(ភ្នំពេញ) ៖ នៅព្រឹកថ្ងៃទី០៣ ខែវិច្ឆិកា ឆ្នាំ២០២០នេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាននាំយកម៉ាស៊ីនផលិតទឹកបរិសុទ្ធ ដោយបរិយាកាស១គ្រឿង WATERGEN ( ប្រភេទ GEN-M ) ដែលជាអំណោយរបស់​សម្តេចតេជោ ហ៊ុន សែន ប្រគល់ជូនដល់មន្ទីពេទ្យមិត្តភាពខ្មែរ-សូវៀត។ ពិធីប្រគល់-ទទួលនេះបានធ្វើឡើងនៅមន្ទីមិត្តភាពខ្មែរ-សូវៀត ក្រោមវត្តមានឯកឧត្តមទេសរដ្ឋមន្ត្រី ស៊ុន ចាន់ថុលនិងលោក​​សាស្ត្រាចារ្យ ងី ម៉េង នាយកមន្ទីរពេទ្យមិត្ត​ភាពខ្មែរ-សូវៀត ។ នៅក្នុងឳកាសដែរអញ្ជើញប្រគល់នោះដែរ ឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងថា៖ ម៉ាស៊ីនផលិតទឹកបរិសុទ្ធដោយបរិយាកាស១គ្រឿង ដែលបានប្រគល់នៅ​ពេលនេះជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដើម្បីផ្តល់ជូនប្រជាពលរដ្ឋប្រើប្រាស់ក្នុងកំឡុងពេលនាំកូនចៅ មកទទួលសេវាព្យាបាល នៅក្នុងមន្ទីមិត្តភាពខ្មែរ-សូវៀត ដើម្បីកាត់បន្ថយការយកមកនូវទឹកបរិសុទ្ធមកតាមខ្លួន និងដើម្បីកាត់បន្ថយផលប៉ះពាល់ដល់បរិស្ថានផងដែរ។ ឯកឧត្តមទេសរដ្ឋមន្ត្រី បានបន្ថែមទៀតថា៖ ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ-WATERGEN (ប្រភេទ GEN-M) គឺជាបច្ចេកវិទ្យារបស់ប្រទេសអ៊ីស្រាអែល ហើយមានសមត្ថភាព ផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស បានប្រមាណ៨០០លីត្រក្នុងមួយថ្ងៃ ប្រកបដោយគុណភាព និងសុវត្ថិភាពខ្ពស់។ ម៉ាស៊ីនផលិតទឹកសុទ្ធនេះ គឺទាញយក​ខ្យល់ក្នុងបរិយាកាសមកផលិតជាទឹកបរិសុទ្ធតែម្តង ហើយជាម៉ាស៊ីនផលិតទឹកបរិសុទ្ធដោយបរិយាកាស WATERGEN ( ប្រភេទGEN-M ) ទី៤ហើយ ដែលបានប្រគល់ជូនមន្ទី ពេទ្យធំៗក្នុងរាជធានីភ្នំពេញ ហើយម៉ាស៊ីនផលិតទឹកបរិសុទ្ធដោយ​បរិយាកាសទី៥, ១គ្រឿងទៀត នឹងត្រូវប្រគល់ជូនមន្ទីពេទ្យព្រះកុសុមៈក្នុងពេល ឆាប់ៗនេះផងដែរ។ សូមបញ្ជាក់ជូនថា៖ ម៉ាស៊ីនផលិតទឹកបរិសុទ្ធ ដោយបរិយាកាស៥គ្រឿង WATERGEN ( ប្រភេទ GEN-M ) ចំនួន៥គ្រឿង ត្រូវបានសម្តេចតេជោ ហ៊ុន សែន នាយករដ្ឋមន្ត្រីកម្ពុជាផ្តល់ដាក់នៅតាមមន្ទីរពេទ្យ និងកាកបាទក្រហមកម្ពុជា ដើម្បីឱ្យប្រជាពលរដ្ឋប្រើប្រាស់៕