ភ្នំពេញ ថ្ងៃទី០៩ ខែ​កក្កដា ឆ្នាំ​២០២០–ឯកឧត្តម ឈួន វ៉ន់ អគ្គនាយក នៃអគ្គនាយក ដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំត្រៀមសម្រាប់កិច្ចប្រជុំពិសេសរវាងរដ្ឋមន្ត្រី ដឹកជញ្ជូនអាស៊ាន-ចិន តាមប្រព័ន្ធវីដេអូពីចម្ងាយ (Video Conference) ស្ដីពីវិធានការប្រយុទ្ធប្រឆាំងមេរោគកូវីដ-១៩ ក្នុងវិស័យដឹកជញ្ជូន ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធ កាលពីថ្ងៃពុធ ៣រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៨ ខែកក្កដា ឆ្នាំ២០២០ នៅទីស្ដីការក្រសួងសាធារណការ និង​ដឹកជញ្ជូន។ កិច្ចប្រជុំនេះផ្តោតជាសំខាន់លើការរៀបចំសម្ភារបច្ចេកវិទ្យា និងគ្រឿងបរិក្ខារផ្សេងៗរួមមានដូចជា៖ ការធ្វើតេស្តលើកម្មវិធីដែលត្រូវប្រើប្រាស់ (App) កាមេរ៉ាចាប់រូបភាពពីចម្ងាយ បណ្តាញខ្សែតភ្ជាប់ កំព្យូទ័រ ម៉ាយក្រូហ្វូន ជាពិសេសបណ្តាញអ៊ីនទ័រណែតល្បឿនលឿនប្រកបដោយស្ថិរភាព និងការរៀបចំទង់ជាតិតំណាងកម្ពុជាជាដើម។នៅក្នុងឱកាសនោះ ឯកឧត្តមអគ្គនាយក បានណែនាំឱ្យនាយកដ្ឋានទទួលបន្ទុកមានភារកិច្ចរៀបចំតុសម្រាប់គណៈប្រតិភូ ទង់ជាតិ ឈ្មោះប្រទេស បដាខាងក្រោយ ការធ្វើតេស្តកម្មវិធីដែលត្រូវប្រើប្រាស់ ការត្រៀមរៀបចំសម្ភារ និងគ្រឿងបរិក្ខារផ្សេងៗទៀតឱ្យបានចប់សព្វគ្រប់ សំដៅសម្រួលដល់ ដំណើរការនៃកិច្ចប្រជុំនេះឱ្យប្រព្រឹត្តទៅដោយរលូន និងប្រសិទ្ធភាពខ្ពស់បំផុត។ សូមបញ្ជាក់ថា ដោយសារការរីករាលដាលជាសកលនៃមេរោគកូវីដ-១៩ នៅទូទាំងពិភពលោក ក្នុងនោះរួមមានកម្ពុជាផងដែរ កិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន-ចិន ស្ដីពីវិធានការប្រយុទ្ធប្រឆាំងនឹងមេរោគកូវីដ-១៩ ក្នុងវិស័យដឹកជញ្ជូន គ្រោងនឹងរៀបចំឡើងតាមរយៈប្រព័ន្ធវីដេអូពីចម្ងាយនៅថ្ងៃទី១៦ ខែកក្កដា ឆ្នាំ២០២០ ដោយមានការចូលរួមពីរដ្ឋមន្ត្រីដឹកជញ្ជូនអាស៊ានទាំងដប់ រួមជាមួយរដ្ឋមន្រ្តីដឹកជញ្ជូន នៃសាធារណរដ្ឋប្រជាមានិតចិនផងដែរ ៕