ថ្ងៃចន្ទ ១២កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៥ ខែមករា ឆ្នាំ២០២១ នៅទីស្ដីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការពិនិត្យលក្ខណសម្បត្តិវរជន ដែលត្រូវស្នើសុំគ្រឿងឥស្សរិយយស សម្រាប់ឆ្នាំ២០១៩ ដោយមានការអញ្ជើញចូលរួមពីថ្នាក់ដឹកនាំ និងសមាជិកសមាជិកានៃគណៈកម្មការ។ កិច្ចប្រជុំនេះធ្វើឡើងដើម្បីពិភាក្សា និងពិនិត្យលក្ខណសម្បត្តិវរជន ដែលត្រូវស្នើសុំគ្រឿងឥស្សរិយយស សម្រាប់ឆ្នាំ២០១៩ សំដៅឱ្យការស្នើសុំគ្រឿងឥស្សរិយយសជូនមន្ត្រីរាជការប្រព្រឹត្តទៅដោយតម្លាភាព និងយុត្តិធម ពោលគឺអ្នកខិតខំប្រឹងប្រែងធ្វើការសមនឹងទទួលបានគ្រឿងឥស្សរិយយស ហើយអ្នកអសកម្មនឹងការងារមិនសមនឹងទទួលបានគ្រឿងឥស្សរិយយសឡើយ។ ថ្លែងក្នុងកិច្ចប្រជុំនាឱកាសនោះ ឯកឧត្ដមរដ្ឋលេខាធិការ បានគូសបញ្ជាក់ថា៖ ការវាយតម្លៃ ដើម្បីទទួលបានគ្រឿងឥស្សរិយយសជូនមន្ត្រីរាជការណាម្នាក់មិនមែនធ្វើឡើងតាមរយៈក្រដាសមួយសន្លឹកនោះទេ ពោលគឺត្រូវអនុវត្តតាមគោលការណ៍ស្ដង់ដារនៃការវាយតម្លៃ មានកំណត់ហេតុនៃការប្រជុំវាយតម្លៃរបស់ អង្គភាពនីមួយៗ និងកំណត់ហេតុប្រជុំវាយតម្លៃរបស់គណៈកម្មការរបស់ក្រសួង ព្រមទាំងឯកសារពាក់ព័ន្ធដទៃទៀតជាទឡ្ហីករណ៍ ជាពិសេសជាងនេះទៅទៀត ការវាយតម្លៃត្រូវធ្វើឱ្យបានគ្រប់ជ្រុងជ្រោយ និងយុត្តិធម៌បំផុត។ ឯកឧត្ដមរដ្ឋលេខាធិការបានសង្កត់ធ្ងន់ថា ការវាយតម្លៃស្នើសុំគ្រឿងឥស្សរិយយសជូនមន្ត្រីរាជការណាម្នាក់ដោយខ្វះតម្លាភាព ខ្វះយុត្តិធម គឺជាកម្លាំងចលករនាំឱ្យមានការបាក់ទឹកចិត្តដល់មន្ត្រី ដែលខិតខំ បំពេញការងារ តែមិនត្រូវទទួលបានគ្រឿងឥស្សរិយយស ហើយវាក៏អាចជាកាតាលីករដែលជំរុញឱ្យបែកបាក់សាមគ្គីភាពក្នុងអង្គភាព ដែលជាបច្ច័យធ្វើឱ្យបាត់បង់ផលិតភាពការងារក្នុងអង្គភាពផងដែរ។ ឯកឧត្ដមរដ្ឋលេខាធិការបានស្នើឱ្យអង្គភាពនីមួយៗ យកចិត្តទុកដាក់វាយតម្លៃឱ្យបានគ្រប់ជ្រុងជ្រោយ ប្រកបដោយទំនួលខុសត្រូវ ឈរលើគោលការណ៍ស្តង់ដារវាយតម្លៃ និងគោលការណ៍យុត្តិធម៌ ដើម្បីលើកទឹកចិត្តមន្ត្រីដែលខិតខំប្រឹងប្រែងធ្វើការងារ បន្តខិតខំប្រឹងប្រែងបន្ថែមទៀត ហើយស្វែងរុកវិធីសាស្ត្រជំរុញលើកទឹកចិត្តមន្ត្រីអសកម្មនឹងការងារ ងាកមកសកម្មនឹងការងារឡើងវិញ៕