ព្រះសីហនុ៖ តំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ (SPSEZ) ក្រោមជំនួយហិរញ្ញប្បទានឥតសំណងពីរដ្ឋាភិបាលជប៉ុន សម្រាប់កម្មវិធីអភិវឌ្ឍន៍សេដ្ឋកិច្ច និងសង្គម ឆ្នាំ២០១៨ បានសម្ពោធដាក់ឲ្យប្រើប្រាស់ជាផ្លូវការនូវឃ្លាំងស្តុកទូកុងតឺន័រ CFS ដើម្បីលើកកម្ពស់គុណភាពផែ ដែលមានសារៈប្រយោជន៍សម្រាប់ វិស័យភស្តុភាកម្មអន្តរជាតិផ្សេងៗនៅកម្ពុជា។​ ប្រទេសជប៉ុន បានជួយឧបត្ថម្ភគាំទ្រកម្ពុជាលើគ្រប់វិស័យ មានដូចជា ការស្ថាបនា និងកែលម្អហេដ្ឋារចនាសម្ព័ន្ធផ្លូវ ស្ពាន ប្រព័ន្ធបង្ហូរទឹក វិស័យសុខភាពសាធារណៈ ការផ្គត់ផ្គង់ទឹកស្អាត ការអប់រំ ការបោសសម្អាតគ្រាប់មីន និងការអភិវឌ្ឍធនធានមនុស្ស ព្រមទាំងវិស័យជាច្រើនទៀត។ លោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំនៅព្រះរាជាណាចក្រកម្ពុជាបានឲ្យដឹងថា ការបញ្ចប់ការសាងសង់ស្ថានីយស្តុកទំនិញកុងតឺន័រ CFS ជាគម្រោងជំនួយឥតសំណងរបស់រដ្ឋាភិបាលជប៉ុន ដើម្បីលើកកម្ពស់គុណភាពបន្ថែមនៃតំបន់សេដ្ឋកិច្ចពិសេស កំពង់ផែក្រុងព្រះសីហនុ ដែលមានសារ:សំខាន់សម្រាប់ក្រុមហ៊ុន ភស្តុភាកម្មអន្តរជាតិផ្សេងៗ។ លោកបន្តថា ប្រទេសជប៉ុន និងកម្ពុជា បានព្រមព្រៀងសហការក្នុងកម្រិតអតិបរមា ដើម្បីធ្វើឲ្យកំពង់ផែព្រះសីហនុមានមុខងារជាកំពង់ផែស្នូល មិនត្រឹមតែនៅក្នុងប្រទេសកម្ពុជា ប៉ុន្តែក៏ដូចជានៅក្នុងតំបន់មេគង្គទាំងមូល។ ឯកឧត្តម គួច ចំរើន អភិបាលខេត្តព្រះសីហនុ បានមានប្រសាសន៍ថា កំពង់ផែអន្តរជាតិសមុទ្រទឹកជ្រៅក្រុងព្រះសីហនុ បាន និងកំពុងដើរតួនាទីយ៉ាងសំខាន់ចំពោះការអភិវឌ្ឍសេដ្ឋកិច្ចជាតិ ក្នុងនោះ មានដូចជា៖ គម្រោងអភិវឌ្ឍន៍សមត្ថភាពកំពង់ផែ តាមរយៈការផ្លាស់ប្តូរបទពិសោធន៍រវាងជប៉ុន កម្ពុជា (ការបញ្ជូនអ្នកបច្ចេកទេសមកកំពង់ផែ និងការបញ្ជូនបុគ្គលិកទៅផ្លាស់ប្តូរបទពិសោធន៍នៅជប៉ុន) , ការបណ្តុះបណ្តាលទាំងក្នុង និងក្រៅប្រទេស , ប្រព័ន្ធប្រតិបត្តិការទីលានកុងតឺន័រ CMTS ប្រព័ន្ធផ្លាស់ប្តូរទិន្នន័យអេឡិចត្រូនិក Port EDI -ល-។ ឯកឧត្តម គួច ចំរើន បន្តថា កម្ពុជាទទួលបានកម្ចីសម្បទានពីរដ្ឋាភិបាលជប៉ុន សម្រាប់សាងសង់ចំណតផែកុងតឺន័រថ្មី ដែលមានប្រវែង ៤០០ម៉ែត្រ, ការសាងសង់តំបន់សេដ្ឋកិច្ចពិសេស, ការសាងសង់ចំណតផែពហុបំណងប្រវែង ៣៥០ម៉ែត្រ, ការកែសម្រួលផែច្រាំងទៅជាផែកុងតឺន័រប្រវែង ២៥៣ម៉ែត្រ, និងគម្រោងអភិវឌ្ឍន៍ចំណតផែកុងតឺន័រទឹកជ្រៅ ជំហានទី១ ជំហានទី២ និងជំហានទី៣។ ឯកឧត្តម បន្តថា នៅពេលឆាប់ៗខាងមុខនេះ កំពង់ផែនឹងទទួលបានជំនួយលើមធ្យោបាយលើកដាក់ (Harbor Mobile Crane) ចំនួន ០២គ្រឿងទៀតពីរដ្ឋាភិបាលជប៉ុនផងដែរ។ លោកឯកអគ្គរាជទូតជប៉ុន ប្រចាំនៅកម្ពុជា បានឲ្យដឹងថា ប្រទេសជប៉ុន និងកម្ពុជា បានព្រមព្រៀងសហការក្នុងកម្រិតអតិបរមា ដើម្បីធ្វើឱ្យកំពង់ផែស្វយ័តព្រះសីហនុ មានមុខងារជាកំពង់ផែស្នូល មិនត្រឹមតែក្នុងប្រទេសកម្ពុជាប៉ុណ្ណោះទេ ប៉ុន្តែគឺនៅក្នុងតំបន់មេគង្គទាំងមូល។ លើសពីនេះ ការសាងសង់ឃ្លំាងផ្ទុកទំនិញរបស់ផ្សារ AEON ដែលជាក្រុមហ៊ុនជប៉ុនដ៏ល្បីនៅក្នុងតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ នឹងធ្វើឱ្យក្រុមហ៊ុនជប៉ុនវិនិយោគ មកតំបន់សេដ្ឋកិច្ចកំពង់ផែស្វយ័តក្រុងព្រះសីហនុ។គួរបញ្ជាក់ថា បើតាមលោកឯកអគ្គរាជទូតជប៉ុន ប្រចាំនៅកម្ពុជា ការចាប់បើកឱ្យប្រើប្រាស់ឃ្លាំងស្តុកទំនិញកុងតឺន័រ CFS នេះ និងរួមចំណែកដល់ការអភិវឌ្ឍបន្ថែមទៀតនៃតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ ដែលនិងនាំឱ្យក្រុមហ៊ុនជប៉ុនកាន់តែច្រើនបន្ថែមទៀត មកបណ្តាក់ទុននៅខេត្តព្រះសីហនុ បន្ទាប់ពីផ្សារទំនើប AEONដ៏ល្បីរបស់ជប៉ុន