ននេះ រដ្ឋបាលខេត្ដព្រះសីហនុ នឹងបើកឲ្យធ្វើចរាចរជាធម្មតាវិញផងដែរ៕