កិច្ចប្រជុំផ្សព្វផ្សាយសេចក្តីជូនដំណឹងស្តីពីការដាក់ឱ្យដំណើរការសាកល្បងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ថ្ងៃចន្ទ ៤កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០១ ខែសីហា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្សព្វផ្សាយសេចក្តីជូនដំណឹងស្តីពីការដាក់ឱ្យដំណើរការសាកល្បងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ដោយមានការចូលរួមពីថ្នាក់ដឹកនាំក្រសួង ឯកឧត្តម ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងមកពីអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ អគ្គនាយកដ្ឋានរដ្ឋបាល និងហិរញ្ញវត្ថុ អគ្គនាយកដ្ឋានដឹកជញ្ជូន ផ្លូវទឹក ផ្លូវសមុទ្រ និងកំពង់ផែ ប្រធាននាយកដ្ឋាននាវាជំនួញសមុទ្រ តំណាងនាយកដ្ឋានរដ្ឋបាលកំពង់ផែ និងតំណាងមកពីអគ្គនាយកដ្ឋានអន្តោប្រវេសន៍ អគ្គនាយកដ្ឋានគយនិងរដ្ឋាករកម្ពុជា អគ្គនាយកដ្ឋាន បច្ចេកទេសសុខាភិបាល កំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ ក្រុមអ្នកប្រឹក្សាពី ក្រុមហ៊ុនMitsubishi Research Institute, Inc និងក្រុមហ៊ុនExeo Group Corporation ក្រុមហ៊ុន នាវា ក្រុមហ៊ុនភ្នាក់ងារនាវា និងកំពង់ផែឯកជន។ កិច្ចប្រជុំនេះធ្វើឡើងក្នុងគោលបំណងដើម្បីផ្សព្វផ្សាយសេចក្តីជូនដំណឹងស្តីពីការដាក់ឱ្យប្រើប្រាស់សាក ល្បងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI)ជូនដល់គណៈកម្មការធ្វើបែបបទនាវាចូលចេញ ក្រុមហ៊ុននាវា ភ្នាក់ងារនាវា និងអ្នកពាក់ព័ន្ធ ដែលនឹងត្រូវអនុវត្តចាប់ពីថ្ងៃទី១៧ ខែសីហា ឆ្នាំ ២០២២ ខាងមុខនេះ។ ជាលទ្ធផល អង្គប្រជុំបានសម្រេចដូចតទៅ៖ ក្រុមហ៊ុនភ្នាក់ងារនាវាដែលពុំទាន់បានស្នើសុំលិខិតអនុញ្ញាត ត្រូវរួសរាន់រៀបចំឯកសារដាក់ពាក្យស្នើសុំលិខិតមុនថ្ងៃដាក់ដំណើរការសាកល្បងប្រព័ន្ធផ្លាស់ប្តូរទិន្នន័យ អេឡិចត្រូនិកកំពង់ផែ(Port EDI) កំពង់ផែទាំងអស់មិនត្រូវអនុញ្ញាតឱ្យនាវាចូលក្នុងករណីនាវាពុំមានលិខិតអនុញ្ញាតឱ្យនាវាចូល នាវាមិនត្រូវអនុញ្ញាតឱ្យចូលចតនៅកំពង់ផែឯកជនដែលពុំមានលិខិតអនុញ្ញាតប្រតិបត្តិការកំពង់ផែ ក្រុមហ៊ុននាវា និងក្រុមហ៊ុនភ្នាក់ងារនាវាទាំងអស់ ត្រូវកែសម្រួលនីតិវិធីការងារផ្ទៃក្នុងរៀងខ្លួនៗឱ្យស្របតាមនីតិវិធីនៃការប្រើប្រាស់ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI)៕