ភ្នំពេញ ថ្ងៃទី០៧ ខែ​មេសា ឆ្នាំ​២០២០ -- ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បានជំរុញឱ្យ​មន្ត្រី​ក្រោម​ឱវាទក្នុងការ​ចូលរួមបំពេញកម្រង​សំណួរទាក់ទងនឹងរោគសញ្ញាមេរោគកូវីដ-១៩ ឱ្យបានជាប្រចាំ និងរៀងរាល់ពេលព្រឹកមុនពេលចូលបំពេញការងារ ដើម្បីតា​មដានសុខភាពរបស់មន្ត្រីប្រចាំថ្ងៃ និង​ចាត់វិធានការ​បានទាន់ពេលវេលា​ ក្នុង​ករណី​មាន​​រោគសញ្ញាសង្ស័យ។​ ថ្លែងក្នុង​ឱកាស​នៃ​កិច្ច​ប្រជុំផ្ទៃក្នុង​ថ្នាក់ដឹកនាំក្រសួង​ កាលពី​ថ្ងៃចន្ទ ១៤កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៦ ខែមេសា ឆ្នាំ២០២០ នៅទីស្ដីការក្រសួងសាធារណការនិង​ដឹកជញ្ជូន ឯកឧត្ដមទេសរដ្ឋមន្ត្រីបាន​គូសបញ្ជាក់ថា ទម្រង់តាមដាន និងរាយការណ៍សុខភាពមន្ត្រីប្រចាំថ្ងៃ គឺជាកម្រងសំណួរតាមឌីជីថល ដែលបង្កើតឡើង ដើម្បីតាមដានសុខភាពប្រចាំថ្ងៃរបស់មន្ត្រីទាក់ទងនឹងរោគសញ្ញាជំងឺកូវីដ-១៩មានលក្ខណៈងាយស្រួល និងអាចឱ្យមន្ត្រីរាជការក្រសួង ចំណាយពេលវេលាបំពេញប្រហែល១នាទីប៉ុណ្ណោះ។ ទន្ទឹមនឹងនេះ ឯកឧត្តមទេសរដ្ឋមន្ត្រី​បានសង្កត់ធ្ងន់ថា ជំងឺកូវីដ-១៩ គឺជាជំងឺដ៏កាចសាហាវ បច្ចុប្បន្នមានមនុស្សជាងមួយលាននាក់បានឆ្លងមេរោគនេះ និងបណ្ដាលឱ្យស្លាប់រាប់ម៉ឺននាក់ ហើយកំពុងរាតត្បាតពាសពេញពិភពលោក រួមទាំងកម្ពុជាផងដែរ។​​ ឯកឧត្ដមទេសរដ្ឋមន្ត្រី បានផ្ដាំផ្ញើឱ្យមន្ត្រីទាំងអស់ថែរក្សាសុខភាពផ្ទាល់ខ្លួនឱ្យបានល្អ ដោយលាងដៃនឹងសាប៊ូ ឬអាល់កុល ពាក់ម៉ាស់ឱ្យបានត្រឹមត្រូវ និងរក្សាគម្លាតចន្លោះពីមួយម៉ែត្រ ទៅពីរម៉ែត្រក្នុងការប្រាស្រ័យទាក់ទងគ្នាប្រចាំថ្ងៃ ជាពិសេសត្រូវស្នាក់នៅផ្ទះ និងចេញទៅក្រៅក្នុងករណីចាំបាច់ប៉ុណ្ណោះត្រូវតែពាក់ម៉ាស់ឱ្យបានត្រឹមត្រូវ ។​ ជាមួយគ្នានេះដែរ ឯកឧត្ដមទេសរដ្ឋមន្ត្រី បានកោតសរសើរចំពោះគំនិតច្នៃប្រឌិតរបស់មន្ត្រីនាយកដ្ឋានព័ត៌មានវិទ្យា និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន ដែលបានបង្កើតទម្រង់ឌីជីថល តាមដានសុខភាពនេះឡើង និងបានជំរុញលើកទឹកចិត្តឱ្យមន្ត្រីទាំងអស់ចូលរួមបំពេញកម្រងនេះ ។ សូមបញ្ជាក់ថា កិច្ច​ប្រជុំ​ផ្ទៃក្នុង​ត្រូវបាន​ធ្វើឡើង​ក្នុង​គោល​បំណង​ដើម្បី​ធ្វើបទបង្ហាញពីទម្រង់តាមដានសុខភាពមន្ត្រីរាជការរបស់ក្រសួង(ស្វែងរក និងកំណត់រោគសញ្ញាជំងឺកូវីដ-១៩) តាមប្រព័ន្ធអនឡាញ៕