វិញ្ញាសារប្រឡងឆមាសទីពីរ បញ្ចប់ឆ្នាំទី១ ជំនាន់ទី១ នៃនិស្សិតវិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២០-២០២១ ត្រូវបានបើកដោយលោកជំទាវរដ្ឋលេខាធិការ ឥម នីថារ៉ា តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល ថ្ងៃពុធ ៣រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែធ្នូ ឆ្នាំ២០២១ នៅទីស្តីការ ក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងកម្មវិធីបើកវិញ្ញាសារប្រឡងបញ្ចប់ ឆមាសទីពីរ បញ្ចប់ឆ្នាំទី១ របស់និស្សិតជំនាន់ទី១ វិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២០-២០២១ ដោយមានការចូលរួមពីថ្នាក់ដឹកនាំក្រសួងទទួលបន្ទុក ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និង ដឹកជញ្ជូន លោក លោកស្រី ថ្នាក់ដឹកនាំ និងក្រុមការងារវិទ្យាស្ថានផងដែរ។ ថ្លែងក្នុងមតិស្វាគមន៍នាឱកាសនោះ ឯកឧត្តម ហឿន សំនៀង នាយកវិទ្យាស្ថានតេជោ សែន សាធារណការ និងដឹកជញ្ជូន បានគូសបញ្ជាក់អំពីបេសកកម្មរបស់វិទ្យាស្ថានក្នុងការបណ្តុះបណ្តាលនិស្សិតដ៏មានសក្តានុពល ឱ្យមានសមត្ថភាពពិតប្រាកដ ចំណេះដឹងទូលំទូលាយ និង សីលធម៌ គុណធម៌ អត្តចរិតចរិយាសម្បត្តិថ្លៃថ្នូរ ដើម្បីចូលរួមដោះស្រាយវិបត្តិនៅក្នុងវិស័យហេដ្ឋារចនាសម្ព័ន្ធ និងភស្តុភាកម្មនៅកម្ពុជានាពេលអនាគត។ ជាមួយគ្នានោះផងដែរ លោកជំទាវរដ្ឋលេខាធិការ បានសម្តែងសេចក្តីសោមនស្សរីករាយ ដែលបានចូលរួម បើកវិញ្ញាសារប្រឡងបញ្ចប់ឆមាសទីពីរ ជូននិស្សិតជំនាន់ទី១ ឆ្នាំទី១ របស់វិទ្យាស្ថានតេជោសែន សាធារណការ និងដឹកជញ្ជូន និងបានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់វិទ្យាស្ថាន ក៏ដូចជាបទបញ្ជា និងការណែនាំរបស់អនុរក្សដែលឈរពិនិត្យតាមដានការប្រឡងនៅក្នុងថ្នាក់ប្រឡងរយៈពេលបីថ្ងៃនេះ។ លោកជំទាវរដ្ឋលេខាធិការ ក៏បានថ្លែងអំណរគុណផងដែរដល់ថ្នាក់ដឹកនាំ និងក្រុមការងារវិទ្យាស្ថាន ក៏ដូចជាសាស្ត្រាចារ្យទាំងអស់ដែលបានរៀបចំការប្រឡងនេះឡើង និងដែលបានខិតខំប្រឹងប្រែងសហការរួមគ្នាក្នុងការតាមដានការសិក្សារបស់ប្អូននិស្សិតកន្លងមក និងបានជូនពរឱ្យក្មួយនិស្សិតទាំងអស់បានប្រឡងជាប់ទាំងអស់គ្នា និងបានចូលរៀនឆ្នាំទី២បន្តទៀតនៅវិទ្យាស្ថានតេជោ សែន សាធារណការ និងដឹកជញ្ជូន។ សូមជម្រាបជូនថា៖ ការប្រឡងបញ្ចប់ឆមាសទីពីររបស់និស្សិតវិទ្យាស្ថានតេជោ សែន សាធារណការ និងដឹកជញ្ជូន ជំនាន់ទី១ ឆ្នាំសិក្សា២០២០-២០២១ នេះ នឹងប្រព្រឹត្តទៅរយៈពេលបីថ្ងៃពេញ ទាំងព្រឹក និងពេលរសៀល ចាប់ពីថ្ងៃទី២២ ដល់ថ្ងៃទី២៤ ខែធ្នូ ឆ្នាំ២០២១ នៅសាលប្រជុំទីស្តីការក្រសួង ដែលមាន និស្សិតជំនាន់ទី១ ចូលរួមប្រឡងសរុបទាំងអស់ ១៩១ រូប លើឯកទេសចំនួន ៣ និងជំនាញចំនួន ៦ រួមមាន៖ ១. ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ២. ជំនាញប្រព័ន្ធចម្រោះទឹកកខ្វក់ ៣. ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤. ជំនាញភស្តុរភារកម្ម និងគ្រប់គ្រងខ្សែច្រវាក់ផ្គត់ផ្គង់ ៥. ជំនាញបើកបរនាវា និង៦. ជំនាញម៉ាស៊ីននានា៕