(រាជធានីភ្នំពេញ)៖ កម្ពុជាត្រៀមបើកការដ្ឋាន​សាងសង់ផ្លូវល្បឿនលឿន​ទី២ ភ្នំពេញ-បាវិត ​នៅពាក់កណ្ដាលឆ្នាំ២០២៣។ នេះបើតាមការបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងសន្និសីទសារព័ត៌មាន បង្ហាញពីការដាក់ដំណើរការផ្លូវល្បឿនលឿនដំបូងគេនៅកម្ពុជា កាលពីថ្ងៃទី២១ ខែកញ្ញា ឆ្នាំ២០២២។ ឯកឧត្តមទេសរដ្ឋមន្ត្រី បានឱ្យដឹងថា រាជរដ្ឋាភិបាលកម្ពុជា បានឯកភាព​ឱ្យក្រុមហ៊ុន CRBC ដែលជាក្រុមហ៊ុនសាងសង់ផ្លូវល្បឿនលឿនភ្នំពេញ-ព្រះសីហនុដដែលនេះ ជាអ្នកវិនិយោគដាក់ថវិកាសាង​សង់ផ្លូវល្បឿនលឿន​ភ្នំពេញ-បាវិតដែលជាផ្លូវល្បឿនលឿនទី២ បន្ទាប់ពីបញ្ចប់ផ្លូវល្បឿនលឿនទី១ (ភ្នំពេញ-ក្រុងព្រះសីហនុ) នាពេលឆាប់ៗនេះ។ លោកទេសរដ្ឋមន្ត្រី ស៊ុន ចាន់ថុល បានអះអាងថា៖ «យើងបានចុះអនុស្សរណៈយោគយល់គ្នា (MoU) ហើយៗ...ជាមួយគាត់! យើងនឹងត្រៀមចុះហត្ថលេខាលើកិច្ចព្រមព្រៀមនាខែ១១នេះ គាត់សិក្សាហើយ ត្រៀមរៀបចំចុះកិច្ចព្រមព្រៀងសម្បទានឱ្យបានមុនដាច់ឆ្នាំ ដើម្បីឱ្យគាត់បើកការដ្ឋានឆ្នាំក្រោយ យើងគ្រោងនឹងបើកការដ្ឋានឱ្យបានពាក់កណ្តាលឆ្នាំក្រោយ»។យ៉ាងណាមិញ ការរៀបចំដំណើរការនេះ អាចនឹងចាប់ផ្ដើមបានលឿន ដោយសារតែក្រុមហ៊ុនCRBC មានបទពិសោធធ្លាប់សាងសង់ផ្លូវល្បឿនលឿនមួយខ្សែរួចហើយ រួមទាំងមានទាំងសម្ភារៈគ្រប់គ្រាន់ និងអាចដឹងពីបញ្ហាធាតុអាកាសនៅកម្ពុជាផងដែរ។ គួររំលឹកផងដែរថា ផ្លូវល្បឿនលឿនដំបូងគេនៅកម្ពុជា (ភ្នំពេញ-ព្រះសីហនុ) មានប្រវែង១៨៧គីឡូម៉ែត្រ ដោយប្រើប្រាស់ថវិកាសាងសង់អស់ប្រមាណ២ពាន់លានដុល្លារ។ ក្រុមហ៊ុននឹងចាប់ផ្តើមទទួលបានការចំណេញចាប់ពីឆ្នាំទី១១ឡើងទៅ ហើយនៅពេលនោះ ក្រុមហ៊ុនវិនិយោគត្រូវបង់ពន្ធជូនរាជរដ្ឋាភិបាលកម្ពុជា២០ភាគរយ នៃថវិកាចំណេញ៕