កិច្ចប្រជុំចាប់ផ្តើមនៃបេសកកម្មគាំទ្រដល់ការអនុវត្តលើកទី០៧ (Implementation Support Mission) នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ រាជធានីភ្នំពេញ៖ ថ្ងៃអង្គារ ០២កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែកញ្ញា ឆ្នាំ២០២២ ឯកឧត្តម កឹម បូរី អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោង បានដឹកនាំអង្គភាពគ្រប់គ្រងសមាសភាគគម្រោងរបស់ក្រសួងសាធារណការ និងដឹកជញ្ជូន ចូលរួមកិច្ចប្រជុំចាប់ផ្តើមនៃបេសកកម្មគាំទ្រដល់ការអនុវត្តលើកទី០៧នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ជាមួយភាគីអង្គភាពគ្រប់គ្រងសមាសភាគគម្រោងរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងភាគីធនាគារពិភពលោក តាមរយៈប្រព័ន្ធវីដេអូពីចម្ងាយ និងការចូលរួមដោយផ្ទាល់។ សូមជម្រាបជូនថា៖ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យនេះ ស្ថិតក្រោមឥណទាន សម្បទានរបស់ធនាគារពិភពលោក ដើម្បីអភិវឌ្ឍវិស័យទឹកស្អាត និងអនាម័យ សំដៅធានាសុខុមាលភាព ប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យមានការរីកចម្រើនថែមមួយកម្រិតទៀត។ អង្គប្រជុំបានផ្ដោតការពិភាក្សាលើរបៀបវារៈមួយចំនួនរួមមាន៖ សកម្មភាពការងារដែលបានឯកភាព និងវឌ្ឍនភាពកាលពីបេសកកម្មគាំទ្រដល់ការអនុវត្តគម្រោងកន្លងទៅចាប់ពីថ្ងៃទី២៦ ខែមេសា ដល់ ថ្ងៃទី១៦ ខែឧសភា ឆ្នាំ២០២២ ការឯកភាពលើរបៀបវារៈនៃបេសកកម្មគាំទ្រដល់ការអនុវត្តគម្រោង លើកទី០៧ ចាប់ពីថ្ងៃទី២៧ ខែកញ្ញា ដល់ថ្ងៃទី០៧ ខែតុលា ឆ្នាំ២០២២។ ថ្លែងទៅកាន់អង្គប្រជុំនាឱកាសនោះ ឯកឧត្ដមអនុរដ្ឋលេខាធិការ បានជំរុញលើកទឹកចិត្តឱ្យភាគីពាក់ព័ន្ធ ទាំងអស់ខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព និងរិះរកគ្រប់មធ្យោបាយ និងយុទ្ធសាស្ត្រ ដើម្បីបន្តអនុវត្តវឌ្ឍនភាពគម្រោង ដែលកំពុងមានភាពល្អប្រសើរ និងរបៀបវារៈដែលបានរៀបចំឡើង និងឯកភាពដោយគ្រប់ភាគីពាក់ព័ន្ធ៕