[Raksmey News] - គម្រោងធ្វើឱ្យល្អប្រសើរឡើងផ្លូវជាតិលេខ៣ តភ្ជាប់ពីភ្នំពេញ ទៅខេត្តកំពត មកទល់បច្ចុប្បន្នសម្រេចបានជាង៦៩ភាគរយ
2020-05-08
Go to the website published Raksmey News
ដោយ: សុផល / ភ្នំពេញ: គម្រោងពង្រីក និងលើកកម្រិតគុណភាពផ្លូវជាតិលេខ៣ តភ្ជាប់រាជធានីភ្នំពេញ ទៅខេត្តកំពត សម្រេចបានជាង ៦៩ភាគរយហើយ គិតត្រឹមដើមខែឧសភា ឆ្នាំ២០២០នេះ ហើយគ្រោងនឹងបញ្ចប់ការសាងសង់នៅក្នុងឆ្នាំ២០២២ ខាងមុខ។នេះបើយោងតាមលោក ហ៊ាង សុទ្ធាយុទ្ធ អ្នកនាំពាក្យក្រសួងសាធារណការ និងដឹកជញ្ជូន។
លោក ហ៊ាង សុទ្ធាយុទ្ធ បានឱ្យរស្មីកម្ពុជាដឹងថា៖ផ្លូវនេះមានប្រវែង១៣៤,៨២៦ គីឡូម៉ែត្រ ដោយក្រាលបេតុងកៅស៊ូ (AC)និងបានបើកការដ្ឋានសាងសង់នៅថ្ងៃទី ១៧ ខែ តុលា ឆ្នាំ ២០១៨ និងគ្រោងបញ្ចប់ នៅថ្ងៃទី១៦ ខែ តុលា ឆ្នាំ២០២២ ដោយប្រើ រយៈពេល ៤៨ ខែ។
គម្រោងនេះចំណាយថវិកាប្រមាណជាង ២១៥លាន ដុល្លារអាម៉េរិកក្រោម ហិរញ្ញប្បទានសម្បទាន ពីរដ្ឋាភិបាលចិន រួម ជាមួយ ថវិកាបដិភាគរបស់ រាជរដ្ឋាភិបាលកម្ពុជា។
កំណាត់ផ្លូវជាតិលេខ៣ (ភ្នំពេញ-កំពត) មានប្រវែងសរុប១៣៤,៧៩៦គីឡូម៉ែត្រ ដោយក្នុងនោះ ប្រវែង៦៩គីឡូម៉ែត្រ ចាប់ពីចោមចៅដល់បែកគុស ត្រូវសាងសង់ជាផ្លូវ ៤គន្លង(២ទៅ២មក)សួនច្បារកណ្តាល ទទឹង២៤.៥ម និងចាប់ពីបែកគូស ដល់ទីរួមខេត្តកំពត ប្រវែង ៦៥,៧៩៦ គីឡូម៉ែត្រ ត្រូវសាងសង់ជាផ្លូវ ២គន្លង(១ទៅ១មក ទទឹង១២ម៉ែត្រ) ដោយក្រាលបេតុងកៅស៊ូ (AC 70mm)។
ពេលកែលម្អរួចរាល់ហើយ ផ្លូវនេះនឹងចូលរួមចំណែកច្រើនដល់ការធ្វើដំណើររបស់ប្រជាពលរដ្ឋ ការដឹកជញ្ជូនទំនិញផលិតផល ពិសេសការដឹកជញ្ជូនអំបិលពីខេត្តកំពតទៅកាន់ខេត្តផ្សេងៗ និងសម្រាប់វិស័យទេសចរណ៍ធ្វើដំណើរទៅកាន់ភូមិភាគទិសនិរតីនៃតំបន់សមុទ្រកម្ពុជាផងដែរ។
លោក ស៊ុន ចាន់ថុល ទេសរដ្ឋមន្ត្រីនិងជារដ្ឋមន្ត្រីក្រសួងសាធារណការនិងដឹកជញ្ចូន ធ្លាប់បានបញ្ជាក់អំពីសារប្រយោជន៍នៃកំណាត់ផ្លូវនេះថា “នៅពេលដែលផ្លូវជាតិលេខ៣នេះ បានសាងសង់រួច បងប្អូនប្រជាពលរដ្ឋធ្វើដំណើរនឹងចំណេញពេលវេលា និងកាត់បន្ថយការចំណាយផ្សេងៗបានច្រើន។ តាមរយៈផ្លូវជាតិលេខ៣នេះ បើមានបងប្អូនប្រជាពលរដ្ឋចង់ធ្វើដំណើរទៅលេងកំពង់សោម ក៏អាចធ្វើដំណើររតាមផ្លូវជាតិនេះបានផងដែរ។ ហើយចំពោះបងប្អូនប្រជាពលរដ្ឋប្រកបមុខរបរតាមផ្លូវជាតិលេខ៣ ក៏កាន់តែងាយស្រួលរកចំណូលបានច្រើនថែមទៀត”។
គេសង្កេតឃើញថា ទោះបីជាបញ្ហាជំងឺកូវីដ១៩កំពុងរាតត្បាតក៏ដោយ ក៏សកម្មភាពសាងសង់កំណាត់ផ្លូវជាតិលេខ៣នេះនៅតែបន្ត។ ទោះយ៉ាងណាក្តី ក្រសួងសាធារណការ និងដឹកជញ្ជូនបានស្នើសូមប្រជាពលរដ្ឋមេត្តាអធ្យាស្រ័យចំពោះផលប៉ះពាល់និងការរំខាននានា ដែលកើតឡើងអំឡុងសាងសង់នេះ។ ក្រសួងនឹង យកចិត្តទុកដាក់តាមដាន និងជំរុញឱ្យក្រុមហ៊ុនសាងសង់ ធ្វើការស្រោចទឹកលើដងផ្លូវជាប្រចាំ ជាពិសេសក្នុងតំបន់ទីប្រជុំជន ដើម្បីកាត់បន្ថយផលប៉ះពាល់ (ដីហុយ) ទៅលើបរិស្ថាន និងសុខភាព”៕ ល/Ha
