ទីលានទុកដាក់សំរាម នៅខេត្តកែប ចំណាយថវិកាសាងសង់អស់ប្រមាណជាង១០លានដុល្លាសហរដ្ឋអាមេរិក នៅព្រឹកថ្ងៃទី៣០ ខែឧសភា ឆ្នាំ២០២៣ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដឹកនាំគណៈប្រតិភូក្រសួង អញ្ជើញក្នុងពិធីប្រគល់-ទទួល និងសម្ពោធដាក់ឱ្យប្រើប្រាស់ទីលានទុកដាក់សំរាម នៅខេត្តកែប នៃគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ ក្រោមកម្ចីឥណទានធនាគារអភិវឌ្ឍន៍អាស៊ី (ADB) ដោយមានការចូលរួមពីសំណាក់ ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប ថ្នាក់ដឹកនាំក្រសួង មន្ត្រីបច្ចេកទេសគម្រោង និងប្រពលរដ្ឋ ជាច្រើនរូប ស្ថិតនៅក្នុងភូមិដំណាក់ចង្អើរ ឃុំព្រៃធំ ក្រុងកែប ខេត្តកែប។ ទីលានទុកដាក់សំរាមថ្មីនេះ ត្រូវបានសាងសង់ឡើងមានចំនួន ៤រណ្ដៅ មានសមត្ថភាព ផ្ទុកសំរាមបានប្រមាណ ៦០០ ០០០ម៉ែត្រត្រីគុណ ក្នុងរយៈពេល ២០ឆ្នាំ និងត្រូវបានសាងសង់លើផ្ទៃដីទំហំ ១៤ហិកតា សម្រាប់បម្រើ សេចក្តីត្រូវការរបស់ប្រជាពលរដ្ឋក្នុងក្រុងកែប និងស្ទើរតែទាំងអស់នៃវិស័យទេសចរណ៍ ដូចជាភោជនីយដ្ឋាន សណ្ឋាគារ ផ្ទះសំណាក់ និងផ្សារ ទទួលបានសេវានេះ។ ទីលានទុកដាក់សំរាមនេះ ចំណាយថវិកាសាងសង់អស់ប្រមាណជា១០៧៦៩៥៣២ដុល្លាអាមេរិក។ផ្លូវចូលទីលានទុកដាក់សំរាមជាប្រភេទបេតុងសរសៃដែកប្រវែង ២ ៧០០ម៉ែត្រ ដោយ គិតចាប់ពីផ្លូវជាតិលេខ ៣៣ រហូតដល់ច្រកចូលទីលាន។ ផ្លូវនេះមានកម្រាស់បេតុង ចំនួន ០,២៥ម៉ែត្រ និងទទឹងផ្លូវប្រែប្រួលពី ៧ម៉ែត្រ ទៅ ៩ម៉ែត្រ ។ ផ្លូវក្នុងទីលាន ប្រភេទបេតុងសរសៃដែកកម្រាស់ ០,២៥ម៉ែត្រ ទទឹង ៦ម៉ែត្រ ប្រវែង ៨០០ម៉ែត្រ។ ប្រឡាយរំដោះទឹកភ្លៀងតាមបណ្ដោយផ្លូវចូលទីលានចំនួន ២ខ្សែ មានប្រវែងសរុប ៤ ០០០ម៉ែត្រ ធ្វើពីបេតុងកម្រាស់ ០,១២ម៉ែត្រ ដែលមានទទឹងបាតក្រោម ០,៥ម៉ែត និងជម្រៅប្រែប្រួលចាប់ពី ០,៦ម៉ែត្រ ទៅ ០,៨ម៉ែត្រ ។ ប្រឡាយរំដោះទឹកភ្លៀងក្នុងទីលានទុកដាក់សំរាម មានចំនួន ១ខ្សែ ប្រវែង ៥០០ម៉ែត្រ ធ្វើពីបេតុងកម្រាស់ ០,១២ម៉ែត្រ ដែលមានទទឹងបាតក្រោម ០,៥ម៉ែត្រ និងជម្រៅ ប្រែប្រួលចាប់ពី ០,៦ម៉ែត្រ ទៅ ០,៨ម៉ែត្រ។ រណ្ដៅទុកដាក់សំរាមចំនួន ៤រណ្ដៅ ដែលមានសមត្ថភាពអាចផ្ទុកសំរាមបានប្រមាណ ៦០០ ០០០ម៉ែត្រត្រីគុណ នៅបាតរណ្ដៅនីមួយៗ មានក្រាលកៅស៊ូសំយោគ (HDPE Liner) មួយស្រទាប់ និងក្រាល Geotextile មួយស្រទាប់ ដើម្បីការពារទឹក កខ្វក់ជ្រាបចូលទឹកក្រោមដី រួមទាំងប្រព័ន្ធរំដោះទឹកនៅបាតរណ្តៅផងដែរ។ ក្នុងទីលានទុកដាក់សំរាមនេះដែរ មានអាងស្តុកទឹករងៃ និងអាងប្រព្រឹត្តកម្មចំនួន ៦កន្លែង (Aeration 4 & Sedimentation 2) ទំហំ (៤០ម៉ែត្រ x ៣៦ម៉ែត្រ) ។ ស្ថានីយបូមទឹករងៃទំហំ (២ម៉ែត្រ x ២ម៉ែត្រ) ចំនួន ៤កន្លែង។ សំណង់ដីសើម (Wetland) ចំនួន ៦កន្លែង ទំហំប៉ុនៗគ្នា(៤០ម៉ែត្រ x ៣៦ម៉ែត្រ)។ ផ្ទះសន្តិសុខ ទំហំ (៣ម៉ែត្រ x ៣ម៉ែត្រ) ចំនួន ១កន្លែង។ អគាររដ្ឋបាល ទំហំ (១០ម៉ែត្រ x ២០ម៉ែត្រ) រួមទាំងសម្ភារបរិក្ខារ និងម៉ាស៊ីនត្រជាក់ ចំនួន ៥គ្រឿង។ កន្លែងចតរថយន្ត ទំហំ (១០ម៉ែត្រ x ២០ម៉ែត្រ) ចំនួន ១កន្លែង។ អគារញែកសំរាម ទំហំ (២០ម៉ែត្រ x ៣០ម៉ែត្រ) រួមទាំងសម្ភារៈបរិក្ខា និងម៉ាស៊ីន ត្រជាក់ចំនួន ១គ្រឿង។ អគារសម្រាប់ស្តុកសំណល់មានគ្រោះថ្នាក់ (Hazardous) ទំហំ (២០ម៉ែត្រ x ៣០ ម៉ែត្រ) ចំនួន ១កន្លែង។ រោងជាងសម្រាប់ជួសជុលគ្រឿងចក្រ ទំហំ (១០ម៉ែត្រ x ២០ម៉ែត្រ) រួមទាំងសម្ភារ បរិក្ខារ និងម៉ាស៊ីនត្រជាក់ចំនួន ៣គ្រឿង។ ជញ្ជីងសម្រាប់ថ្លឹងរថយន្តដឹកសំរាម មានប្រកដំបូល ដែលសមត្ថភាពទ្រទម្ងន់បាន ៦០តោន ធ្វើអំពីបន្ទះដែកទទឹង ៦ម៉ែត្រ និងបណ្តោយ ១៩ម៉ែត្រ ចំនួន ១កន្លែង។ កន្លែងលាងរថយន្ត រួមទាំងប្រព័ន្ធបាញ់លាងរថយន្តចំនួន ១កន្លែង និងរបងដែកកម្ពស់ ២,៥ម៉ែត្រ និងប្រវែង ៦០០ម៉ែត្រ។ ប្រព័ន្ធអគ្គិសនីតភ្ជាប់ពីបណ្តាញភ្លើងរដ្ឋ (EDC) មកក្នុងទីលាន។ នៅក្នុងឱកាសនេះ ឯកឧត្តមទេសរដ្ឋមន្រ្តី ស៊ុន ចាន់ថុល បានមាមប្រសាសន៍ថា ថ្ងៃនេះ ក្រសួងសាធារណការ និងដឹកជញ្ជូន នឹងប្រគល់នូវសមិទ្ធផល ថ្មីមួយទៀត គឺទីលានទុកដាក់សំរាមជូនទៅរដ្ឋបាលខេត្ត ដើម្បីគ្រប់គ្រង និងប្រតិបត្តិបន្ត ដើម្បីប្រើប្រាស់ជាប្រយោជន៍សាធារណៈសម្រាប់ប្រជាពលរដ្ឋក្នុងខេត្តកែប ប្រើប្រាស់ និងចូលរួមថែរក្សាការពារ សំដៅធ្វើយ៉ាងណាឱ្យហេដ្ឋារចនាសម្ព័ន្ធដែលយើងទទួលបាននេះ ស្ថិតស្ថេរ គង់វង្សយូរអង្វែងទៅអនាគត។ នៅក្នុងឱកាសនេះ ឯកឧត្តមទេសរដ្ឋមន្ត្រី បានមានប្រសាសន៍លើកឡើងថា ក្រោមការដឹកនាំប្រកបដោយភាពវៃឆ្លាត និងទស្សនវិស័យវែងឆ្ងាយ នៃរាជរដ្ឋាភិបាលដែលមាន សម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ខេត្តកែប មានភព្វសំណាងទទួលបាននៅសមិទ្ធិផលនានាជាច្រើន រួមមាន កំណាត់ផ្លូវជាតិលេខ៣ ត្រូវបានស្តារ និងពង្រីក ពី២គន្លងទៅ៤គន្លង ផ្លូវពីកំពតទៅវារិញ ផ្លូវលេខ៣១ពីបែកគុស ទៅដល់កំពង់ត្រាច ផ្លូវជាតិលេខ៣៣ ពីកែបមកកំពត។ជាមួយគ្នានេះ ផ្នែកឯកជនក៏បានបណ្តាក់ទុនបង្កើតផែពហុបំណងនៅខេត្តកំពត ដែលជាកំពង់ផែទឹកជ្រៅមួយទៀត បន្ទាប់ពីកំពុងផែខេត្តព្រះសីហនុ ។ទន្ទឹមនឹងនេះ គម្រោងដ៏សំខាន់មួយទៀតសម្រាប់ខេត្តកំពត គឺគម្រោងព្រែកជីក ហ្វូណនតេជោ ដែលជាព្រែកជីកប្រវត្តិសាស្រ្ត ដែលគណៈរដ្ឋមន្ត្រី បានអនុម័តលើការសិក្សាសមិទ្ធលទ្ធភាព។ នៅពេលគម្រោងទាំងខាងលើសាងសង់រួចរាល់ នឹងផ្តល់ឱកាសការងារដល់ប្រជាពលរដ្ឋ ដែលរស់នៅក្នុងខេត្តកែប និងខេត្តកំពត នេះផ្ទាល់តែម្តង។នៅក្នុងឱកាសនេះដែរ ឯកឧត្តមទេសរដ្ឋមន្រ្តី ស៊ុន ចាន់ថុល បានមានប្រសាសន៍បញ្ជាក់បន្តថា ទីលានទុកដាក់សំរាមនេះ ជាផ្នែកមួយ នៃការថែរក្សាសុខភាព សុខមាលភាពរបស់បងប្អូនប្រជាពលរដ្ឋយើង ជាពិេសសខេត្តកែប គឺជាតំបន់ទេសចរណ៍មួយដ៏សំខាន់ ដែលទាមទារឲ្យយើងត្រូវយកចិត្តទុកដាក់បន្ថែមទៀត លើអនាម័យ និងបរិស្ថាន ព្រមទាំងត្រូវមានទីលានទុកដាក់សំរាមមួយឲ្យបានត្រឹមត្រូវបំផុត៕