ការចុះជួសជុលថែទាំហេដ្ឋារចនាសម្ព័ន្ធផ្លូវថ្នល់-ស្ពាន លូ ដោយកៀរបង្ហាប់គ្រឹះ អ៊ុតកៅស៊ូ រោយថ្មម៉ិច លុបជង្ហុកសំបុកមាន់ គូសគំនូស-បំពាក់ផ្លាកសញ្ញាចរាចរណ៍ លើកំណាត់ផ្លូវជាច្រើនខ្សែ ទៅតាមលក្ខណៈបច្ចេកទេស ដើម្បីជួយសម្រួលការដឹកជញ្ជូនទំនិញឆ្លងកាត់ និងផ្តល់ភាពងាយស្រួលក្នុងការធ្វើដំណើរដល់បងប្អូនប្រជាពលរដ្ឋ គិតចាប់ពីថ្ងៃទី១១-២៥ ខែឧសភា ឆ្នាំ២០២៣ ក្រុមការងារបច្ចេកទេស នៃមន្ទីរសាធារណការ និងដឹកជញ្ជូន ខេត្តរតនគិរី កែប តាកែវ កំពង់ចាម បន្ទាយមានជ័យ ព្រះវិហារ បាត់ដំបង សៀមរាប ត្បូងឃ្មុំ ស្ទឹងត្រែង កណ្តាល និងប៉ៃលិនបានខិតខំប្រឹងប្រែងយកចិត្តទុកដាក់យ៉ាងសកម្ម ដោយបានចុះជួសជុលថែទាំ កៀរកិនបង្ហាប់ លុបសំបុកមាន់ អ៊ុតកៅស៊ូ (Reseal) រោយថ្មមុិចពង្រីកតួផ្លូវ អ៊ុតចិញ្ចើមផ្លូវ ថែទាំស្តារ-កាយដាក់ប្រព័ន្ធលូ អ៊ុតគំនូស-បំពាក់ផ្លាក បង្គោលសញ្ញាចរាចរណ៍ និងបានសម្អាតស្មៅ កូនរុក្ខជាតិតូចៗដុះតាមជាយសងខាងផ្លូវមាននៅលើកំណាត់ផ្លូវជាច្រើនខ្សែ រួមមាន៖ ផ្លូវជាតិលេខ៧៦ លេខ៧៨ លេខ៧៨-៥ លេខ៣៣A លេខ៣ លេខ៧០ លេខ៥ លេខ៥៦ លេខ៦២ លេខ៦៤ លេខ៥៧ លេខ៥៧B លេខ៥៧B១ លេខ៥៧B២ លេខ៥៧-៧ លេខ៥៩ លេខ៦ លេខ៦៧ លេខ៦៨ លេខ៧ លេខ៨ លេខ១១ លេខ៧២ លេខ៧៣ លេខ៩ ដើម្បីជួយសម្រួលដល់ការធ្វើដំណើរ របស់បងប្អូនប្រជាពលរដ្ឋ ផ្តល់ភាពងាយស្រួលក្នុងការដឹកជញ្ជូនទំនិញឆ្លងកាត់ និងចំណេញពេលវេលា។ ទន្ទឹមនឹងផ្លូវថ្នល់ស្អាតល្អ សូមបងប្អូនប្រជាពលរដ្ឋ កុំបំពានយកដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន ជៀសវាងការចាក់ដីខ្ពស់ជាងផ្លូវ និងកុំដឹកទំនិញលើសទម្ងន់ ដើម្បីរក្សាផ្លូវថ្នល់ឱ្យមានភាពល្អប្រសើរ និងអាចប្រើប្រាស់បានយូរអង្វែង។ ប្រសិនបើមានបញ្ហាផ្លូវថ្នល់ខូចខាតក្លាយជាជង្ហុកសំបុកមាន់ សូមបងប្អូនប្រជាពលរដ្ឋទាញយកកម្មវិធីថែទាំផ្លូវ (Road Care) និងរាយការណ៍មកក្រសួងដើម្បីអាចចាត់ក្រុមការងារចុះជួសជុល ថែទាំបានទាន់ពេលវេលា៕ ទាញយកកម្មវិធី តាមរយៈតំណភ្ជាប់ខាងក្រោម៖ - iOS: roadcare.mpwt.gov.kh - Android: roadcare.mpwt.gov.kh