ភ្នំពេញ៖ លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យវឌ្ឍនភាពគម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ និងគម្រោងអភិវឌ្ឍន៍ច្រករបៀងទី៤ មហាអនុតំបន់មេគង្គ ដោយមានការអញ្ជើញចូលរួមពីមន្ត្រីជំនាញក្រសួង ក្រុមការងារទីប្រឹក្សាបច្ចេកទេស និងមន្ត្រីពាក់ព័ន្ធជាច្រើនរូបផងដែរ។ បើតាមក្រសួងសាធារណការ បានឱ្យដឹងថា កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យ និងពិភាក្សាលើវឌ្ឍនភាពការងារសម្រេចបាន គម្រោងកំពុងសិក្សាសមិទ្ធិលទ្ធភាព និងគម្រោងដែលកំពុងអនុវត្តបន្ត ទាក់ទងនឹងការលើកកម្ពស់ទឹកស្អាត និងអនាម័យ គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ និងគម្រោងអភិវឌ្ឍន៍ច្រករបៀងទី៤ មហាអនុតំបន់មេគង្គ ដែលទទួលបានឥណទានសម្បទានពីធនាគារ អភិវឌ្ឍអាស៊ី(ADB)។ អង្គប្រជុំបានពិភាក្សាលើបទបង្ហាញស្តីពីគម្រោងលើកកម្ពស់ទឹកស្អាត និងអនាម័យ តាមរយៈការសាងសង់ឱ្យមានប្រព័ន្ធចម្រោះទឹកកខ្វក់ និងទឹកភ្លៀង និងការសាងសង់ទីលានចាក់សំរាមនៅតាមបណ្ដាខេត្តមួយចំនួន រួមមាន៖ ខេត្តកំពង់ធំ ខេត្តកំពង់ចាម ខេត្តបាត់ដំបង ខេត្តសៀមរាប ខេត្តក្រចេះ ខេត្តបន្ទាយមានជ័យ និងខេត្តស្ទឹងត្រែងជាដើម ដើម្បីលើកម្ពស់អនាម័យ ការទុកដាក់សំរាម និងការបញ្ចេញទឹកសំណល់កខ្វក់ពីលំនៅដ្ឋានរបស់ប្រជាពលរដ្ឋ ពិសេសខេត្តជុំវិញបឹងទន្លេសាប និង តាមបណ្ដោយទន្លេមេគង្គ ឱ្យកាន់តែមានការប្រសើរឡើង។ ឆ្លៀតក្នុងឱកាសនេះ លោករដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ក្រុមការងារជំនាញក្រសួង រួមទាំងទីប្រឹក្សាបច្ចេកទេសក្នុងគម្រោងទាំងអស់ ដែលបានខិតខំប្រឹងប្រែងអនុវត្តគម្រោងតាមផែនការដែលបានគ្រោងទុករហូតទទួលបានលទ្ធផលល្អ និងបានជំរុញលើកទឹកចិត្តឱ្យក្រុមការងារបន្តខិតខំប្រឹងប្រែងបន្ថែមទៀត ដើម្បីឈានទៅសម្រេចបានគោលដៅរួមក្នុងការលើកកម្ពស់អនាម័យ និង គុណភាពនៃការរស់នៅរបស់ប្រជាពលរដ្ឋ៕