ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំ ដើម្បីពិនិត្យពិភាក្សាលើវិធីធ្វើឱ្យប្រសើរឡើង លើការគ្រប់គ្រងការចេញ-ចូលផ្លូវល្បឿនលឿនភ្នំពេញ-ក្រុងព្រះសីហនុ បានលឿនរហ័ស កាត់បន្ថយការកកស្ទះ ដែលកិច្ចប្រជុំនេះធ្វើឡើងកាលពីថ្ងៃពុធ ៨រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៦ ខែវិច្ឆិកា ឆ្នាំ២០២២ ដោយមានការចូលរួមពី លោក Zhou Yang អគ្គនាយកក្រុមហ៊ុនសាជីវកម្មស្ពានថ្នល់ចិន លោក Mo Kun អគ្គនាយកក្រុមហ៊ុនផ្លូវល្បឿនលឿនភ្នំពេញ-ព្រះសីហនុ ថ្នាក់ដឹកនាំក្រសួង និងមន្ត្រីជំនាញនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដោយ​ ផ្តោតសំខាន់ទៅលើការធានាលំហូរយានយន្ត ចូល-ចេញ ដែលកន្លងទៅតម្រូវឱ្យបង់ជាសាច់ប្រាក់នៅគ្រប់គន្លងច្រកចេញ ពីផ្លូវល្បឿនលឿន ជាបច្ច័យអាចធ្វើឱ្យការកកស្ទះ នៅពេលមានតម្រូវការចរាចរណ៍ខ្ពស់ ជាពិសេសថ្ងៃបុណ្យទាន និងថ្ងៃឈប់សម្រាកនានា។ ដើម្បីឱ្យការចេញពីផ្លូវបានលឿនរហ័ស ក្រោមការចង្អុលបង្ហាញពី ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ បានសហការជាមួយក្រុមហ៊ុនផ្លូវល្បឿនលឿន ក្នុង​ការ​សម្រួលផ្តល់លទ្ធភាព ឱ្យអ្នកបើកបរអាចធ្វើការបញ្ចូលសមតុល្យទឹកប្រាក់ជាមុន ទៅក្នុងផ្លាកលេខសម្គាល់យានយន្ត មុនចូលប្រើប្រាស់ផ្លូវល្បឿនលឿន ដែលជាផ្នែកមួយនៃប្រព័ន្ធបច្ចេកវិទ្យា DIP របស់ក្រសួងសាធារណការ និងដឹកជញ្ជូន។ ជាមួយគ្នានេះដែរ អង្គប្រជុំបានធ្វើការពិភាក្សាយ៉ាងផុសផុល ដោយលើកយកបញ្ហាប្រឈមមួយចំនួន ដែលបានកើតឡើងក្នុងរយៈពេលពីរសប្តាហ៍កន្លងទៅ និងពិភាក្សាលើដំណោះស្រាយថ្មី តាមប្រព័ន្ធបច្ចេកវិទ្យា DIP អនុញ្ញាតឱ្យបញ្ចូលប្រាក់តាមផ្លាកលេខ មុនចូលប្រើប្រាស់ផ្លូវល្បឿនលឿន ដែលបានប្រកាសដាក់ឱ្យសាកល្បង កាលពីថ្ងៃទី១៤ វិច្ឆិកា ២០២២កន្លងទៅ។ នៅក្នុង​ឱកាសនោះ ឯកឧត្តមទេសរដ្ឋមន្ត្រីបានណែនាំឱ្យភាគីក្រុមហ៊ុន យកចិត្តទុក ដាក់លើការបណ្តុះបណ្តាលបុគ្គលិក នៅតាមច្រកចូល-ចេញ ឱ្យមានសមត្ថភាពគ្រប់គ្រាន់ក្នុងការបំពេញការងារបានលឿនរហ័ស លើការកាត់ទឹកប្រាក់ពីផ្លាកលេខ ព្រមទាំងមានសមត្ថភាពដោះស្រាយបញ្ហាជូនអ្នកធ្វើដំណើរ ក្នុងពេលបំពេញភារកិច្ចការងាររបស់ខ្លួន។ សូមបញ្ជាក់ថា ប្រព័ន្ធបច្ចេកវិទ្យា DIP គឺជាគំនិតផ្តួចផ្តើមមួយ ត្រូវបានដាក់ចេញដើម្បីធានាការធ្វើអាជីវកម្មរបស់ក្រុមហ៊ុន កាន់តែមានតម្លាភាព ក្នុងការគ្រប់គ្រងការងារផ្តល់សេវាប្រើប្រាស់ផ្លូវ ការកត់ត្រាការប្រមូលចំណូលសម្រាប់ការបង់ពន្ធ ជូនរាជរដ្ឋាភិបាល ឱ្យបានត្រឹមត្រូវ ។ ប្រព័ន្ធនេះនឹងធានាឱ្យការធ្វើដំណើរ កាន់តែមានសុវត្ថិភាពខ្ពស់ កាត់បន្ថយគ្រោះថ្នាក់ចរាចរណ៍ និងទទួលបានសេវាប្រើប្រាស់ផ្លូវបានលឿនរហ័ស ចៀសផុតពីជំងឺកូវី-១៩ កាត់បន្ថយភាពស្មុគស្មាញ និងកាត់បន្ថយការរង់ចាំយូរ ដែលបណ្តាលមកពីការកកស្ទះចរាចរណ៍ ជាដើម។ ដោយឡែក ការបញ្ចូលទឹកប្រាក់ក្នុងផ្លាកលេខជាមុន (Prepaid License Plate Top-Up) ត្រូវបានផ្តល់លទ្ធភាពឱ្យធ្វើតាមកម្មវិធីទូរស័ព្ទដៃ ទូទាត់ប្រាក់អេឡិចត្រូនិក (Mobile Banking) ឬបញ្ជរបង់ប្រាក់របស់គ្រឹះស្ថានហិរញ្ញវត្ថុ និងធនាគារដៃគូរបស់ក្រសួងសាធា រណការ និងដឹកជញ្ជូន។ គិតត្រឹមថ្ងៃទី១៦ វិច្ឆិកា ឆ្នាំ២០២២ មានគ្រឹះស្ថានដៃគូ ចំនួន០៥ ដែលត្រូវអនុញ្ញាតឱ្យបញ្ចូលទឹកប្រាក់ ក្នុងផ្លាកលេខសម្គាល់យានយន្ត រួមមាន៖ ធនាគារ ជីបម៉ុង (Chip Mong Bank), ធនាគារ អេស៊ីលីដា (ACLEDA Bank), ធនាគារ វឌ្ឍនៈអាស៊ីចំកាត់ (ABA Bank), ធនាគារវីង (Wing Bank), និងធនាគារ វឌ្ឍនៈ (VATTANAC Bank) ។ ធនាគារមួយចំនួនទៀត នឹងត្រូវបានអនុញ្ញាតឱ្យចូលរួមក្នុងគំនិតផ្តួចផ្តើមនេះ ក្នុងពេលដ៏ខ្លីខាងមុខ។ សូមចូលទៅកាន់ គេហទំព័រ https://ew.mpwt.gov.kh សម្រាប់បញ្ជីគ្រឹះស្ថានហិរញ្ញវត្ថុ ដែលទទួលបានសិទ្ធិក្នុងចូលរួមប្រមូលចំណូល ពីការប្រើប្រាស់ផ្លូវល្បឿនលឿន ។ ការបញ្ចូលទឹកប្រាក់ក្នុងផ្លាកលេខ គឺត្រូវបានអនុញ្ញាតសម្រាប់គ្រប់យានយន្ត បើទោះជាយាយន្តនោះមិនបានចុះឈ្មោះបំពាក់ឧបករណ៍ OBU ក្តី៕