នៅប៉ុន្មានឆ្នាំចុងក្រោយនេះ យើងសង្កេតឃើញថាចរាចរណ៍នៅក្នុងរាជធានីភ្នំពេញ គឺមានភាពមមាញឹកខ្លាំង ខណៈចំនួនយានយន្ដមានការកើនឡើងច្រើន។ កត្ដានេះហើយបានធ្វើឲ្យចរាចរណ៍មានការកកស្ទះ សម្រាប់អ្នកធ្វើដំណើរ។ ក៏ប៉ុន្ដែដើម្បីដោះស្រាយបញ្ហាខាងលើនេះ រាជរដ្ឋាភិបាល ក៏ដូចជារដ្ឋបាលរាជធានីភ្នំពេញ បានរិះរកវិធីដោះស្រាយជាច្រើនដោយក្នុងនោះមានទាំងការសាងសង់ស្ពានអាកាស ផ្លូវក្រោមដី ផ្លូវអាកាសថ្មើរជើងជាដើម ដើម្បីធានាសុវត្ថិភាពប្រជាពលរដ្ឋ ក៏ដូចជាកាត់បន្ថយការកកស្ទះនេះ។ ដោយឡែកបើយើងក្រឡេកមកមើលចំនួនស្ពានអាកាសថ្មើរជើងនៅរាជធានីភ្នំពេញ មកដល់ពេលនេះគឺមានសរុបចំនួន ៥​ ទីតាំងហើយ ដោយក្នុងនោះរួមមា​ន​ នៅតំបន់ជ​ម្ពូ​វ័ន្ត ខ​ណ្ឌពោធិ៍សែន​ជ័យ មានចំនួន២កន្លែ​ង​ នៅតំបន់​ភ្លើ​ងស្តុប​នាង​គ​ង្ហីង មានចំនួន១​ក​ន្លែង នៅតំបន់ផ្សារដើមគរចំនួន ១ កន្លែង ខណៈចុងក្រោយស្ពានអាកាសថ្មើរជើងនៅស្តុបសន្ធរម៉ុក។ ទន្ទឹមជាមួយគ្នានេះផងដែរ ក្នុងអំឡុងការចុះដឹកនាំមន្ត្រីជំនាញនិងអាជ្ញាធរដែនដីចុះពិនិត្យការរដ្ឋានស្ថាបនាស្ពានអាកាសថ្មើរជើងផ្សារដើមគរ កាលពីពាក់ពេលកន្លងទៅឯកឧត្ដម ឃួង ស្រេង អភិបាលរាជធានីភ្នំពេញ បានបង្កើបថា រដ្ឋបាលរាជធានីភ្នំពេញនឹងធ្វើការស្ថាបនាស្ពានអាកាសថ្មើរជើងចំនួន២៥ទីតាំងទៀត ដើម្បីសម្រួលការកកស្ទះចរាចរណ៍និងកាត់បន្ថយគ្រោះថ្នាក់ចរាចរណ៍ជូនប្រជាពលរដ្ឋ។ តាមការបញ្ជាក់ពីលោក ឃួង ស្រេង ចំនួនប្រជាពលរដ្ឋដែលរស់នៅក្នុងរាជរាធនីភ្នំពេញ ទាំងអ្នកស្នាក់នៅបណ្ដោះអាសន្ន និងអ្នករស់នៅអចិន្ដ្រៃ មានចំនួនប្រមាណជាងបីលាននាក់ ដែលតម្រូវឲ្យរដ្ឋបាលរាជធានីភ្នំពេញយើង ធ្វើការអភិវឌ្ឍន៍ហេដ្ឋារចនាសម្ព័ន្ធផ្សេងៗ ទាំងការកសាងផ្លូវ លូ ជាមួយនឹងការកសាងស្ពានអាកាសក្រោមដី លើដីនិងស្ពានអាកាសថ្មើជើងជាដើម ដើម្បីរំដោះចរាចរណ៍ក្នុងរាជធានីភ្នំពេញ។ ទោះជាយ៉ាងណាគម្រោងស្ពានអាកាសថ្មើរជើងថ្មីទាំង ២៥ នេះ នៅពុំទាន់បានបញ្ជាក់ទីតាំងនៃការសាងសង់ឲ្យបានច្បាស់លាស់នៅឡើយទេ ដោយវាស្ថិតនៅក្នុងផែការរបស់រដ្ឋបាលរាជធានីភ្នំពេញ។