កម្មវិធីហែលទឹក និងលេងបាល់បោះក្នុងទឹក សាកល្បង លេីកទី១ នៅអាងហែលទឹក ក្នុងកីឡដ្ឋាន ស្រុកកោះធំ ដែលទេីបសម្រេចការសាងសង់ ១០០% ក្រោមអធិបតីភាព ឯឧ.ទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួង សាធារណការ និង ដឹកជញ្ជូន ប្រធានសហព័ន្ធ កីឡា ហែល ទឹក កម្ពុជា និងជាប្រធានក្រុម ការងារថ្នាក់ជាតិ ចុះជួយស្រុកកោះធំ --- ថ្ងៃអាទិត្យ ១៥កើត ខែផល្គុន ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៨ ខែមីនា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ប្រធានសហព័ន្ធ កីឡា ហែល ទឹក កម្ពុជា និងជាប្រធានក្រុមការងារថ្នាក់ជាតិចុះជួយស្រុកកោះធំ បានអញ្ជើញដឹកនាំគណៈប្រតិភូចុះពិនិត្យវឌ្ឍនភាពនៃការសាងសង់អាងហែលទឹកស្ថិតក្នុងបរិវេណកីឡដ្ឋានស្រុកកោះធំ ខេត្តកណ្ដាល ដែលរហូតមកទល់ពេលនេះសម្រេចការសាងសង់បាន១០០ភាគរយហើយ។ កម្មវិធីនេះមានសមាសភាពចូលរួមពីឯកឧត្តម លោកជំទាវ លោក លោកស្រីសមាជិកសមាជិកាក្រុមការងារថ្នាក់កណ្ដាលចុះជួយស្រុក-ឃុំ សមាជិកសមាជិកាគណៈអចិន្ត្រៃយ៍គណបក្សស្រុក គណៈកម្មការបក្សស្រុក ប្រធានគណបក្សឃុំ យុវជនស្រុក-ឃុំ លោកគ្រូអ្នកគ្រូនាយក នាយករង លោកគ្រូអ្នកគ្រូទទួលបន្ទុកការងារកីឡា និងកីឡាករកីឡាការិនីហែលទឹកមកពីរាជធានីភ្នំពេញសរុបទាំងអស់ប្រមាណ ២០០នាក់។ ជាមួយគ្នានោះផងដែរ កម្មវិធីនេះមានការរៀបចំឱ្យមានការប្រកួតហែលទឹក និងលេងបាល់ទឹកសាកល្បងលើកទីមួយ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី ដើម្បីជំរុញលើកទឹកចិត្ត និងបំផុសចលនាយុវជន យុវនារី សិស្សានុសិស្សក្នុងវិទ្យាល័យទាំងបួននៃស្រុកកោះធំឲ្យចូលរួមក្នុងវិស័យកីឡាដើម្បីលើកកម្ពស់សុខភាព ក៏ដូចជាស្វែងរកកីឡាករដែលមានសមត្ថភាពខ្ពស់អាចត្រៀមចូលរួមប្រកួតក្នុងព្រឹត្តិការណ៍កីឡាថ្នាក់ជាតិ និងអន្តរជាតិ។ ថ្លែងទៅកាន់ក្រុមអ្នកសារព័ត៌មាន ឯកឧត្តមទេសរដ្ឋមន្ត្រី បានគូសបញ្ជាក់អំពីសមិទ្ធផលសំខាន់ៗរបស់ស្រុកកោះធំរួមមានផ្លូវកៅស៊ូ ស្ពានឆ្លងទន្លេបាសាក់ ផ្លូវបេតុងខ្វាត់ខ្វែងឆ្លងកាត់ពីឃុំមួយទៅឃុំមួយពីភូមិមួយទៅភូមិមួយស្ទើរតែទាំងអស់ ប្រឡាយទឹក អណ្ដូងទឹក និងសាលារៀនជាដើម។ ទាក់ទងនឹងវិស័យកីឡាវិញ ឯកឧត្តមទេសរដ្ឋមន្ត្រីបានបន្ថែមថា ពីដើមកីឡដ្ឋានស្រុកកោះធំនេះជាដីលិចទឹក ប៉ុន្តែតាមរយៈកិច្ចខិតខំប្រឹងប្រែងរបស់រាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា បានសាងសង់កន្លែងបាល់ទាត់ បាល់បោះ បាល់ទះ ជាពិសេសអាងហែលទឹកខ្នាតអន្តរជាតិ ដែលអាចហ្វឹកហាត់កីឡាករកីឡាការិនីដើម្បីត្រៀមខ្លួនចូលរួមប្រកួតកីឡាស៊ីហ្គេមឆ្នាំ២០២៣ដែលកម្ពុជានឹងធ្វើជាម្ចាស់ផ្ទះ។ ជាមួយគ្នានេះផងដែរ ឯកឧត្តមទេសរដ្ឋមន្ត្រីបានគូសបញ្ជាក់អំពីសារសំខាន់នៃសុខសន្តិភាពក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានអំពាវនាវដល់បងប្អូនប្រជាពលរដ្ឋទាំងអស់ឱ្យរួបរួម សហការ សាមគ្គីភាពគ្នាជាធ្លុងមួយដើម្បីថែរក្សាសុខសន្តិភាព និងការពារបូរណភាពទឹកឲ្យបាន។ ឆ្លៀតក្នុងឱកាសនេះផងដែរ នៅក្នុងឱកាសទិវាសិទ្ធិនារី៨មីនាលើកទី១០៩នេះ ឯកឧត្តមទេសរដ្ឋមន្ត្រី បានសម្តែងនូវការអបអរសាទរ និងវាយតម្លៃខ្ពស់ចំពោះស្ត្រីក្រោមពាក្យខ្មែរថាមេដៃ មេជើង មេគយ មេជាង និងមេឃុំជាដើម ដែលបង្ហាញពីសារសំខាន់នៃតួនាទីរបស់ស្ត្រីនៅក្នុងសង្គម៕