(រាជធានីភ្នំពេញ)៖ ក្រសួងសាធារណការ និងដឹកជញ្ជូន កាលពីថ្ងៃទី០២ ខែវិច្ឆិកា ឆ្នាំ២០២២ បានចាប់ផ្តើមប្រើប្រាស់រថយន្តបំពាក់ឧបករណ៍បច្ចេកទេសទំនើប ដែលមានតម្លៃ៨០ម៉ឺនដុល្លារជាលើកដំបូង ដើម្បីពិនិត្យគុណភាពស្ពានទូទាំងប្រទេស...។ក្នុងដំណើរចុះត្រួតពិនិត្យគុណភាពស្ពានព្រែកតាមាក់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា «ក្រសួងបានចាប់ផ្តើមប្រើប្រាស់រថយន្តដែលភ្ជាប់នឹងម៉ាស៊ីនទំនើបមួយគ្រឿង មានតម្លៃ៨០ម៉ឺនដុល្លារជាលើកដំបូង នៅស្ពានព្រែកតាមាក់។ រថយន្តនេះ អាចត្រួតពិនិត្យមើលស្ថានភាពជាក់ស្តែងនៃសំណង់បាតស្ពាន ផ្នែកខាងក្រោមនៃស្ពាន ដើម្បីពិនិត្យឱ្យដឹងថាស្ពានមានស្នាមប្រេះស្រាំ និងបញ្ហាខូច ឬយ៉ាងណា ងាយស្រួលជួសជុលបានទាន់ពេលវេលា»។ ឯកឧត្តម បន្តថា ក្រោយពីប្រើប្រាស់ម៉ាស៊ីនទំនើបនោះត្រួតពិនិត្យស្ពានរួចមក ស្ពានមានការប្រេះស្រាំបន្តិចបន្តួច ហើយឯកឧត្តម ក៏បានប្រាប់ក្រុមហ៊ុនសាងសង់ស្ពានសៀងហៃឱ្យជួសជុលស្ពាននេះឡើងវិញផងដែរ។គួរបញ្ជាក់ថា តាមរយៈការប្រើប្រាស់រថយន្តបំពាក់ឧបករណ៍ទំនើប ដើម្បីអង្កេតពិនិត្យស្ពាននេះ បានផ្តល់នូវភាពងាយស្រួល និងមានភាពសុក្រឹត្យជាងការចុះពិនិត្យមើលបាតស្ពានកាលពីពេលកន្លងមក ដែលគ្មានឧបករណ៍ប្រភេទនេះ ខណៈរថយន្តដែលបំពាក់ឧបករណ៍អង្កេតពិនិត្យស្ពានប្រភេទនេះ មានលក្ខណៈទំនើប មានសមត្ថភាពខ្ពស់អាចផ្ទុកមនុស្សបានប្រមាណ១០នាក់ សម្រាប់ការចុះទៅពិនិត្យមើលបាតស្ពានផងដែរ។ នេះបើតាមការបញ្ជាក់បន្ថែមពី ឯកឧត្តមទេសរដ្ឋមន្ត្រី ស៊ុន ចាន់ថុល...៕