[Swift news daily] - ទីលានចាក់សំរាម ក្នុងខេត្តព្រះសីហនុ ចាប់ផ្តើមសាងសង់ កាលពីថ្ងៃទី១កក្កដា ដោយប្រើថវិកាជាតិ ជាង ៥លានដុល្លារ
2020-07-23
Go to the website published Swift news daily
(ភ្នំពេញ)៖ គម្រោងសាងសង់ទីលានចាក់សំរាម ក្នុងខេត្តព្រះសីហនុ បានចាប់ផ្តើម កាលពីថ្ងៃទី០១ ខែកក្កដា ឆ្នាំ២០២០ ដោយប្រើប្រាស់ថវិកាជាតិ ចំនួន ៥.៣១៣.៤៦៣ ដុល្លារអាមេរិក។ គម្រោងសាងសង់ទីលានចាក់សំរាមនេះ អនុវត្តដោយក្រុមហ៊ុន ហេង សម្បត្តិ អាហរ័ណ នីហរ័ណ មានរយៈពេលសាងសង់ ១៧ខែ គិតចាប់ពីថ្ងៃទី០១ ខែកក្កដា ឆ្នាំ២០២០ លើផ្ទៃដី ១៧,៣៣ហិកតា លើផ្ទៃដីសរុប ៥១ ហិកតា ដែល រដ្ឋបាលខេត្តព្រះសីហនុ ផ្តល់ជូន ឋិតនៅភូមិអូតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងមានចម្ងាយប្រមាណ ៣គីឡូម៉ែត្រ ពីផ្លូវជាតិលេខ៤។
កិច្ចប្រជុំពិភាក្សាអំពីវឌ្ឍនភាពអនុគម្រោងសាងសង់ទីលានចាក់សំរាម ក្នុងខេត្តព្រះសីហនុ ដោយប្រើប្រាស់ថវិកាជាតិនេះ បានធ្វើឡើង កាលពីថ្ងៃទី២១ ខែកក្កដា ឆ្នាំ២០២០ នៅទីស្តីការក្រសួងសាធារណការ និងដឹកជញ្ជូន ក្រោមអធិបតីភាពឯកឧត្ដម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន ដោយមានការចូលរួមពីសមាជិក សមាជិកានៃគណៈកម្មការគ្រប់គ្រងការងារអនុគម្រោងសាងសង់ទីលានចាក់សំរាម របស់ក្រសួងសាធារណការ និងដឹកជញ្ជូន។
ក្រសួងសាធារណការ និងដឹកជញ្ជូន បានប្រកាសថា គម្រោងទីលានចាក់សំរាមថ្មីនេះ សាងសង់ឡើង ដើម្បីបំពេញតម្រូវការរយៈពេល ៥ឆ្នាំដំបូង មានសមត្ថភាព អាចផ្ទុកសំរាមបានចំនួន ៨៨៤.០៨៨ ម៉ែត្រគូប មានរណ្ដៅចំនួនបួន រណ្ដៅនិមួយៗ មានទទឹងគិតជាមធ្យម ១៣០ ម៉ែត្រ និងបណ្ដោយ ១៥០ម៉ែត្រ ជម្រៅចាប់ពី ២-៤ម៉ែត្រ មានប្រព័ន្ធរំដោះទឹកភ្លៀង ចាប់ពីបាតរណ្ដៅ ប្រព័ន្ធប្រមូលទឹកកខ្វក់ពីរណ្ដៅចាក់សំរាម បំពង់បញ្ចេញឧស្ម័នពុលផងដែរ។
ក្រសួងសាធារណការ និងដឹកជញ្ជូន បានបញ្ជាក់ថា រាជរដ្ឋាភិបាល បានសម្រេចបញ្ចេញកញ្ចប់ថវិការបស់ខ្លួន ដើម្បីលើកកម្ពស់សមត្ថភាពគ្រប់គ្រងសំរាម និងអនាម័យជូនប្រជាពលរដ្ឋ និងធ្វើឱ្យសុខមាលភាពសាធារណៈ និងបរិស្ថាន កាន់តែមានភាពប្រសើរឡើង ឆ្លើយតបទៅនឹងការរីកចម្រើនយ៉ាងឆាប់រហ័ស នៅក្នុងខេត្តជាប់មាត់សមុទ្រនេះ៕
