ភ្នំពេញ៖ ថ្ងៃសុក្រ ១២កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៧ ខែវិច្ឆិកា ឆ្នាំ ២០២០ ឯកឧត្ដម សួន រចនា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្ដមទេសរដ្ឋមន្ត្រី ស៊ុន ចាន់ថុល បានដឹកនាំគណៈប្រតិភូក្រសួងអញ្ជើញចូលរួមគោរពវិញ្ញាក្ខន្ធសព ឧបាសិកា ជា យឺន ដែលបានទទួលមរណភាពកាលពីថ្ងៃពុធ ១០កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៥ ខែវិច្ឆិកា ឆ្នាំ២០២០ ស្ថិតនៅផ្ទះលេខ១៨ ភូមទួលថ្ងាន់ សង្កាត់ ទួលសង្កែ២ ខណ្ឌឫស្សីកែវ រាជធានីភ្នំពេញ។ មរណភាពរបស់ឧបាសិកា ជា យឺន គឺជាការបាត់បង់នូវមាតាក្មេក មាតាបង្កើត ជីដូន និងជីទួតជាទី គោរពស្រឡាញ់ដ៏ជ្រាលជ្រៅរបស់ឯកឧត្ដម និងលោកជំទាវ ព្រមទាំងក្រុមគ្រួសារ ដែលកន្លងមក ឧបាសិកាតែងតែបានខិតខំអស់ពីកម្លាំងកាយចិត្ត និងប្រាជ្ញាស្មារតី ដើម្បីចិញ្ចឹមបីបាច់ថែរក្សា និងអប់រំទូន្មានបុត្រធីតា និងចៅៗឱ្យប្រកបដោយគន្លងធម៌រហូតក្លាយជាបញ្ញាវន្ត និងជាថ្នាក់ដឹកនាំនៅតាម ក្រសួងស្ថាប័នជាតិផងដែរ។ ឯកឧត្តមរដ្ឋលេខាធិការ សួន រចនា ព្រមទាំងគណៈប្រតិភូតំណាងឱ្យថ្នាក់ដឹកនាំ មន្ត្រីរាជការ បុគ្គលិក និងកម្មករនៃក្រសួងសាធារណការ និងដឹកជញ្ជូន បានសម្តែងនូវការចូលរួមរំលែកនូវមរណទុក្ខដ៏ក្រៀមក្រំជាទីបំផុតជាមួយឯកឧត្ដមអនុរដ្ឋលេខាធិការ ជួប សុភក្ដិ និងលោកជំទាវ ព្រមទាំងក្រុមគ្រួសារដោយសេចក្ដីសង្វេគជាទីបំផុត និងបានលំឱនកាយវាចាចិត្តឧទ្ទិសបួងសួងដល់ដួងវិញ្ញាណក្ខន្ធរបស់ឧបាសិកា ជា យឺន សូមបានសោយសុខក្នុងសុគតិភពកុំបីឃ្លៀងឃ្លាតឡើយ។ ជាមួយគ្នានោះផងដែរ ឯកឧត្ដមរដ្ឋលេខាធិការ និងគណៈប្រតិភូបាននាំយកនូវបច្ច័យផ្ទាល់ពីឯកឧត្ដម ទេសរដ្ឋមន្ត្រីចំនួន១.០០០ដុល្លារសហរដ្ឋអាមេរិក និងថវិការបស់ក្រសួងចំនួន ៥.០០០.០០០ រៀល ដើម្បីចូលបច្ច័យបុណ្យសពផងដែរ៕