ផ្លូវល្បឿនលឿនដែលតភ្ជាប់ពីរាជធានីភ្នំពេញ ទៅកាន់ខេត្តព្រះសីហនុនោះគឺជាផ្លូវល្បឿនលឿនដំបូងបង្អស់គេនៅកម្ពុជា ហើយបច្ចុប្បន្ននេះ រាជរដ្ឋាភិបាល ក៏មានគម្រោងសាងសង់ផ្លូវល្បឿនលឿនមួយខ្សែទៀតដែលជាផ្លូវល្បឿនលឿនទី២របស់កម្ពុជា ដោយតភ្ជាប់ទៅកាន់ក្រុងបាវិត ខណៈពេលនេះ​ កំពុងស្ថិតក្នុងការសិក្សាបន្ថែមដើម្បីឱ្យបានគ្រប់ជ្រុងជ្រោយ មុនដំណើរសាងសង់មកដល់។ នៅក្នុងកិច្ចប្រជុំក្រុមការងារបច្ចេកទេសហេដ្ឋារចនាសម្ព័ន្ធ និងសមាហរណកម្មក្នុងតំបន់(IRITWG)តាមប្រព័ន្ធវីដេអូពីចម្ងាយ កាលពីថ្ងៃទី២០ ខែសីហា ឆ្នាំ២០២១ ដែលដឹកនាំដោយឯកឧត្ដមទេសរដ្ឋមន្ត្រី ស៊ុន ចាន់ថុល បានបញ្ជាក់ឱ្យដឹងថា៖ ផ្លូវល្បឿនលឿន ភ្នំពេញ-បាវិត-ម៉ុកបៃ ព្រំដែនកម្ពុជា-វៀតណាម ដោយលើគោលការណ៍កសាង ប្រតិបត្តិ ផ្ទេរ(BOT) កំពុងសិក្សាលើគម្រោងសាងសង់បន្ថែមទៀត។ សូមជម្រាបថា៖ កន្លងមក គម្រោងផ្លូវល្បឿនលឿននេះ ក៏បានពិចារណា និងប្រៀបធៀបប្លង់ ដែលស្នើដោយចិន និងជប៉ុន ដែលកាលពីខែ កញ្ញា ឆ្នាំមុន ក្រុមហ៊ុន China Railway International Group Co., Ltd បានបង្ហាញគំរូរប្លង់ចំនួន ៣ សម្រាប់គម្រោងសាងសង់ផ្លូវល្បឿនលឿនភ្នំពេញ-បាវិត ដែលល្បឿនលឿនបំផុតបានត្រឹម ១២០គ.ម ក្នុងមួយម៉ោង។ ក្នុងនោះ JICA ក៏បានបញ្ចប់ការសិក្សាលើគម្រោងល្បឿនលឿនភ្នំពេញ-បាវិតនេះ ផងដែរ ប៉ុន្តែដោយសារថ្លៃនៃការស្ថាបនាខ្ពស់ រាជរដ្ឋាភិបាលកំពុងពិចារណា ជ្រើសរើសយកគម្រោងដែលមានតម្លៃទាបជាង ហើយកាលពីខែកក្កដា ឆ្នាំ២០២០ សម្តេចតេជោ ហ៊ុន សែន បានចេញសេចក្ដីសម្រេច ស្ដីពី ការបង្កើតគណៈកម្មការអន្ដរក្រសួង ដើម្បីជំរុញដំណើរការអនុវត្ដគម្រោងហេដ្ឋារចនាសម្ព័ន្ធ ផ្លូវល្បឿនលឿន តភ្ជាប់ពីរាជធានីភ្នំពេញ ទៅក្រុងបាវិត។ គួរបញ្ជាក់ផងដែរថា៖ គម្រោងផ្លូវល្បឿនលឿន ភ្នំពេញ-បាវិត មានប្រវែងសរុបប្រហែល ១៣៥ គ.ម ដោយចេញពីរាជធានីភ្នំពេញ ឆ្លងកាត់ខេត្តកណ្តាល ព្រៃវែង និងស្វាយរៀង ឆ្ពោះទៅទីក្រុងបាវិត ព្រំដែនកម្ពុជា-វៀតណាម និង​មាន​តម្លៃ​ជាង ២ ​ពាន់​លាន​ដុល្លារ៕