យុទ្ធនាការអប់រំផ្សព្វផ្សាយច្បាប់ និងសុវត្ថិភាពស្តីពីចរាចរណ៍ផ្លូវគោក មុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តោយផ្លូវជាតិលេខ ៦ ក្បែរសាលាស្រុកមុខកំពូល ស្ថិតក្រោមអធបិតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. នៅថ្ងៃចន្ទ ១១កើត ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៥ ខែវិច្ឆិកា ឆ្នាំ២០២១ នៅតាមបណ្តោយផ្លូវជាតិលេខ ៦ ក្បែរសាលាស្រុកមុខកំពូល ស្ថិតក្នុងស្រុកមុខកំពូល ខេត្តកណ្តាល លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. បានអញ្ជើញជាអធិបតីភាពក្នុងយុទ្ធនាការអប់រំផ្សព្វផ្សាយច្បាប់ និងសុវត្ថិភាពចរាចរណ៍ផ្លូវគោក និងមានការចូលរួមអមដំណើរដោយ ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ នៃក្រសួងមហាផ្ទៃ និងជាអនុប្រធានអចិន្ត្រៃយ៍អនុគណៈកម្មាទី១ ​លោក ព្រំ វន្ថា​ ប្រធាននាយកដ្ឋានសុវត្ថិភាពចរាចរណ៍ផ្លូវគោកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន និងជាប្រធានផ្នែកអប់រំផ្សព្វផ្សាយ និងបណ្តុះបណ្តាល នៃ​អគ្គលេខាធិការដ្ឋាន គ.ស.ច.គ.។ យុទ្ធនាការនេះ រៀបចំឡើងដោយ អគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក នាយកដ្ឋានសុវត្ថិភាពចរាចរណ៍ផ្លូវគោក និងចូលរួមសហការដោយ មន្ទីរសាធារណការ និងដឹកជញ្ជូនខេត្តកណ្តាល កងកម្លាំងនគរបាលចរាចរណ៍ នៃអគ្គស្នងការដ្ឋាននគរបាលជាតិ កងកម្លាំងនគរបាលចរាចរណ៍ស្រុកមុខកំពូល ស.ស.យ.ក ក្នុងវិស័យសាធារណការ និងដឹកជញ្ជូន។ យុទ្ធនាការអប់រំផ្សព្វផ្សាយច្បាប់ និងសុវត្ថិភាពស្តីពីចរាចរណ៍ផ្លូវគោកនៅមុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២១នេះ រៀបចំឡើង​ដើម្បីអប់រំផ្សព្វផ្សាយ និងជាការពញ្ញាក់ស្មារតីដល់អ្នកប្រើប្រាស់ផ្លូវទាំងអស់​ឱ្យមានការប្រុងប្រយ័ត្ននៅពេលធ្វើដំណើរតាមដងផ្លូវ និងត្រូវចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួនគ្រប់ៗគ្នា ដើម្បីជៀសវាងឱ្យបាននូវគ្រោះ​ថ្នាក់ចរាចរណ៍ដែលអាចកើតមានឡើងជាយថាហេតុ។ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ.ច. បានសម្តែងនូវក្តីព្រួយបារម្ភអំពីគ្រោះថ្នាក់ចរាចរណ៍ផ្លូវគោក ដែលមានការកើនឡើងគួរឱ្យកក់សម្គាល់នៅរយៈពេលកន្លងមកថ្មីៗនេះ លោកជំទាវក៏បានសំណូមពរឱ្យអ្នកប្រើប្រាស់យានជំនិះគ្រប់ប្រភេទត្រូវចូលរួមគោរពច្បាប់ចរាចរណ៍ផ្លូវគោក មិនត្រូវបើកបរលើសល្បឿនកំណត់ ត្រូវគោរពសិទ្ធិអាទិភាពក្នុងពេលធ្វើដំណើរ ពាក់ខ្សែក្រវាត់សុវត្ថិភាពនៅពេលបើកបររថយន្ត និងត្រូវពាក់មួកសុវត្ថិភាពនៅពេលធ្វើដំណើរតាមម៉ូតូដោយមិនគិតទីជិត ឬទីឆ្ងាយឡើយ។ ក្នុងយុទ្ធនាការអប់រំផ្សព្វផ្សាយនេះ បានចែកជូនឯកសារពាក់ព័ន្ធនឹងច្បាប់ស្តីពីចរាចរណ៍ផ្លូវគោក និងមានការរៀបចំកម្មវិធីសួរ និងឆ្លើយសំណួរ​ សម្រាប់អ្នកចូលរួមយុទ្ធនាការផងដែរ។ ជាលទ្ធផលនៃយុទ្ធនាការនេះ បានចែកមួកសុវត្ថិភាព និងឯកសារមួយចំនួនដូចខាងក្រោម៖ ​១. មួកសុវត្ថិភាព ចំនួន ១០០មួក ​២. សៀវច្បាប់ស្តីពីចរាចរណ៍ផ្លូវគោក ចំនួន ២០០ក្បាល ​៣. សៀវភៅអ្វីដែលអ្នកបើកបរម៉ូតូត្រូវយល់ដឹង ចំនួន ២០០ក្បាល ​៤. ខិតបណ្ណអ្វីដែលអ្នកបើកបរត្រូវយល់ដឹង ចំនួន ២០០សន្លឹក ​៥. ខិតបណ្ណប្រការសំខាន់ៗដែលត្រូវចងចាំចំពោះអ្នកប្រើប្រាស់ផ្លូវ ចំនួន ២០០សន្លឹក ​៦. ខិតបណ្ណសុវត្ថិភាពការធ្វើដំណើរតាមរថយន្តក្នុងរដូវកាលកូវីដ ១៩ ចំនួន ២០០សន្លឹក ​៧. ខិតបណ្ណគោរពច្បាប់ចរាចរណ៍ផ្លូវគោក ដើម្បីការពារជីវិតអ្នក គ្រួសារអ្នក និងអ្នកដទៃ ចំនួន ២០០សន្លឹក ​៨. ស្ទីកឃ័រចំណាំងផ្លាត ចំនួន ២០០សន្លឹក។