ថ្ងៃសុក្រ ១៥រោច ចែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៩ ខែកក្កដា ឆ្នាំ២០២១ នៅទីស្តីការក្រសួង ឯកឧត្តម កែន រដ្ឋា អគ្គនាយកនៃអគ្គនាយករដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ស្តីពីមូលដ្ឋានគ្រឹះនៃការការពារ ការត្រួតពិនិត្យការឆ្លងមេរោគកូវីដ-១៩ និងរបៀបធ្វើតេស្តរហ័ស(Rapid Test) ជូនដល់សិក្ខាកាមជនបង្គោលជាមន្រ្តីរាជការនៅតាមបណ្តាមន្ទីរសាធារណការ និងដឹកជញ្ជូនក្រោមឱវាទក្រសួងទាំង២៥ រាជធានី-ខេត្ត។ វគ្គបណ្តុះបណ្តាល លើកទី២នេះ ត្រូវបានរៀបចំឡើងក្រោមកិច្ចសហការល្អ រវាងអគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងសាធារណការ និងដឹកជញ្ជូន និងក្រសួងសុខាភិបាល មានរយៈពេល០២ថ្ងៃ គឺចាប់ពីថ្ងៃទី០៩ ដល់ ១០ ខែកក្កដា ឆ្នាំ២០២១ ដែលមានសិក្ខាកាមជាមន្រ្តីរាជការនៃមន្ទីរសាធារណការ និងដឹកជញ្ជូនរាជធានី-ខេត្ត ចូលរួមសរុបប្រមាណ៧០នាក់ សរុបទាំងពីរលើក បាន ១០៥ នាក់។ គោលបំណងនៃវគ្គបណ្តុះបណ្តាលនេះ ត្រូវបានរៀបចំឡើងក្នុងន័យចែករំលែក និងលើកកម្ពស់ចំណេះដឹងឱ្យបានទូលំទូលាយអំពីមូលដ្ឋានគ្រឹះនៃការពារខ្លូន ការត្រួតពិនិត្យ និងការឆ្លងមេរោគកូវីដ-១៩ ព្រមទាំងរបៀបនៃការធ្វើតេស្តរហ័សរកមេរោគកូវីដ-១៩(Rapid Test) ស្របតាមអនុសាសន៍ណែនាំរបស់ប្រមុខរាជរដ្ឋាភិបាល និងជាការចូលរួមចំណែកជាមួយក្រសួងសុខាភិបាល ដើម្បីបង្ការទប់ស្កាត់ការចម្លងតគ្នាពីមនុស្សម្នាក់ទៅមនុស្សម្នាក់ទៀត ក្នុងពេលបំពេញការងារ ឬការប្រាស្រ័យទាក់ទងគ្នាក្នុងសកម្មភាពផ្សេងៗ ។ ថ្លែងនៅក្នុងកម្មវិធីបណ្តុះបណ្តាលនេះ ឯកឧត្តមអគ្គនាយក បានគូសបញ្ជាក់ថា៖ បញ្ហាជំងឺកូវីដ-១៩ នេះមិនមែនជាបញ្ហារបស់កម្ពុជាតែឯងនោះទេ ប៉ុន្តែវាជាបញ្ហាប្រឈមជាសកលរបស់ប្រជាជននៅក្នុងពិភពលោកទាំងមូល។ នាពេលបច្ចុប្បន្ន ជំងឺកូវីដ-១៩ នៅក្នុងកម្ពុជាយើងក៏នៅតែបន្តរីករាលដាល និងរកឃើញករណីឆ្លងថ្មីជារៀងរាល់ថ្ងៃ ជាពិសេសព្រឹត្តិការណ៍ ២០ កុម្ភៈ ដែលបានផ្ទុះឡើង និងមិនទាន់អាចបិទបញ្ចប់ ហើយអាត្រាអ្នកឆ្លងថ្មីជារៀងរាល់ថ្ងៃ នៅតែបន្តរកឃើញក្នុងកម្រិតខ្ពស់ ដែលនេះជាកង្វល់ និងក្តីបារម្ភមួយសម្រាប់យើងទាំងអស់គ្នា ហើយតម្រូវឱ្យយើងគ្រប់គ្នាត្រូវចូលរួម ដើម្បីកាត់បន្ថយការឆ្លង និងអាចបិទបញ្ចប់ការរីករាលដាលជាស្ថាពរផងដែរ។ ឯកឧត្តមអគ្គនាយក បានគូសបញ្ជាក់ថា៖ កាលពីថ្ងៃទី០១ ខែកក្កដា ឆ្នាំ២០២១ កន្លងទៅ ប្រមុខរាជរដ្ឋាភិបាល សម្តេចតេជោនាយករដ្ឋមន្រ្តី បានអនុញ្ញាតឱ្យគ្រប់ស្ថាប័នរដ្ឋ និងឯកជន ត្រូវធ្វើការបណ្តុះបណ្តាលអំពីការប្រើប្រាស់ឧបករណ៍ធ្វើតេស្តរហ័ស(Rapid Test) ដើម្បីជាការចូលរួមចំណែកជាមួយរាជរដ្ឋាភិបាល និងក្រសួងសុខាភិបាល ក្នុងការស្វែងរកប្រភពចម្លង និងអាចមានលទ្ធភាពកាត់ផ្តាច់ឫសគល់មេរោគកូវីដ-១៩នេះ ប្រកបដោយប្រសិទ្ធភាព។ ឯកឧត្តមអគ្គនាយក ក៏បានលើកឡើងផងដែរថា៖ ឯកឧត្តមទេសរដ្ឋមន្រ្តី លោកតែងតែបានយកចិត្តទុកដាក់ និងគិតគូរពីសុខទុក្ខរបស់បុគ្គលិកមន្រ្តីរាជការយើងទាំងអស់គ្នា ហើយក្នុងរយៈកាលកន្លងមក ឯកឧត្តមទេសរដ្ឋមន្រ្តី បានណែនាំឱ្យអគ្គនាយកដ្ឋានរដ្ឋបាល និងហិរញ្ញវត្ថុ សហការជាមួយបណ្តាអង្គភាពពាក់ព័ន្ធ ដើម្បីរៀបចំកិច្ចការចាំបាច់មួយចំនួន រួមមានដូចជា៖ ១).បានសហការរៀបចំ និងដាក់ឱ្យប្រើប្រាស់ទម្រង់ឌីជីថល(Digital) សម្រាប់តាមដានស្ថានភាពសុខភាពផ្ទាល់ខ្លួនប្រចាំថ្ងៃរបស់មន្រ្តីរាជការក្រសួង ចាប់តាំងពីខែមីនា ឆ្នាំ២០២០ រហូតមកទល់បច្ចុប្បន្ននេះ ២).បានសហការរៀបចំកម្មវិធីចាក់វ៉ាក់សាំងបង្ការជំងឺកូវីដ-១៩ នៅទីស្តីការក្រសួង ជូនដល់បុគ្គលិកមន្រ្តីរាជការក្រសួង ព្រមទាំងសាច់ញាតិបងប្អូនរបស់មន្រ្តីរាជការបានចំនួន ១៩៩៣នាក់ និងបងប្អូនប្រជាពលរដ្ឋនៅខណ្ឌឫស្សីកែវបានចំនួន ៣៣០៣ នាក់ ៣).បានបញ្ជាទិញឧបករណ៍ធ្វើតេស្តរហ័ស(Rapid Test) ចំនួន ២០០០សម្រាប់(Kits) ហើយបានបញ្ជាទិញចំនួន៥០០០សម្រាប់ (Kits) បន្ថែមទៀត សម្រាប់ប្រើប្រាស់នៅតាមអង្គភាពក្រោមឱវាទក្រសួង និងតាមការដ្ឋានចាំបាច់មួយចំនួន ព្រមទាំងបានទិញឧបករណ៍ធ្វើតេស្តរហ័ស(Rapid Test) ចំនួន ២០០០សម្រាប់(Kits) ជូនដល់មន្ទីរពេទ្យកាល់ម៉ែត ផងដែរ ៤).បានធ្វើតេស្តរហ័សជូនបុគ្គលិកមន្រ្តីរាជការ មន្រ្តីបច្ចេកទេសតាមការដ្ឋាន និងអ្នកបើកបរ នៅពេលចុះបំពេញបេសកកម្មនៅតាមការដ្ឋាន និងមុនពេលចូលរួមក្នុងកិច្ចប្រជុំសំខាន់ៗមួយចំនួន ៥).បានរៀបចំវគ្គបណ្តុះបណ្តាលរបៀបធ្វើតេស្តរហ័ស(Rapid Test) លើកទី១ កាលពីថ្ងៃទី១៧ ខែមិថុនា ឆ្នាំ២០២១ ដល់ជនបង្គោលជាមន្រ្តីរាជការនៅតាមបណ្តាអគ្គនាយកដ្ឋាន និងអង្គភាពថ្នាក់ជាតិចំនួន ៣៥នាក់ ៦).បានបញ្ជាទិញ និងបម្រុងទុកឱសថចិន(LIANHUA QINGWEN JIAONANG)មួយចំនួន សម្រាប់ផ្តល់ជូនដល់បុគ្គលិកមន្ត្រីរាជការណា ដែលមានហានិភ័យឆ្លង ឬបានឆ្លងជំងឺកូវីដ-១៩ ប្រើប្រាស់។ ស្របពេលជាមួយគ្នាផងដែរ ថ្លែងនៅក្នុងកិច្ចប្រជុំពេញអង្គរបស់គណៈរដ្ឋមន្ត្រីនៅថ្ងៃទី៩ ខែកក្កដា ឆ្នាំ២០២១នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងនូវការកោតសរសើរចំពោះក្រសួងសាធារណការ និងដឹកជញ្ជូន ដែលអាចផ្គត់ផ្គង់ដោយខ្លួនឯងក្នុងការទិញឧបករណ៍ធ្វើតេស្តរហ័សរកមេរោគកូវីដ-១៩(Rapid Test) និងអាចផ្គត់ផ្គង់ទៅអង្គភាពក្រោមឱវាទផ្សេងទៀតផងដែរ៕