[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល ផ្ដល់អនុសាសន៍ជូន បេក្ខជនជ័យលាភី អាហារូបករណ៍ ឆ្នាំ២០២១ នៅប្រទេសជប៉ុន ចំនួន២៤រូប
ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន នាថ្ងៃទី២២ ខែកក្កដា ឆ្នាំ២០២១ នៅទីស្តីការក្រសួង បានទទួលជួបសម្តែងការគួរសម និងផ្ដល់អនុសាសន៍ តាមប្រព័ន្ធវីដេអូ ពីចម្ងាយ ជូនបេក្ខជនជ័យលាភី អាហារូបករណ៍ ឆ្នាំ២០២១ ចំនួន ២៤ រូប មុនចេញដំណើរ ទៅបន្តការសិក្សា នៅប្រទេសជប៉ុន ដោយមានការចូលរួម ពីថ្នាក់ដឹកនាំក្រសួង និងមន្ត្រីពាក់ព័ន្ធផងដែរ។
ជំនួបនេះ ធ្វើឡើង ដើម្បីផ្ដល់អនុសាសន៍ ចំណេះដឹង បទពិសោធន៍ល្អៗ ក៏ដូចជា បង្ហាញនូវ គោលនយោបាយ និងចក្ខុវិស័យរបស់ក្រសួង ដែលជាទស្សនទាន ដ៏មានតម្លៃបំផុត សម្រាប់បេក្ខជន ក្នុងការយកទៅ ផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណង ឱ្យពិភពលោក បានដឹង បានយល់ និងមកទស្សនាកម្ពុជា ដើម្បីស្វែងរកកាលានុវត្តភាព ក្នុងការវិនិយោគផងដែរ។
ថ្លែងទៅកាន់បេក្ខជនជ័យលាភី អាហារូបករណ៍ នាឱកាសនោះ លោកទេសរដ្ឋមន្ត្រី បានថ្លែងនូវ ការកោត សរសើរ និងអបអរសាទរ ដល់បេក្ខជនជ័យលាភីទាំងអស់ ដែលបានទទួលអាហារូបករណ៍ ទៅបន្តការសិក្សា នៅប្រទេសជប៉ុន និងសង្ឃឹម ជឿជាក់ថាៈ បេក្ខជនជ័យលាភីទាំងអស់ នឹងខិតខំប្រឹងប្រែង រៀនសូត្រ ដើម្បីក្រេប យកចំណេះដឹង និងបទពិសោធន៍ថ្មីៗ នៅប្រទេសជប៉ុន ដើម្បីចូលរួមជួយអភិវឌ្ឍន៍ ប្រទេសជាតិ មាតុភូមិយើង ឱ្យបានរុងរឿងថែមទៀត។
លោកទេសរដ្ឋមន្ត្រី បានបន្ថែមថាៈ ធនធានមនុស្ស ជាកត្តាសំខាន់ ដែលយើងត្រូវ តែខិតខំប្រឹងប្រែង បណ្ដុះបណ្ដាល ដើម្បីចូលរួមកសាងប្រទេស ស្របតាម អនុសាសន៍ ដ៏ខ្ពង់ខ្ពស់របស់ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលលោកតែងតែបានក្រើន រម្លឹកថា ដើម្បីកសាងប្រទេសជាតិ មាតុភូមិ ឱ្យបានរុងរឿង យើងត្រូវមាន ផ្លូវ ភ្លើង ទឹក និងធនធាន មនុស្ស។
ជាមួយគ្នានេះផងដែរ លោកទេសរដ្ឋមន្ត្រី បានលើកឡើង អំពីកិច្ចខិតខំប្រឹងប្រែង របស់ថ្នាក់ដឹកនាំ ក្រសួង ក្នុងការស្វែងរកជំនួយ កសាងវិទ្យាស្ថានតេជោ សែន សាធារណការ និងដឹកជញ្ជូន នៃក្រសួង សាធារណការ និងដឹកជញ្ជូន ដើម្បីផ្ដល់ ការបណ្ដុះបណ្ដាល វិស្វករកម្ពុជា ឱ្យមានចំណេះ លើការកសាង ហេដ្ឋារចនាសម្ព័ន្ធ ហើយជាលទ្ធផល ដំណើរការចាប់ផ្តើមដំបូង របស់វិទ្យាស្ថាននេះ មាននិស្សិត ចំនួន ១៩១ រូប សិក្សាតាមប្រព័ន្ធអនឡាញ ក្នុងបរិបទជំងឺកូវីដ-១៩។ ជាងនេះទៀត វិទ្យាស្ថាន កំពុងត្រៀមចុះ ហត្ថលេខា លើអនុស្សរណៈ យោគយល់ជាមួយ សាកលវិទ្យាល័យមួយ របស់ប្រទេសចិន ដែលមានឈ្មោះល្បីល្បាញលើវិស័យ ហេដ្ឋារចនាសម្ព័ន្ធ ដើម្បីបណ្ដុះបណ្ដាល និស្សិតយើង ក្រៅពីនោះ វិទ្យាស្ថាន ត្រៀមបណ្ដុះបណ្ដាល មន្ត្រីក្រសួង ដើម្បីឱ្យមានចំណេះដឹងចូលរួមកសាង ប្រព័ន្ធហេដ្ឋារចនាសម្ព័ន្ធ នៅកម្ពុជាផងដែរ។
លោកទេសរដ្ឋមន្ត្រី បានណែនាំបេក្ខជនជ័យលាភី ឱ្យខិតខំប្រឹងប្រែងរៀនសូត្រ បំពេញកាតព្វកិច្ច ជាកូនខ្មែរ រក្សាអាកប្បកិរិយាល្អ ប្ដេជ្ញាចិត្តក្រេបជញ្ជក់ ចំណេះដឹង អនុវត្តឱ្យបានខ្ជាប់ខ្ជួន តាមច្បាប់ទម្លាប់ និងវិន័យរបស់សាលា ត្រូវរៀនឱ្យចេះ រៀនឱ្យចប់ ដើម្បីយកចំណេះដឹង និងបទពិសោធន៍ មកជួយកសាង ប្រទេសជាតិ មាតុភូមិ មិនត្រឹមតែសិក្សា នៅលើតែក្រដាស និងសាលារៀន ប៉ុណ្ណោះទេ ប៉ុន្តែត្រូវស្វែងយល់ បទពិសោធន៍ ក្នុងសង្គម និងការរស់នៅ របស់ប្រទេសគេ និងបានផ្តាំផ្ញើ ឱ្យបេក្ខជនជ័យលាភីទាំងអស់ ធ្វើខ្លួនជាឯកអគ្គរដ្ឋទូតសុច្ឆន្ទៈ ជួយផ្សព្វផ្សាយ អំពីប្រទេសកម្ពុជាផងដែរ។
ឆ្លៀតក្នុងឱកាសនោះ លោកទេសរដ្ឋមន្ត្រី បានជម្រាបជូនអំពីការងារដែល សម្រេចបាន និងការងារ កំពុងបន្ត ទាក់ទងនឹងការអភិវឌ្ឍ វិស័យហេដ្ឋារចនាសម្ព័ន្ធ នៅកម្ពុជា ដែលក្នុងនោះរួមមាន គម្រោងសាងសង់ពង្រីក និងលើកកម្រិតគុណភាព ផ្លូវជាតិលេខ៥ ផ្លូវជាតិលេខ៦ គម្រោងសាង សង់ផ្លូវ ល្បឿនលឿន ភ្នំពេញ-ព្រះសីហនុ គម្រោងផ្លូវជាតិលេខ៣ ផ្លូវជាតិលេខ២ គម្រោងផ្លូវដែក និងបណ្តាញផ្លូវជាតិ សំខាន់ៗមួយចំនួនទៀត គម្រោងអភិវឌ្ឍន៍កម្មវិធី Port EDI ជាពិសេស ការប្រើប្រាស់ប្រព័ន្ធបច្ចេកវិទ្យា ព័ត៌មានវិទ្យា ដើម្បីផ្តល់សេវាសាធារណៈ ជូនប្រជាពលរដ្ឋ ប្រកបដោយប្រសិទ្ធភាព និងតម្លាភាព។
ជាទីបញ្ចប់ លោកទេសរដ្ឋមន្ត្រី បានលើកឡើង នូវពាក្យស្លោកថាៈ “សំដីឥតប្រយោជន៍ នាំគ្រោះដល់ ជាតិ ការងារមានប្រសិទ្ធភាព នាំជាតិរុងរឿង” និងបានសង្កត់ធ្ងន់ថាៈ ការតិះដៀលគ្នា ទៅវិញទៅមក មិននាំចំណេញដល់ជាតិទេ ប៉ុន្តែត្រូវធ្វើការ ឱ្យមានប្រសិទ្ធភាព រៀនសូត្រ ឱ្យមានចំណេះដឹង យកបទពិសោធន៍ មកជួយជាតិ ទើបជាពលរដ្ឋល្អ រស់នៅក្នុងសង្គម៕
