[Rasmei Kampuchea Daily News] - ការដ្ឋានសាងសង់ស្ពានអាកាសថ្មើរជើង សន្ធរម៉ុក ក្រុមការងារ បានស្ទូចគ្រោង ដែកស្ពាន ដាក់លើទម្រសសរ ស្ពានរួចរាល់ហើយ
ភ្នំពេញ៖ ការដ្ឋានសាងសង់ ស្ពានអាកាសថ្មើរជើង សន្ធរម៉ុក ស្ថិតក្នុងខណ្ឌទួលគោក ក្រុមការងារ បានស្ទូចគ្រោងដែកស្ពាន ដាក់លើទម្រសរសរ ស្ពានរួចរាល់ហើយ នៅថ្ងៃទី៣ វិច្ឆិកា នេះ។
ពាក់ព័ន្ធនឹងការដំឡើង គ្រោងដែកតួស្ពានអាកាសថ្មើជើងនេះ រដ្ឋបាលរាជធានីភ្នំពេញ កាលពី ថ្ងៃទី ២៨ ខែតុលាឆ្នាំ២០២១ បានចេញសេចក្តីជូនដំណឹង ពីការបិទចរាចរណ៍ លើកំណាត់ ផ្លូវមួយចំនួន នៅក្បែរការដ្ឋានសាងសង់ ស្ពានអាកាសថ្មើរជើង សន្ធរម៉ុក ស្ថិតក្នុងខណ្ឌទួល គោក ក្នុងរយៈពេលបីយប់ ដោយចាប់ពីយប់ថ្ងៃទី២៩, យប់ថ្ងៃទី៣១ ខែតុលា និងយប់ថ្ងៃទី០២ ខែវិច្ឆិកា ឆ្នាំ២០២១ ចាប់ពីម៉ោង ១៨និង០០យប់ ដល់ម៉ោង ៧និង00 ព្រឹក ដើម្បីដំឡើង គ្រោងដែកតួស្ពាននេះ ខណៈការងារសាងសង់សរសរ គ្រឹះស្ពាន បានបញ្ចប់ទាំងស្រុង។
គួរបញ្ជាក់ថា ស្ពានអាកាសថ្មើរជើង នៅត្រង់មុខសាលា បឋមសិក្សាសន្ធរម៉ុក ត្រូវសាង់សង់ នៅលើចំណុចផ្លូវប្រសព្វទាំង ៤ ទិស គឺសាងសង់កាត់ទទឹង ផ្លូវម៉ៅសេទុង ២ខ្សែ និងកាត់ទទឹង ផ្លូវកម្ពុជាក្រោម ២ខ្សែ ដើម្បីបង្កលក្ខណៈងាយ ស្រួលដល់សិស្សានុសិស្ស បានឆ្លងកាត់ ស្ពាននេះ ដោយសុវត្ថិភាព ទោះពួកគេ មកពីទិសខាងណាក៏ដោយ។
គួរបញ្ជាក់ទៀតថា មកដល់ពេលនេះ រាជធានីភ្នំពេញ មានស្ពានអាកាសថ្មើរជើង ចំនួន ៤ កន្លែងហើយ ក្នុងនោះ រួមមាន នៅតំបន់ជម្ពូវ័ន្ត ខណ្ឌពោធិ៍សែនជ័យ មានចំនួន ២ កន្លែង និងនៅតំបន់ភ្លើងស្តុប នាងគង្ហីង មានចំនួន១ កន្លែង និងនៅផ្សារដើមគរ មានមួយកន្លែងទៀត ដែលបានបើកសម្ពោធ ដាក់អោយប្រើប្រាស់ជាផ្លូវការ កាលពីការចុង កក្កដា ឆ្នាំ២០២០ កន្លងមកនេះ ក្រោមវត្តមានលោក ឃួង ស្រេង អភិបាលរាជធានីភ្នំពេញ៕
