ចំពោះលោកអ្នកដែលធ្វើដំណើរចេញពីខេត្តបាត់ដំបងទៅកាន់ខេត្តសៀមរាបឬពីសៀមរាបមកបាត់ដំបងពេលនេះលែងពិបាកវៀងផ្លូវឆ្ងាយទៀតហើយ ខណៈក្រសួងសាធារណការ និងដឹងជញ្ជូន គ្រោងសាងសង់ផ្លូវមួយខ្សែរពីបាត់ដំបងទៅសៀមរាបតែម្ដង ដែលចំណេញពេលធ្វើដំណើរ៨០ គីឡូម៉ែត្របើធៀបទៅនឹងចំងាយផ្លូវចេញពីខេត្តបាត់ដំបង ឆ្លងកាត់ខេត្តបន្ទាយមានជ័យ ទៅដល់ខេត្តសៀមរាប។យោងតាមការលើកឡើងរបស់ឯកឧត្តម ស៊ុន ចាន់ថុល ទេសរដ្ឋមន្រ្ដីរដ្ឋមន្ដ្រីក្រសួងសាធារណការ និងដឹកជញ្ជូន នៅក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងរបស់ក្រសួង” កាលពីថ្ងៃទី២៧ ខែតុលា ឆ្នាំ២០២២ ឯកឧត្តមបានឱ្យដឹងថា “សព្វថ្ងៃចង់ធ្វើដំណើរពីសៀមរាបត្រូវឆ្លងកាត់សេរីសោភ័ណ្ឌខេត្តបន្ទាយមានជ័យ ទើបដល់បាត់ដំបង ប៉ុន្តែពេលនេះយើងសិក្សាផ្លូវកាត់តែម្ដង គឺពីបាត់ដំបងទៅសៀមរាបតែម្តង”។​ សូមជម្រាបផងដែរថា ការសាងសង់ផ្លូវមួយខ្សែខាងលើនេះ គឺចំណេញក្នុងការធ្វើដំណើររហូតដល់៨០ គីឡូម៉ែត្រដែលជួយសម្រួលដល់ការធ្វើដំណើរ របស់បងប្អូនប្រជាពលរដ្ឋ ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ ឱ្យមកទស្សនាខេត្តទាំងពីរ កាន់តែច្រើនផងដែរ ខណៈបច្ចុប្បន្ន​គេ​ត្រូវធ្វើ​ដំណើរ​ប្រមាណ ​១៨០​គីឡូម៉ែត្រ ឬមួយ​ជុំ ដើម្បី​ឆ្លងពី​ខេត្តបាត់ដំបងទៅខេត្តសៀមរាប ដោយឆ្លងកាត់ខេត្តបន្ទាយមានជ័យ ៕​