ភ្នំពេញ៖ ថ្ងៃទី២១ ខែកុម្ភៈ ឆ្នាំ២០២០ នៅទីស្ដីការគណៈរដ្ឋមន្ត្រី ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញជាវាគ្មិនកិត្តិយសក្នុងវេទិកាសន្និសីទសារព័ត៌មានស្ដីពី វឌ្ឍនភាព និងទិសដៅការងារបន្តរបស់ក្រសួងសាធារណការ និងដឹកជញ្ជូន ដោយមានការចូលរួមពីសំណាក់ឯកឧត្ដម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា ថ្នាក់ដឹកនាំជាន់ខ្ពស់នៃក្រសួងសាធារណការ និងដឹកជញ្ជូន និងភ្នាក់ងារសារព័ត៌មានជាច្រើននាក់មកពីស្ថាប័នព័ត៌មានផ្សេងៗ។ ថ្លែងក្នុងវេទិកាសន្និសីទនេះ ឯកឧត្ដមទេសរដ្ឋមន្រ្តីបានជម្រាបជូនអំពីប្រវត្តិនៃការសាងសង់ហេដ្ឋារចនាសម្ព័ន្ធដឹកជញ្ជូននៅក្នុងព្រះរាជាណាចក្រកម្ពុជា អាស្រ័យលើថវិកាដែលមាន ពោលគឺហេដ្ឋារចនាសម្ព័ន្ធដឹកជញ្ជូនមួយចំនួនត្រូវបានស្ដារឡើងវិញបន្ទាប់ពីការការបោះឆ្នោតឆ្នាំ១៩៩៣ ជាប្រភេទផ្លូវ ពីរស្រទាប់ស្តើង (DBST) ក្នុងគោលបំណងតភ្ជាប់ពីតំបន់មួយទៅតំបន់មួយទៀតក្នុងផ្ទៃប្រទេស ដើម្បីជំរុញការដឹកជញ្ជូន ស្របតាមយុទ្ធសាស្ត្ររបស់រាជរដ្ឋាភិបាល។ ដោយឡែកបច្ចុប្បន្ននេះ ឯកឧត្ដមទេសរដ្ឋមន្ត្រីបានជម្រាបជូនថា ដោយសារសុខសន្តិភាព រាជរដ្ឋាភិបាលដែលមានសម្ដេចតេជោជាប្រមុខ បានធ្វើឱ្យសេដ្ឋកិច្ចជាតិមានកំណើនប្រកបដោយភាពរឹងមាំ ដែលនាំឱ្យមានកំណើនយានយន្ត វិនិយោគិន និងទេសចរផងដែរ កត្តានេះ ធ្វើឱ្យរាជរដ្ឋាភិបាលមានលទ្ធភាពធ្វើសមាហរណកម្មក្នុងតំបន់ ជាពិសេសផ្លូវជាតិទាំងអស់ត្រូវបាន និងកំពុងលើកកម្ពស់គុណភាពពី DBST ទៅបេតុងកៅស៊ូ (AC) និងពង្រីកពី២គន្លង ទៅ ៤គន្លង។ លើសពីនេះទៅទៀត ឯកឧត្ដមទេសរដ្ឋមន្ត្រីបានបន្តថា រាជរដ្ឋាភិបាលបាននឹងកំពុងសាងសាង់ផ្លូវល្បឿនលឿនពីភ្នំពេញទៅខេត្តព្រះសីហនុ និងកំពុងសិក្សាលើការសាងសង់ផ្លូវល្បឿនលឿនពីភ្នំពេញទៅបាវិត ដែលជាផ្លូវហាយវេអាស៊ានដ៏មានសក្ដានុពល ព្រមទាំងបន្តការសាងសង់ស្ពានឆ្លងទន្លេបន្ថែមទៀត តួយ៉ាងស្ពានស្ទឹងត្រង់ និងស្ពាននៅខេត្តក្រចេះជាដើម។ ជាមួយគ្នានោះផងដែរ ឯកឧត្ដមទេសរដ្ឋមន្ត្រីបានជម្រាបជូនថា រាជរដ្ឋាភិបាលបាននឹងកំពុងសាងសង់កំពង់ផែទឹកជ្រៅ ជម្រៅ ១៤,៥ម៉ែត្រ និងសិក្សាបន្ថែមលើការសាងសង់កំពង់ផែទឹកជ្រៅជម្រៅ១៧ម៉ែត្រ ទៅ១៧,៥ម៉ែត្រ ដែលត្រូវបានសិក្សាដោយទីភ្នាក់ងារសហប្រតិបត្តិការអន្តរជាតិជប៉ុន ដើម្បីអាចដឹកទំនិញត្រង់ទៅសហរដ្ឋអាមេរិក ពិសេសបាននឹងកំពុងជំរុញការដឹកជញ្ជូនតាមផ្លូវទឹក និងផ្លូវដែកនៅព្រះរាជាណាចក្រកម្ពុជាតាមរយៈការទាក់ទាញក្រុមហ៊ុននានាដើម្បីមកវិនិយោគក្នុងវិស័យនេះ។ ឯកឧត្ដមទេសរដ្ឋមន្ត្រីបានឱ្យដឹងទៀតថា ប្រព័ន្ធចម្រោះទឹកកខ្វក់ ត្រូវបានយកចិត្តទុកដាក់ ដែលរហូតមកទល់ពេលនេះក្រសួងបានអភិវឌ្ឍផែនការងារមេរួចរាល់ហើយនៅបណ្ដារាជធានី-ខេត្តមួយចំនួនដូចជា ខេត្តព្រះសីហនុ ភ្នំពេញ តាខ្មៅ ។ល។ និងកំពុងសិក្សាធ្វើផែនការមេតាមបណ្ដាខេត្តផ្សេងៗទៀត សំដៅរក្សាឱ្យបាននូវសោភណ្ឌភាព និងសុខមាលភាពជូនបងប្អូនប្រជាពលរដ្ឋ។ ឯកឧត្ដមទេសរដ្ឋមន្ត្រីបានគូសបញ្ជាក់ផងដែរអំពីការអភិវឌ្ឍប្រព័ន្ធចុះបញ្ជីអនឡាញ ការបង្កើតស្ថានីយឆៀក រថយន្តឆៀកចល័ត ការិយាល័យប្ដូរនិងពន្យាបណ្ណបើកបរនៅផ្សារទំនើបអ៊ីនអន១ និងអ៊ីអន២ កម្មវិធីសិក្សាច្បាប់ចរាចរណ៍ (Cambodia Driving Rules) កម្មវិធីថែទាំផ្លូវ (ROAD CARE Mobile App) សំដៅបម្រើសេវាសាធារណៈចាំបាច់ជូនប្រជាពលរដ្ឋឱ្យបានលឿន ឱ្យមានប្រសិទ្ធភាព និងមានតម្លាភាព ទប់ស្កាត់ការក្លែងបន្លំនានា ជំរុញការចូលរួមពីប្រជាពលរដ្ឋ និងបណ្ដុះស្មារតីភាពជាម្ចាស់លើហេដ្ឋារចនាសម្ព័ន្ធទាំងអស់។ ឯកឧត្ដមទេសរដ្ឋមន្រ្តីបានលើកឡើងថា យានដ្ឋានកែច្នៃយានយន្តដែលគ្មានអាជ្ញាប័ណ្ណត្រឹមត្រូវ ត្រូវបានបិទជាបន្តបន្ទាប់។ ចំណែករចនាសម្ព័ន្ធគ្រប់គ្រងស្ថានីយជញ្ជីងត្រូវបានរៀបចំឡើងវិញ ដើម្បីលុបបំបាត់ឱ្យបាននូវការដឹកជញ្ជូនលើសទម្ងន់កម្រិតកំណត់ដែលបណ្ដាលឱ្យផ្លូវឆាប់ខូច និងបង្កគ្រោះថ្នាក់ចរាចរណ៍ ដែលបានធ្វើឱ្យរដ្ឋខាតបង់ថវិកាជាតិ៣៥០លានដុល្លាក្នុងមួយឆ្នាំៗ។ ទន្ទឹមនឹងការអភិវឌ្ឍវិស័យសាធារណការ និងដឹកជញ្ជូន ឯកឧត្ដមទេសរដ្ឋមន្ត្រីបានឱ្យដឹងផងដែរថាក្រសួងបានរៀបចំប្រព័ន្ធឡូជីស្ទិក ព្រមទាំងបានបង្កើតផែនការមេជាតិភស្តុភារកម្ម ដើម្បីទាក់ទាញវិនិយោគទុនបរទេស ក៏ដូចជាសម្រួលដល់ការដឹកជញ្ជូនផលិផលនានារបស់បងប្អូនប្រជាពលរទៅកាន់ទីផ្សារក្នុងក្រុង និងក្រៅស្រុកផងដែរ។ ឯកឧត្ដមទេសរដ្ឋមន្ត្រីបានសង្កត់ធ្ងន់ថា ក្រសួងបានបង្កើតវិទ្យាស្ថានដើម្បីបណ្ដុះបណ្ដាលមន្ត្រីឱ្យមានសមត្ថភាពគ្រប់គ្រាន់ ក្នុងការពិសោធន៍ និងសាងសង់ផ្លូវថ្នល់ ស្ពាន និងហេដ្ឋារចនាសម្ព័ន្ធដឹកជញ្ជូននានាមានគុណភាពខ្ពស់ ព្រមទាំងបានអញ្ជើញអ្នកជំនាញនានាមកពីសាកលវិទ្យាល័យHarvard ក៏ដូចជាបញ្ជូនមន្ត្រីទៅសិក្សានៅប្រទេសក្រៅផងដែរ ដើម្បីបណ្ដុះបណ្ដាលជំនាញ និងភាពជាអ្នកដឹកនាំដល់មន្ត្រីទាំងនោះ ដែលជាទំពាំងស្នងឫស្សីរបស់ប្រទេសជាតិ។ ជាទីបញ្ចប់នៅក្នុងវេទិកាសន្និសីទសារព័ត៌មាននាឱកាសនោះ ឯកឧត្តមទេសរដ្ឋមន្ត្រីបានផ្ញើសារជូនដល់សាធារណៈជនតាមរយៈពាក្យស្លោកមួយឃ្លាថា សំដីអត់ប្រយោជន៍នាំគ្រោះដល់ជាតិ ការងារមានប្រសិទ្ធភាពនាំជាតិរុងរឿង៕