កិច្ចប្រជុំប្រចាំខែកុម្ភៈ ឆ្នាំ២០២៣ របស់ក្រុមការងារយុវជនគណបក្សក្រសួងសាធារណការ និងដឹកជញ្ជូន ភ្នំពេញ៖ ថ្ងៃសុក្រ ១២រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៧ ខែកុម្ភៈ ឆ្នាំ២០២៣ លោកជំទាវ កុយ សុដានី សមាជិកាយុវជនគណបក្សប្រជាជនកម្ពុជាថ្នាក់កណ្ដាល និងជាប្រធានក្រុមការងារយុវជនគណបក្សក្រសួង អញ្ជើញដឹកនាំកិច្ចប្រជុំប្រចាំខែកុម្ភៈ ឆ្នាំ២០២៣ របស់ក្រុមការងារយុវជនគណបក្សក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាអនុប្រធាន និងសមាជិកអចិន្ត្រៃយ៍ចំនួន២៥រូប។ កិច្ចប្រជុំនេះធ្វើឡើងក្នុងគោលបំណងដើម្បីផ្សព្វផ្សាយសេចក្តីសម្រេចនៃមហាសន្និបាតតំណាងទូទាំងប្រទេសរបស់គណបក្សប្រជាជនកម្ពុជាកាលពីថ្ងៃទី២៨-២៩ ខែមករា ឆ្នាំ២០២៣ កន្លងទៅ និងការចែករំលែកព័ត៌មាននៃការចូលរួមកិច្ចប្រជុំជាមួយផ្នែកក្រសួង-ស្ថាប័ននៃយុវជនគណបក្សថ្នាក់កណ្តាលអំពីការរៀបចំរបាយការណ៍ និងបញ្ហាផ្សេងៗ។ ថ្លែងទៅកាន់អង្គប្រជុំនាឱកាសនោះ លោកជំទាវប្រធាន បានណែនាំឱ្យក្រុមការងារយុវជនគណបក្សក្រសួង ពង្រឹងកិច្ចការងារផ្សព្វផ្សាយដល់ក្រុមការងារគណបក្សចុះមូលដ្ឋាន និងបានជំរុញលើកទឹកចិត្តឱ្យសមាជិក សមាជិកាទាំងអស់ត្រៀមខ្លួនសម្រាប់យុទ្ធនាការឆ្ពោះទៅរកការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ចាប់ពីដំណាក់កាលមុនបោះឆ្នោត អំឡុងពេលយុទ្ធនាការ ថ្ងៃបោះឆ្នោត និងក្រោយការបោះឆ្នោត និងត្រូវពង្រឹងសកម្មភាពចលនាមហាជន និងសេដ្ឋកិច្ចក្រៅប្រព័ន្ធ ជាពិសេសត្រូវខិតខំយកចិត្តទុកដាក់អនុវត្តលើគោលដៅរបស់បក្សជាបន្តបន្ទាប់បន្ថែមទៀត។ ជាចុងក្រោយ លោកជំទាវប្រធាន ក៏បានថ្លែងអំណរគុណដល់អ្នកចូលរួមប្រជុំទាំងអស់ដែលបានខិតខំប្រឹងប្រែងអនុវត្តការងារនាពេលកន្លងមក និងបានពាំនាំនូវអនុសាសន៍ណែនាំដ៏ខ្ពង់ខ្ពស់របស់សម្ដេចប្រធានគណបក្សដែលបានលើកឡើងក្នុងមហាសន្និបាតតំណាងទូទាំងប្រទេសរបស់គណបក្សប្រជាជន ឱ្យខិតខំឆ្លើយតប និងដោះស្រាយទាន់ពេលវេលានូវរាល់តម្រូវការ និងបញ្ហាប្រឈមរបស់បងប្អូនប្រជាពលរដ្ឋនៅតាមមូលដ្ឋាន។ លោកជំទាវប្រធាន ក៏បានជំរុញដល់សមាជិកសមាជិកាទាំងអស់ ឱ្យបន្ដការយកចិត្តទុកដាក់ចំពោះសុខទុក្ខ របស់យុវជននៅក្រោមឱវាទទាំងអស់ និងផ្សព្វផ្សាយសកម្មភាពសមិទ្ធផលរបស់បក្ស តាមប្រព័ន្ធផ្សព្វផ្សាយសង្គមឱ្យបានផុលផុសផងដែរ៕