ភ្នំពេញ ៖ យ៉ាងហោចណាស់បុរសជាប្ដី បានបាត់បង់ជីវិត និងប្រពន្ធកូនរងរបួសធ្ងន់ ខណៈជិះម៉ូតូមួយគ្រឿង ត្រូវរថយន្តដឹកដីមកបុកពេញទំហឹង បោកផ្ទប់នឹងរថយន្តដឹកគ្រឿងចក្រ កាលពីវេលាម៉ោងប្រមាណ៨និង៤០នាទីព្រឹក ថ្ងៃទី០៦ ខែតុលា ឆ្នាំ២០១៩ នៅចំណុចរង្វង់មូលខាងលិច វិមានឈ្នះឈ្នះ តាមមហាវិថីឈ្នះឈ្នះ ក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ។ ជនរងគ្រោះមានទី១ឈ្មោះ ពុធ សុធារ៉ា ភេទប្រុស អាយុ៣៦ឆ្នាំ ជាបុគ្គលិកនៅសណ្ឋាគារសុខា (ជាប្ដីបានស្លាប់) ,២.ឈ្មោះ តេង រតនា ភេទស្រី អាយុ២៩ឆ្នាំ (ប្រពន្ធ) ,៣.ពុធ ស៊ីណារ៉ាត់ ភេទប្រុស អាយុ៧ឆ្នាំ និង៤.ឈ្មោះ ពុធ ស៊ុលីហ្សា អាយុឆ្នាំ៦ឆ្នាំ រងរបួសធ្ងន់ ។អ្នកទាំង៤នាក់ ជាឪពុកម្តាយនិងកូន ស្នាក់នៅភូមិខ្ទរសង្កាត់ព្រែកលៀប ខណ្ឌជ្រោយចង្វារ។ ក្រុមរងគ្រោះ ជិះម៉ូតូ១គ្រឿងម៉ាកស្កុបពី ពណ៌ស ពាក់ស្លាកលេខ ភ្នំពេញ1BK-2132 ។ តាមសមត្ថកិច្ចបានអោយដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តដឹកដី ម៉ាកហ៊ីយ៉ាន់ដាយ ពណ៌ស ដែលមានលេខសំគាល់ K.23 ពាក់ស្លាកលេខ ភ្នំពេញ3D-3351 ( អ្នកបើកបរបានរត់គេចខ្លួនបាត់) បានបើកជែង ហើយទៅបុកម៉ូតូម៉ាកស្តុបពី បោកផ្ទប់នឹងរថយន្តម៉ាកហ៊ីយ៉ាន់ដាយដឹកគ្រឿងចក្រ ពាក់ស្លាកលេខភ្នំពេញ3D-7972 ។ តាមសាក្សីបានអោយដឹងថា នៅមុនពេលកើតហេតុគេឃើញជនរងគ្រោះទាំង៤នាក់ ធ្វើដំណើរតាមមហាវិថីឈ្នះឈ្នះ ក្នុងទិសដៅពីកើតទៅលិច ស្របជាមួយរថយន្តដឹកគ្រឿងចក្រ លុះមកដល់ចំណុចកើតហេតុ ដែលជារង្វង់មូល រថយន្តក៏បានបង្អង់ល្បឿន ។ស្របពេលនោះ ស្រាប់តែរថយន្តដឹកដីបង្កបើកបរក្នុងល្បឿនលឿន ធ្វើដំណើរស្របគ្នា ក៏បានបើកជែងយានយន្ត នៅខាងក្រោយៗ ជ្រុលឡើងចិញ្ចើមផ្លូវកង់ម្ខាង ទៅបុកម៉ូតូជនរងគ្រោះ បោកផ្ទប់នឹងរថយន្តដឹកគ្រឿងចក្រតែម្តង ។ ភ្លាមៗ អ្នកបើកបរបានរត់គេចខ្លួនបាត់ ហើយក្រុមរងគ្រោះ ត្រូវបានបញ្ជូនសង្គ្រោះនៅមន្ទីរពេទ្យ ( ឳពុកម្ដាយនៅកាល់ម៉ែត រីឯក្មេងៗសង្រ្គោះនៅគន្ធបុប្ផា ) ប៉ុន្តែក្រោយមកឳពុកក៏បានផុតដង្ហើម ៕