ឯកឧត្ដមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានបញ្ជាក់ថាល្បឿនលឿនភ្នំពេញ-បាវិត គ្រោងនឹងបើកការដ្ឋានសាងសង់នៅក្នុងឆ្នាំ២០២៣ ខាងមុននេះ ខណៈគម្រោងនេះត្រូវបានផ្លាស់ប្ដូរក្រុមហ៊ុនទទួលការសាងសង់ថ្មី។ តាមការលើកឡើងក្នុងបទសម្ភាសន៍ ស្ដីពីការត្រៀមដាក់ដំណើរការសាកល្បងផ្លូវល្បឿនលឿនភ្នំពេញ-ក្រុងព្រះសីហនុ នៅថ្ងៃទី២១ ខែកញ្ញា ឆ្នាំ២០២២ ឯកឧត្ដម ស៊ុន ចាន់ថុល បានឲ្យដឹងថា ពីដើមមានក្រុមហ៊ុនចិនមួយឈ្មោះថា CRIG បានចុះកិច្ចព្រមព្រៀងជាមួយ ដោយតម្រូវសិក្សាឲ្យបានចប់ក្នុងរយៈពេល ១០ ខែ។ ប៉ុន្ដែក្រុមហ៊ុននេះសិក្សាមិនចប់ឡើយ ដោយពន្យារពេលម្ដង ពីរដង រហូតដល់រយៈពេល ៣ ឆ្នាំ។ ដោយមើលឃើញភាពយឺតយ៉ាវ និងការសិក្សាមិនមានលក្ខណៈបច្ចេកទេសត្រឹមត្រូវ ក្រសួងសាធារណការ និងដឹកជញ្ជូន ជាមួយនិងក្រសួងសេដ្ឋកិច្ច និងហិរញ្ញវត្ថុ ក៏បានធ្វើរបាយការណ៍ជូនប្រមុខរាជរដ្ឋាភិបាលនឹងបញ្ចប់កិច្ចសន្សាមួយក្រុមហ៊ុននេះតែម្ដង។ ឯកឧត្ដមបន្ដថា ក្រោយបញ្ចប់ជាមួយក្រុមហ៊ុន CRIG ក្រសួងក៏បានប្រគល់គម្រោងនេះឲ្យទៅក្រុមហ៊ុនចិនមួយទៀតដែលមានឈ្មោះ CRBC ធ្វើការសិក្សាម្ដង។ ទាក់ទងនឹងក្រុមហ៊ុនថ្មីនេះឯកឧត្ដមបានបញ្ជាក់ថា «យើងបានចុះMOU ហើយៗជាមួយគាត់ (ក្រុមហ៊ុន CIMB) យើងនឹងត្រូវត្រៀមចុះហត្ថលេខាលើកិច្ចព្រមព្រៀង FA ពេលខែ១១នេះ។ ហើយគាត់ សិក្សាហើយត្រៀមចុះកិច្ចព្រមព្រៀងសម្បទាន ឲ្យបានមុនដាច់ឆ្នាំ ដើម្បីគាត់បើកការដ្ឋានឆ្នាំក្រោយ ដោយយើងគ្រោងនឹងបើកការដ្ឋានឲ្យបានពាក់កណ្ដាលឆ្នាំ២០២៣»។សូមជម្រាបផងដែរថា គម្រោងផ្លូវល្បឿនលឿនភ្នំពេញ-បាវិតនេះ គឺជាគម្រោងផ្លូវល្បឿនលឿនទី ២ ក្នុងប្រទេសកម្ពុជាបន្ទាប់ផ្លូវល្បឿនលឿនភ្នំពេញ ក្រុងព្រះសីហនុ ខណៈផ្លូវនេះគឺជាផ្លូវថ្មីទាំងស្រុងដែលមានប្រវែងសរុបប្រហែល ១៣៥ គីឡូម៉ែត្រ ដែលត្រូវសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ហើយផ្លូវមួយខ្សែនេះ នឹងចាប់ផ្ដើមចេញពីភ្នំពេញនៅចំណុចផ្លូវក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាមតែម្ដង៕