សិក្ខាកាមប្រមាណ៩០រូប ចូលរួមសិក្ខាសាលាផែនការមេស្តីពីប្រព័ន្ធអនាម័យសម្រាប់ទាំងអស់គ្នាក្នុងទីក្រុង ភ្នំពេញ៖ ថ្ងៃពុធ ៦រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែធ្នូ ឆ្នាំ២០២២ ឯកឧត្តម សំរ៉ងឌី ណារ៉ូ អនុរដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុង ពិធីបិទសិក្ខាលាលាផែនការមេស្តីពីប្រព័ន្ធអនាម័យសម្រាប់ទាំងអស់គ្នាក្នុងទីក្រុង ក្រោមគម្រោងជំនួយ បច្ចេកទេស - ហេដ្ឋារចនាសម្ព័ន្ធទីក្រុងអាស៊ីអាគ្នេយ៍ ដោយមានសិក្ខាកាមអញ្ជើញចូលរួមពីគ្រប់មន្ទីរ សាធារណការ និងដឹកជញ្ជូនរាជធានី-ខេត្ត អាជ្ញាធរមានសមត្ថកិច្ច និងអង្គភាពជំនាញពាក់ព័ន្ធសរុបប្រមាណ៩០រូប។ សិក្ខាសាលានេះរៀបចំឡើងក្នុងគោលបំណងដើម្បីសម្រេចនូវផែនការអភិវឌ្ឍហេដ្ឋារចនាសម្ព័ន្ធ និងធ្វើឱ្យ មានភាពល្អប្រសើរលើការគ្រប់គ្រងទឹកកខ្វក់ កាកសំណល់រាវ សំណល់រឹង និងអនាម័យក្នុងទីក្រុង ការកំណត់តម្លៃសេវាអនាម័យឱ្យបានសមរម្យ និងការរៀបចំផែនការមេរយៈពេល៥ឆ្នាំម្តង សម្រាប់ត្រួត ពិនិត្យ និងធ្វើបច្ចុប្បន្នភាពជាប្រចាំលើគម្រោង។ ថ្លែងក្នុងកម្មវិធីបិទនាឱកាសនោះ ឯកឧត្តមអនុរដ្ឋលេខាធិការ បានគូសបញ្ជាក់ពីបញ្ហាកង្វល់ដែលត្រូវ ដោះស្រាយជាបន្ទាន់ និងគ្រប់គ្រងឱ្យបានសមស្របនូវបញ្ហាអនាម័យ ទឹកកខ្វក់ សំណល់រឹង និង សំណល់រាវ ដែលកើតមានពីការរីកចម្រើនលើគ្រប់វិស័យដូចជា៖ ហេដ្ឋារចនាសម្ព័ន្ធសាធារណៈ ការ អភិវឌ្ឍទីក្រុង និងទីប្រជុំជនធំៗ ការសាងសង់លំនៅស្ថាន ការរីកចម្រើនផ្នែកសេដ្ឋកិច្ចហួសពីការស្មាន និងបានបន្ថែមថា៖ រាជរដ្ឋាភិបាលកម្ពុជា បាន និងកំពុងយកចិត្តទុកដាក់ខ្ពស់ចំពោះការស្វែងរកនូវ ដំណោះស្រាយ ក៏ដូចជាដាក់ចេញនូវយុទ្ធសាស្ត្រក្នុងការគ្រប់គ្រងលើបញ្ហាខាងលើជារយៈពេលខ្លី មធ្យម និងរយៈពេលវែង ប្រកបដោយប្រសិទ្ធភាព ដោយសហការជាមួយដៃគូអភិវឌ្ឍន៍ទាំងអស់ ភាគីពាក់ព័ន្ធ ទាំងវិស័យរដ្ឋ និងឯកជន។ ជាចុងក្រោយ ឯកឧត្តមអនុរដ្ឋលេខាធិការ បានថ្លែងកោតសរសើរយ៉ាងជ្រាលជ្រៅដល់ធនាគាអភិវឌ្ឍ អាស៊ី សាលារាជធានីភ្នំពេញ ដែលតែងតែសហការល្អជាមួយក្រសួងសាធារណការ និងដឹកជញ្ជូនក្នុង ការចែករំលែក ផ្លាស់ប្តូរបទពិសោធន៍ទៅវិញទៅមក និងចូលរួមចំណែករិះរកវិធីក្នុងការគ្រប់គ្រងប្រព័ន្ធ អនាម័យ ដើម្បីសុខុមាលភាពប្រជាពលរដ្ឋ ប្រកបដោយនិរន្តរភាព និងបានថ្លែងអំណរគុណផងដែរដល់ គ្រប់មន្ទីរសាធារណការ និងដឹកជញ្ជូនរាជធានី-ខេត្ត ក៏ដូចជាសិក្ខាកាមទាំងអស់ ហើយសង្ឃឹមជឿជាក់ថា បន្ទាប់ពីទទួលបាននូវការចែករំលែកបទពិសោធន៍ និងចំណេះដឹងពីលោកគ្រូបង្គោលរួច សិក្ខាកាមទាំង អស់នឹងខិតខំយកទៅចែករំលែកបន្ត និងអនុវត្តឱ្យមានប្រសិទ្ធភាពនៅក្នុងអង្គភាពរបស់ខ្លួន៕