សិក្ខាកាមសរុបប្រមាណ១២០រូប ចូលរួមសិក្ខាសាលាបណ្តុះបណ្តាល និងផ្សព្វផ្សាយផែនការ យុទ្ទសាស្ត្រថវិកាឆ្នាំ២០២២ -២០២៤ រៀបចំឡើងដោយក្រសួងសាធារណការ និងដឹកជញ្ជូន ដើម្បីបង្កើនសមត្ថភាពក្នុងការរៀបចំផែនការថវិកាឱ្យមានប្រសិទ្ធភាព និងភាពច្បាស់លាស់ កែប៖ ថ្ងៃព្រហស្បតិ៍ ៤កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៨ ខែធ្នូ ឆ្នាំ២០២១ ឯកឧត្តម វ៉ាស៊ឹម សុរិយា អនុរដ្ឋលេខាធិការ និងជាប្រធានក្រុមការងារថវិកាក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តម សួង ហេង បានអញ្ជើញជាអធិបតីក្នុងពិធីបើកសិក្ខាសាលាបណ្តុះបណ្តាល និងផ្សព្វផ្សាយស្តីពីផែនការយុទ្ធសាស្ត្រថវិកាឆ្នាំ២០២២-២០២៤ រៀបចំ ឡើងដោយអគ្គនាយកដ្ឋានផែនការនិងគោលនយោបាយ នៃក្រសួងសាធារណការ និងដឹកជញ្ជូន ដោយមានការចូលរួមពីសិក្ខាកាមសរុបប្រមាណ១២០រូប ក្នុងនោះស្រី២៥រូប អញ្ជើញមកពីគ្រប់អង្គភាពថវិកា ក្រោមឱវាទក្រសួង។ សិក្ខាសាលានេះមានរយៈពេលពីថ្ងៃចាប់ពីថ្ងៃទី៨ ដល់ទី៩ ខែធ្នូ ឆ្នាំ២០២១រៀបចំឡើងក្នុងគោលបំណង បង្កើនសមត្ថភាពមន្ត្រីក្នុងការរៀបចំផែនការយុទ្ធសាស្ត្រថវិការបស់ក្រសួងឱ្យកាន់តែមានប្រសិទ្ធភាពខ្ពស់ និងអាចផ្សព្វផ្សាយបន្តនូវការងារនេះទៅអង្គភាពរបស់ខ្លួនប្រកបដោយភាពច្បាស់លាស់ និងទូលំទូលាយ ថែមទៀត ។ ថ្លែងក្នុងសន្ទរកថាបើកកម្មវិធីនាឱកាសនោះ ឯកឧត្តមអនុរដ្ឋលេខាធិការ បានជំរុញឱ្យអង្គភាពថវិកាក្រោមឱវាទក្រសួងយកចិត្តទុកដាក់ស្វែងយល់ពីទិសដៅ និងយុទ្ធសាស្ត្រ ជាពិសេស ភាពទទួលខុសត្រូវ និង បង្កើន សមត្ថភាពបន្ថែមទៀត ក្នុងការរៀបចំផែនការយុទ្ធសាស្ត្រថវិកាឱ្យបានច្បាស់លាស់ តាមរយៈការ ចែករំលែកបទពិសោធន៍ពីគ្រូបង្គោល និងបានលើកឡើងអំពីការកំណែទម្រង់មុតស្រួចរបស់ឯកឧត្តម ទេសរដ្ឋមន្ត្រីស៊ុន ចាន់ថុល ក្នុងការកែសម្រួលរចនាសម្ព័ន្ធគ្រប់គ្រង អង្គការចាត់តាំងនាពេលថ្មីៗកន្លងមក ដើម្បីជំរុញឱ្យក្រសួងធ្វើការកែសម្រួលរចនាសម្ព័ន្ធថ្មីនៃផែនការយុទ្ធសាស្ត្រថវិកាឱ្យស្របតាមរចនាសម្ព័ន្ធ គ្រប់គ្រងថ្មីមួយ ដែលមានប្រសិទ្ធភាព និងច្បាស់លាស់ និងជាសមិទ្ធផលមួយយ៉ាងមានសារៈសំខាន់ក្នុងការធ្វើឱ្យប្រសើរឡើងដល់ការប្រើប្រាស់ថវិកាជាតិប្រកបដោយប្រសិទ្ធភាព តម្លាភាព និងភាពត្រឹមត្រូវ។ បន្ថែមពីលើនេះ ឯកឧត្តមអនុរដ្ឋលេខាធិការ បានស្នើឱ្យអង្គភាពថវិកាទាំងអស់ បន្តយកចិត្តទុកដាក់សហការជាមួយអគ្គនាយកដ្ឋានផែនការ និងគោលនយោបាយ និងអគ្គនាយកដ្ឋានរដ្ឋបាល និងហិរញ្ញវត្ថុនៃ ក្រសួងសាធារណការ និងដឹកជញ្ជូន ដើម្បីស្វែងយល់បន្ថែមឱ្យកាន់តែស៊ីជម្រៅ អំពីផែនការសកម្មភាព ដែលបានកំណត់នៅក្នុងសៀវភៅផែនការយុទ្ធសាស្ត្រថវិកាឆ្នាំ២០២២-២០២៤។ ឯកឧត្តមក៏បានជំរុញលើកទឹកចិត្តផងដែរឱ្យសិក្ខាកាមទាំងអស់ផ្ដោតការយកចិត្តទុកដាក់ស្វែងយល់ និង ពិភាក្សាឱ្យកាន់តែស៊ីជម្រៅបន្ថែមទៀតដើម្បីបង្កើនសមត្ថភាពក្នុងការរៀបចំផែនការយុទ្ធសាស្ត្រថវិការបស់ក្រសួង និងផ្សព្វផ្សាយទៅក្នុងអង្គភាពរបស់ខ្លួនឱ្យកាន់តែទូលំទូលាយ និងបានគូសបញ្ជាក់ពីកិច្ចខិតខំ ប្រឹងប្រែងរបស់ឯកឧត្តមទេសរដ្ឋមន្ត្រី ក្នុងការជំរុញតាមដានរាល់ការស្ថាបនាហេដ្ឋារចនាសម្ព័ន្ធ តាមរយៈការគិតគូរលើការរួមចំណែកនៅក្នុងដំណើរការត្រៀមស្តារសេដ្ឋកិច្ចឡើងវិញ។ ជាទីបញ្ចប់ ឯកឧត្តមអនុរដ្ឋលេខាធិការ បានវាយតម្លៃខ្ពស់ចំពោះកត្តាសុខសន្តិភាព ដែលជាមូលដ្ឋានគ្រឹះ ដ៏រឹងមាំ ក្នុងការផ្ដល់ឱកាសឱ្យកម្ពុជាបានអភិវឌ្ឍវិស័យហេដ្ឋារចនាសម្ព័ន្ធគ្រប់ប្រភេទ និងធ្វើសមាហរណ កម្មតភ្ជាប់ស្ទើរតែគ្រប់តំបន់នៅទូទាំងប្រទេស ជាពិសេស ផ្លូវជាតិ និងផ្លូវជនបទ។ សូមបញ្ជាក់ថា៖ ក្រសួងសាធារណការ និងដឹកជញ្ជូន បានរៀបចំផែនការយុទ្ធសាស្ត្រថវិកាឆ្នាំ២០២២-២០២៤ ក្នុងការអភិវឌ្ឍធនធានមនុស្សក្នុងវិស័យសាធារណការ និងដឹកជញ្ជូន ដោយផ្តោតជាសំខាន់ លើគោលនយោបាយអភិវឌ្ឍន៍ ថែទាំ និងគ្រប់គ្រងសំណង់សាធារណការ ហេដ្ឋារចនាសម្ព័ន្ធដឹកជញ្ជូន សេវាកម្មដឹកជញ្ជូនគ្រប់ប្រភេទ រួមទាំងភស្តុភារកម្មផងដែរ៕