តាម​របាយការណ៍​របស់​អាជ្ញាធរ​ខេត្ត​សៀមរាប លើ​ការ​ងារ​ចុះ​វាស់វែង​គម្រោង​ស្ថាបនា​ផ្លូវ​ទាំង ៣៨ ខ្សែ​ក្នុង​ក្រុង​សៀមរាប មក​ដល់​ពេល​នេះ​សម្រេច​បាន ៧ ខ្សែ ហើយ​​ក្រុម​ការងារ​ចម្រុះ​កំពុង​សម្រុក​​បញ្ចប់​ឲ្យ​រួច​រាល់​​ទាំង​ស្រុង អាច​ឈាន​ទៅ​បើក​ការដ្ឋាន​នៅ​ពេល​ខាង​មុខ។ គួរ​បញ្ជាក់​ថា រដ្ឋបាលខេត្តសៀមរាប បានរៀបចំបង្កើតក្រុមការងារចំនួន ០៦ក្រុម ដើម្បីចុះវាស់វែង និងរុះរើសំណង់ នៃគម្រោងស្ថាបនាហេដ្ឋារចនាសម្ព័ន្ធផ្លូវ ចំនួន ៣៨ខ្សែ នៅក្នុងក្រុងសៀមរាប។ គិតត្រឹមថ្ងៃទី២៦ ខែកញ្ញា ឆ្នាំ២០២០ ផ្លូវ​ដែលវាស់វែងរួច​ សរុបបាន​ចំនួន០៧ ខ្សែ ( WN-01, WS-06, WN-03,AD-02, AD-03, AD-06, AD-19)។ រដ្ឋបាលខេត្ត​សៀមរាប សម្តែង​ការ​កោតសរសើរ ចំពោះបងប្អូនប្រជាពលរដ្ឋដែលរងផលប៉ះពាល់ពីការសាងសង់ផ្លូវនេះ ដែលបានស្ម័គ្រចិត្តរុះរើនូវសំណង់ តូប ឬរបង។ រដ្ឋបាលខេត្តសង្ឃឹមថា ការ​ងារ​នឹង​បន្តរហូតដល់ផ្លូវទាំង៣៨ខ្សែ ​រួចរាល់តាមផែនការ អាច​ឈាន​ទៅ​​បើកការដ្ឋាន​ដើម្បីបម្រើដល់ផលប្រយោជន៍សាធារណៈ ឬប្រជាជនក្នុងខេត្ត៕