សិក្ខាសាលាស្តីពីការផ្សព្វផ្សាយលើកទី៤ លើសេចក្តីណែនាំអំពីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោក នៅរដ្ឋបាលក្រុង ស្រុក ខណ្ឌ ដល់មន្រ្តីអនុវត្តមុខងារនៅខេត្តចំនួន៦ (ខេត្តក្រចេះ រតនគិរី មណ្ឌលគិរី ព្រះវិហារ ស្ទឹងត្រែង និងខេត្តកំពង់ធំ) នៅថ្ងៃអង្គារ ១០កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែធ្នូ ឆ្នាំ២០២១ នៅសាលមហោស្រពខេត្តក្រចេះ ឯកឧត្តម សួន រចនា រដ្ឋលេខាធិការ និងជាអនុប្រធានប្រចាំការគណៈកម្មការ តំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និងជាប្រធានគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការរបស់ក្រសួង បានបើកសិក្ខាសាលាផ្សព្វផ្សាយលើកទី៤ លើសេចក្តីណែនាំអំពីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោក នៅរដ្ឋបាលក្រុង ស្រុក ខណ្ឌ មានរយៈពេល២ថ្ងៃ ប្រព្រឹត្តទៅនៅថ្ងៃទី១៤-១៥ ខែធ្នូ ឆ្នាំ២០២១ ដែលមានការអញ្ជើញចូលរួមពីអភិបាល នៃគណៈអភិបាលខេត្ត-ស្រុក ក្រុមប្រឹក្សាខេត្ត-ស្រុក មន្ទីរសាធារណការ និងដឹកជញ្ជូន ប្រធាន និងមន្រ្តីអនុវត្តមុខងារការិយាល័យច្រកចេញចូលតែមួយស្រុករបស់រដ្ឋបាលខេត្តចំនួន៦ (មានខេត្តក្រចេះ រតនគិរី មណ្ឌលគិរី ព្រះវិហារ ស្ទឹងត្រែង និងខេត្តកំពង់ធំ ) ហើយមានរដ្ឋបាលស្រុកចំនួន៣១ ដែលមិនទាន់បានទទួលបានការផ្សព្វផ្សាយដល់មន្រ្តីអនុវត្តមុខងារនៅថ្នាក់ក្រុង ស្រុក ខណ្ឌ មានសមាសភាពសរុប ១៥៣នាក់ (ស្រី២០នាក់)។ ការផ្សព្វផ្សាយលើបែបបទ និងនីតិវិធីការគ្រប់គ្រងលើការអនុវត្តមុខងារក្នុងវិស័យដឹកជញ្ជូនផ្លូវគោក នាពេលនេះ មានមុខងារចំនួន៤ រួមមាន៖ (១)ការគ្រប់គ្រងការចុះបញ្ជី និងការផ្តល់លិខិតអនុញ្ញាតធ្វើអាជីវកម្មយានដ្ឋានជួសជុល កែច្នៃដំឡើងទោចក្រយានយន្ត (២)សេវាចុះបញ្ជីទោចក្រយានយន្ត (ចុះបញ្ជី ប្តូរទុតិយតា និងតតិយតាបណ្ណសម្គាល់ ប្តូរ ទុតិយតា និងតតិយតាផ្លាកលេខ) (៣)សេវាចុះបញ្ជីត្រីចក្រយានយន្ត និងរ៉ឺម៉កទោចក្រយានយន្ត (ចុះបញ្ជីត្រីចក្រយានយន្ត ចុះបញ្ជីរ៉ឺម៉កទោចក្រយានយន្ត ប្តូរ ទុតិយតា និងតតិយតាបណ្ណសម្គាល់ត្រីចក្រយានយន្ត ប្តូរ ទុតិយតា និងតតិយតាផ្លាកលេខសម្គាល់ត្រីចក្រយានយន្ត និងរ៉ឺម៉កទោចក្រយានយន្ត) និង (៤)ការត្រួតពិនិត្យលក្ខណៈបច្ចេកទេសត្រីចក្រយានយន្ត និងទោចក្រយានយន្តសណ្តោងរ៉ឺម៉ក(ប្រគល់ ទុតិយតា និងតតិយតា វិញ្ញាបនបត្រត្រួតពិនិត្យលក្ខណ:បច្ចេកទេស)៕