ភ្នំពេញ ថ្ងៃទី០៩ ខែ​កុម្ភៈ ឆ្នាំ​២០២១​ -- ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន​បានអនុញ្ញាត​ឱ្យ​សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធ​ថ្ងៃចុង​ក្រោយ​ប្រចាំនៅកម្ពុជា (The Church of Jesus Christ of Latter-day Saints) ដឹកនាំដោយ លោក IthVichitប្រធានគណៈប្រតិភូសមាគម និងលោក Sea Samnang ប្រធានសមាគម ចូល​ជួប​ពិភាក្សាការងារ​ ក្នុង​គោលបំណងស្វែងរកការគាំទ្រពីឯកឧត្តមទេសរដ្ឋមន្ត្រី ដើម្បី​ចុះជួយអ្នកស្រុកកោះធំ ដែលមានតម្រូវការចាំបាច់លើផ្នែកសេវាថែមទាំសុខភាពបឋម ការសង្គ្រោះបន្ទាន់ ទឹកស្អាត អនាម័យ និងការអប់រំ ជាពិសេស ដើម្បីលើកកម្ពស់ការថែ​ទាំ​សុខភាពរបស់អ្នកស្រុកកោះធំនៅតាមមណ្ឌលសុខភាពនានារបស់ស្រុកនេះឱ្យកាន់តែប្រសើរឡើងថែមមួយកម្រិតទៀត។ ជំនួបនេះ បានធ្វើឡើង នា​ថ្ងៃ១២រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអង្គារ ទី០៩ ខែកុម្ភៈ ឆ្នាំ២០២១ នៅទីស្តីការក្រសួង សាធារណការ ​និង​ដឹកជញ្ជូន។ នៅក្នុង​ឱកាសនោះ ឯកឧត្តមទេសរដ្ឋមន្ត្រីបាន​គូសបញ្ជាក់អំពីសមិទ្ធផលសំខាន់ៗ ដែល​សម្រេចបានរបស់អ្នកស្រុកកោះធំ ទាក់ទងនឹងវិស័យហេដ្ឋារចនាសម្ព័ន្ធរូបវន្ត ដោយ​បាន​មាន​ប្រសាសន៍ថា គិតរហូតមកទល់ពេលនេះ ឃុំស្ទើរតែទាំងអស់នៃស្រុកកោះធំ មាន​ការអភិវឌ្ឍច្រើនក្នុងនោះមាន ផ្លូវបេតុងខ្វាត់ខ្វែង ស្ពាន និងភ្លើងបំភ្លឺផ្លូវជាដើម។ ឯកឧត្តម ទេសរដ្ឋមន្ត្រីបានគូសបញ្ជាក់បន្ថែម​អំពីការខិតខំប្រឹងប្រែងរបស់រាជរដ្ឋាភិបាល ក្នុងការ កសាងប្រទេសជាតិពីបាតដៃទទេ រហូតមានការរីកចម្រើនលើគ្រប់វិស័យ តាមរយៈការ បង្រួបបង្រួមជាតិ ឯកភាពជាតិ សន្តិភាព ស្ថិរភាពនយោបាយ និង រក្សាបានស្ថិរភាពម៉ាក្រូ សេដ្ឋកិច្ចដែលជាមូលដ្ឋានដ៏រឹងមាំ មិនអាចខ្វះបានសម្រាប់ទ្រទ្រង់លើកកម្ពស់ កំណើន សេដ្ឋកិច្ច និងការអភិវឌ្ឍប្រកបដោយចីរភាព។ ជាមួយគ្នានេះដែរ ឯកឧត្ដមទេសរដ្ឋមន្ត្រីបានមាន​ប្រសាសន៍កោតសរសើរ និងថ្លែង​អំណរគុណចំពោះ​សមាគមដែលបានខិតខំប្រឹងប្រែងចូលរួមចំណែកក្នុងការអភិវឌ្ឍ ប្រទេសកម្ពុជាឱ្យមានការរីកចម្រើន​ ជាពិសេសចូលរួមអនុវត្តគោលនយោបាយកាត់បន្ថយ ភាពក្រីក្ររបស់រាជរដ្ឋាភិបាល។ លោក Sea Samnang ប្រធានសមាគមនិកាយសាសនាចក្រនៃព្រះយេស៊ូវគ្រីស្ទ​នៃពួកបរិសុទ្ធ​ថ្ងៃចុង​ក្រោយ​ប្រចាំនៅកម្ពុជា ជម្រាបជូនឯកឧត្តមទេសរដ្ឋមន្ត្រីអំពីសមិទ្ធ​ផល​សំខាន់ៗសម្រេចបានរបស់សមាគម ក្នុងការជួយលើកកម្ពស់សុខភាពរបស់ប្រជា​ពល​រដ្ឋកម្ពុជា ដែលក្នុងនោះសមាគមបានធ្វើប្រតិបត្តិការ របស់ខ្លួនប្រកបដោយជោគជ័យ​នៅ​តាមបណ្តាស្រុកមួយចំនួននៅកម្ពុជាក្នុងនោះរួមមាន ស្រុកល្វាឯម ស្រុកខ្សាច់កណ្ដាល ស្រុកបាទី ស្រុកស្ទឹងត្រង់ ស្រុកចំការលើ ស្រុកបាធាយ ស្រុកព្រៃឈរ ស្រុក​កំពង់សៀម និងស្រុកកោះសូទិន ជាដើម៕