[Swift news daily] - ស្ពានកោះពស់ បើកចរាចរណ៍ជាសាធារណៈឲ្យប្រជាពលរដ្ឋចេញ-ចូល ចាប់ពីថ្ងៃទី១០សីហាតទៅ
2020-08-13
Go to the website published Swift news daily
(ខេត្តព្រះសីហនុ)៖ ក្នុងលិខិត ជម្រាបជូននាយកក្រុមហ៊ុនកោះពស់ ( ខេមបូឌា ) អ៊ិនវេសមិន គ្រុន អិលធីឌី ចុះថ្ងៃទី១០ ខែសីហា ឆ្នាំ២០២០ ឯកឧត្តម គួច ចំរើន អភិបាលខេត្តព្រះសីហនុ បានលើកឡើងថា ក្នុងដំណើរការរៀបចំហេដ្ឋារចនាសម្ព័ន្ធ នៅក្នុងខេត្ត សម្រាប់បម្រើវិស័យទេសចរណ៍ រដ្ឋបាលខេត្ត បាន និងកំពុងស្ថាបនាហេដ្ឋារចនាសម្ព័ន្ធផ្លូវក្រុង ចំនួន ៣៤ខ្សែ ជិតរួចរាល់ជាស្ថាពរ ទៅតាមផែនការ និងបានរៀបចំកែលម្អ បើកលំហរឆ្នេរសមុទ្រ សម្រាប់ប្រជាពលរដ្ឋ បានសម្រាកកម្សាន្ត ដោយសេរី ដែលពីមុននៅតំបន់ឆ្នេរខ្លះ បិទបាំង និងហាមឃាត់ការចេញចូល ជាសាធារណៈ។
ក្នុងន័យនេះ ឯកឧត្តមអភិបាលខេត្តព្រះសីហនុ លើកឡើងថា ស្ពានកោះពស់ ក៏បានបិទច្រកទ្វារ មិនអនុញ្ញាតឲ្យប្រជាពលរដ្ឋ ធ្វើដំណើរឆ្លងកាត់អស់រយៈពេលជាច្រើនឆ្នាំមកហើយ ដែលធ្វើឲ្យសាធារណជន មានការថ្នាំងថ្នាក់ និងមិនពេញចិត្តមកលើរដ្ឋបាលខេត្ត។ ហេតុដូច្នេះ ដើម្បីឆ្លើយតបនូវតម្រូវការរបស់ប្រជាពលរដ្ឋ និងបង្កើនតំបន់ទេសចរណ៍ឲ្យបានច្រើនសម្រាប់ទាក់ទាញភ្ញៀវទេសចរ មកកម្សាន្តនៅខេត្តព្រះសីហនុ ឲ្យបានច្រើនកុះករ រដ្ឋបាលខេត្តព្រះសីហនុ ស្នើដល់លោកនាយក បើកចរាចរណ៍ ជាសាធារណៈ នៅលើស្ពានកោះពស់ សម្រាប់សាធារណជនចេញ-ចូល ចាប់ពីថ្ងៃទទួលបានសេចក្តីជូនដំណឹងនេះតទៅ។
ស្ពានតេជោមរតក ឬស្ពានកោះពស់ ឆ្លងដៃសមុទ្រ មានប្រវែង ៩០០ម៉ែត្រ កម្ពស់ ៣២ម៉ែត្រ និងទទឹង ១២ម៉ែត្រ ចំណាយថវិកាសាងសង់ ២០លានអឺរ៉ូ។ ស្ពានេះ ត្រូវបានបើកសម្ពោធ កាលពីថ្ងៃទី១២ ខែធ្នូ ឆ្នាំ២០១២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន។ នៅពេលមានបុណ្យទានធំៗ ដូចជា បុណ្យចូលឆ្នាំ ជាដើម ស្ពាននេះ បានបើកឲ្យប្រជាពលរដ្ឋឆ្លងកាត់ តែចប់បុណ្យ គឺត្រូវបិទរហូត៕
