ថ្ងៃព្រហស្បតិ៍ ១០កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៦ ខែកញ្ញា ឆ្នាំ២០២១ នៅ ទីស្ដីការក្រសួង ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាអំពីការរៀបចំប្រព័ន្ធមុខងារប្រើប្រាស់សម្រាប់ត្រួតពិនិត្យគុណភាពផ្លូវ (Road Care Supervision System) ដោយមានការចូលរួមតាមប្រព័ន្ធវីដេអូពីចម្ងាយពីលោកអគ្គនាយករង លោកប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និង លោកប្រធាននាយកដ្ឋាននានា ក្រោមឱវាទអគ្គនាយកដ្ឋានបច្ចេកទេសនៃក្រសួងសាធារណការ និងដឹកជញ្ជូន។ កិច្ចប្រជុំនេះធ្វើឡើងក្នុងគោលបំណងផ្លាស់ប្តូរមតិយោបល់ ក៏ដូចផ្តល់ធាតុចូលផ្សេងៗ ដើម្បីបំពេញ ចំណុចខ្វះខាតផ្នែកណាមួយ ដើម្បីឈានការបង្កើតកម្មវិធី(App)យកមកប្រើប្រាស់នៅពេលខាងមុខ តាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល ក្នុងគោលដៅពង្រឹងគុណ ភាពផ្លូវឱ្យបានរឹងមាំ ប្រើប្រាស់ជាប់បានយូរអង្វែង និងកាត់បន្ថយចំណាយថវិកាក្នុងការជួសជុលថែទាំ ដោយមានការចូលរួមធ្វើបទបង្ហាញពីមន្ត្រីជំនាញរបស់នាយកដ្ឋានព័ត៌មានវិទ្យា និងទំនាក់ទំនងសាធារណៈ ដើម្បីឆ្លងយោបល់ ក៏ដូចជាស្នើសុំព័ត៌មាន ទិន្នន័យ និងធាតុចូលសំខាន់ៗបន្ថែម ដើម្បីធ្វើឱ្យប្រសើរឡើងដល់ការអភិវឌ្ឍន៍កម្មវិធីមុខងារតាមដានត្រួតពិនិត្យគុណភាពផ្លូវ។ សូមជម្រាបជូនថា៖ ផ្អែកតាមគំនិតផ្ដួចផ្ដើមរបស់ឯកឧត្តមទេសរដ្ឋមន្ត្រី នាយកដ្ឋានព័ត៌មានវិទ្យា និង ទំនាក់ទំនងសាធារណៈ សហការជាមួយអគ្គនាយកដ្ឋានបច្ចេកទេស បានខិតខំប្រឹងប្រែងរៀបចំប្រព័ន្ធមុខងារប្រើប្រាស់សម្រាប់ត្រួតពិនិត្យគុណភាពផ្លូវ ដែលផ្ដល់ភាពងាយស្រួលដល់ថ្នាក់ដឹកនាំក្រសួងក្នុងការតាមដានការងារគុណភាពផ្លូវតាមរយៈរបាយការណ៍សាងសង់ របាយការណ៍ត្រួតពិនិត្យគុណភាព និងរបាយការណ៍វាយតម្លៃការងារសាងសង់ផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមអគ្គនាយក បានគូសបញ្ជាក់អំពីកិច្ចខិតខំប្រឹងប្រែងរបស់ ក្រុមការងាររបស់នាយកដ្ឋានព័ត៌មាន និងទំនាក់ទំនងសាធារណៈ និងក្រុមការងាររបស់អគ្គនាយកដ្ឋាន បច្ចេកទេសក្នុងការរៀបចំប្រព័ន្ធមុខងារប្រើប្រាស់សម្រាប់ត្រួតពិនិត្យគុណភាពផ្លូវប្រកបដោយស្មារតីទទួល ខុសត្រូវខ្ពស់៕