រាជធានីភ្នំពេញ៖ យោងតាមប្រសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា មានស្ពាន៣ទៀត នឹងត្រូវសាងសង់ឆ្លងកាត់ទន្លេ ក្នុងមូលដ្ឋានរាជធានីភ្នំពេញ រួមមាន៖ ស្ពានមិត្តភាពកម្ពុជា-កូរ៉េ, ស្ពានតភ្ជាប់ផ្លូវល្បឿនលឿនភ្នំពេញ-បាវិត និងស្ពានឆ្លងទន្លេបាសាក់ តភ្ជាប់ពីព្រែកប្រា ទៅចាក់អង្រែ។ សម្តេចតេជោ ថ្លែងបែបនេះ ក្នុងពិធីសម្ពោធដាក់ឲ្យប្រើប្រាស់ ស្ពានបេតុងខ្សែកាប ឆ្លងទន្លេសាប និងស្ពានអាកាសឬស្សីកែវ ថ្ងៃទី៣១ ខែឧសភា ឆ្នាំ២០២៣។ សម្តេចតេជោ ហ៊ុន សែន បានមានប្រសាសន៍ថា៖ « សម្រាប់តំបន់របស់យើង ក្នុងទីក្រុងភ្នំពេញនេះ យើងត្រូវការស្ពាន ៣បន្ថែមទៀត ក្នុងនោះស្ពាន២ អាចចេញជារូបរាងក្នុងរយៈពេលឆាប់ៗ។ ស្ពានចំនួន ៣រួមមាន៖ ទី១.ស្ពានមិត្តភាពកម្ពុជា-កូរ៉េ និងស្ពានទី២. ស្ពានតភ្ជាប់ផ្លូវល្បឿនលឿនភ្នំពេញ-បាវិត នៅផ្នែកខាងក្រោម ដែលខ្ញុំមិនចង់ឱ្យប្រជាពលរដ្ឋ ត្រូវឆ្លងស្ពានពេលណា ត្រូវបង់លុយពេលនោះ នោះទេ ដូច្នេះបានជាយើងត្រូវចេញលុយធ្វើស្ពានតែម្ដង ដើម្បីបញ្ចៀសការបង់លុយពីប្រជាពលរដ្ឋ។ ស្ពានមួយទៀតដែលយើងត្រូវការ តាមទន្លេងបាសាក់របស់យើង គឺនៅម្ដុំចាក់អង្រែ ដែលតភ្ជាប់ពីព្រែកប្រា ទៅចាក់អង្រែ ៕ សូមទស្សនាវីដេអូលម្អិតដូចខាងក្រោម៖