ស្ទឹងត្រែង-ក្រុមបច្ចេកទេស ស្ថាបនាផ្លូវស្ពាននៃមន្ទីរសាធារណការនិងដឹកជញ្ជូនខេត្តស្ទឹងត្រែង បានធ្វើការកែ សម្រួលផ្លូវ៣៧៦F និងពន្លឿនការស្ថាបនាស្ពាននិងប្រព័ន្ធលូថ្មីចំនួន១២កន្លែងដើម្បីធានាការធ្វើចរាចរណ៍របស់ប្រជាពលរដ្ឋ។ក្នុងសកម្មភាពសាងសង់ប្រព័ន្ធលូតាមបណ្តោយផ្លូវថ្មី ចេញពីឃុំភ្លុកទៅដល់ផ្លូវបេតុងឆ្ពោះ ទៅឃុំស្រែគរក្នុងស្រុកសេសានខេត្តស្ទឹងត្រែង លោក ស គឹមណាត ប្រធានមន្ទីរសាធារណការនិងដឹកជញ្ជូនខេត្តបានបញ្ជាក់ថា៖ក្រុមការងារពន្លឿនការសាងសង់ប្រព័ន្ធលូនិងស្ពាន តាមបណ្តាញផ្លូវនេះតភ្ជាប់ចេញពីភូមិឃុំភ្លុកទៅដល់ទន្ទឹមនឹងទំនប់វ៉ារីអគ្គិសនីសេសានក្រោម២ឱ្យហើយឆាប់ ដើម្បីបន្តគម្រោងចាក់កៅស៊ូនៅឆ្នាំ២០២៣។ លោកបន្តថា៖ផ្លូវនេះជា អំណោយរបស់រាជរដ្ឋាភិបាលស្ថាបនាឡើងនៅឆ្នាំ២០១៨ដើម្បីសម្រួលដល់ការធ្វើដំណើរទៅមករបស់ប្រជាពលរដ្ឋចេញមកពីឃុំស្រែគរ ឃុំតាឡាត និងឃុំក្បាលរមាស មកកាន់ទីរួមខេត្តស្ទឹងត្រែង បានជិតជាងទៅតាមផ្លូវជាតិលេខ០៧៨ដែលត្រូវវាងឆ្ងាយ។ (សំឡេង) ក្រោយយើងឈូសឆាយផ្លូវហ្នឹងឡើងវិញឃើញថាប្រជាពលរដ្ឋគាត់មកច្រើន ហើយគាត់ក៏ថ្លែងអំណរគុណ ដល់រាជរដ្ឋាភិបាលដែលមានសម្ដេច តេជោហ៊ុនសែនជាប្រមុខលោកតែងតែយកចិត្តទុកដាក់ ការស្នើសុំរបស់ប្រជាពលរដ្ឋ ជាពិសេសហេដ្ឋារចនាសម្ព័ន្ធផ្លូវស្ពាននេះ ជាពិសេសទៀត មានក្រសួងខ្ញុំបាទ ឯកឧត្តមទេសរដ្ឋមន្ត្រីស៊ុនចាន់ថុល ក្រសួង សាធារណការនិងដឹកជញ្ជូន តែងតែ គិតគូរដល់ប្រជាពលរដ្ឋមិនថាជិតមិនថាឆ្ងាយជាពិសេសផ្លូវនិងស្ពាននេះ ក្នុងនោះដែលខ្ញុំក៏សម្រេចចិត្តជាមួយឯកឧត្តមអភិបាលខេត្ត ឈូសឆាយផ្លូវហ្នឹងឡើងវិញនឹងដាក់ស្នើសុំក្នុង ផែនការឆ្នាំ ២០២៣ ចាក់កៅស៊ូសម្រាប់ប្រជាពលរដ្ឋតភ្ជាប់ផ្លូវវាង២ឃុំ៣ឃុំទៅខេត្ត ។ លោកស្រីឡៃ ហ៊ងតំណាងឱ្យប្រជាពលរដ្ឋនៅស្រុកសេសានបានគាំទ្រការយកចិត្តទុកដាក់នេះ ព្រោះការអភិវឌ្ឍន៍ហេដ្ឋារចនាសម្ព័ន្ធជាផ្នែកមួយដោះស្រាយបាននូវ បញ្ហាលំបាកដែលប្រជាពលរដ្ឋយើងធ្លាប់ជួបប្រទះឱ្យត្រឡប់មករកភាពល្អប្រសើរវិញ។ លោកស្រីបន្តថា៖ ផ្លូវតភ្ជាប់ទៅទីជនបទនេះពិតជាបានបង្ក លក្ខណៈងាយស្រួលដល់ប្រជាពលរដ្ឋពេលធ្វើដំណើរពីតំបន់មួយទៅតំបន់មួយទៀត និងជាផ្នែកមួយជំរុញឱ្យមានកំណើនផ្នែកសេដ្ឋកិច្ចដល់គ្រួសារកសិករផងដែរ ។(សំឡេង)សំខាន់មួយទៀតទាក់ទងទៅនឹងផ្នែកសេដ្ឋកិច្ច របស់ប្រជាពលរដ្ឋនៅតំបន់ហ្នឹងក៏មានភាពល្អប្រសើរដែរ ធ្វើឱ្យពួកគាត់ហ្នឹងស្រួលដឹកកសិផល មករកទីផ្សារ ដែលមានតម្លៃខ្ពស់ជាង ឬក៏អាចគាត់ពេលមានផ្លូវស្រួលអ៊ីចឹងទៅ គាត់អាចទៅទិញដល់កន្លែងពួកគាត់ អាហ្នឹងធ្វើឱ្យមានការ រីកចម្រើនសេដ្ឋកិច្ច ក្នុងគ្រួសាររបស់ពួកគាត់ដែរ។ សូមបញ្ជាក់ថា៖នេះជាផ្លូវថ្មីដែលរាជរដ្ឋាភិបាលបានសម្រេចឱ្យសាងសង់ឡើង មានប្រវែង ១១គីឡូម៉ែត្រទទឹង៧ម៉ែត្រ។ផ្លូវ នេះ បានផ្តល់ប្រយោជន៍យ៉ាងសំខាន់ដល់ប្រជាពលរដ្ឋមកទទួល យកសេវាសាធារណៈនៅទីរួមស្រុកសេសាន និងបានទាក់ទងគ្នាដោះដូរសេដ្ឋកិច្ចជាលក្ខណៈគ្រួសារទៅតាមតំបន់នីមួយៗ ៕