(ភ្នំពេញ)៖ ក្រសួងសាធារណការ និងដឹកជញ្ជូន នឹងដាក់ឱ្យដំណើរការសាកល្បងប្រព័ន្ធផ្លាស់ប្ដូរទិន្នន័យ អេឡិចត្រូនិកកំពង់ផែ (Port EDI) ចាប់ពីថ្ងៃទី១៧ ខែសីហា ឆ្នាំ២០២២ ខាងមុខនេះ សម្រាប់ការរៀបចំបែបបទនាវា ចូល-ចេញនៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ ដោយផ្លាស់ប្ដូរនីតិវិធី បច្ចុប្បន្ន ទៅប្រើប្រាស់ប្រព័ន្ធស្វ័យប្រវត្តិកម្មជំនួសវិញ តាមរយៈគេហទំព័រផ្លូវការដែលមានអាសយដ្ឋានhttps://portedi.mpwt.gov.kh។ ក្រសួងសាធារណការ និងដឹកជញ្ជូន បានបញ្ជាក់ថា ការដាក់ឱ្យដំណើរការសាកល្បងប្រព័ន្ធផ្លាស់ប្ដូរទិន្នន័យ អេឡិចត្រូនិកកំពង់ផែ (Port EDI)នឹងជួយសម្រួលដល់នីតិវិធីចេញ-ចូលកំពង់ផែកម្ពុជា សម្រាប់នាវាដឹកជញ្ជូនទំនិញអន្តរជាតិធំៗ សំដៅគ្រប់គ្រងសេវាដឹកជញ្ជូនតាមផ្លូវទឹកប្រកបដោយប្រសិទ្ធភាព តម្លាភាព ចំណេញពេលវេលា និងកាត់បន្ថយការចំណាយផ្សេងៗ ជាពិសេសជួយបង្កើនការទាក់ទាញការវិនិយោគផ្ទាល់ពីបរទេស និងបង្កើតការងារធ្វើជូនពលរដ្ឋកម្ពុជាផងដែរ។ ក្រសួងសាធារណការទទួលបានជំនួយឥតសំណងពីប្រទេសជប៉ុនចំនួនជាង១២លានដុល្លារ ក្នុងការអនុវត្តនូវគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិកកំពង់ផែ តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA)។ គម្រោងនេះចាប់ផ្តើមដំណើរការកាលពីថ្ងៃទី១៥ ខែធ្នូ ឆ្នាំ២០២០ និងគ្រោងបញ្ចប់ និងដាក់ឱ្យដំណើរការប្រព័ន្ធជាផ្លូវការនៅថ្ងៃទី១៧ ខែសីហា ឆ្នាំ២០២២ខាងមុខ។ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានបញ្ជាក់ថា នៅថ្ងៃអនាគតក្នុងដំណាក់កាលរីកចម្រើន ក្រសួងក៏នឹងបន្តសហការជាមួយអគ្គនាយកដ្ឋានគយ និងរដ្ឋាករកម្ពុជា ដើម្បីតភ្ជាប់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ(Port EDI) ជាមួយប្រព័ន្ធ ASYCUDA របស់គយ ដើម្បីបង្កភាពងាយស្រួលបន្ថែមដល់ធុរកិច្ចជន។ គួរបញ្ជាក់ផងដែរថា បច្ចុប្បន្ន កម្ពុជាមានកំពង់ផែធំៗ ចំនួនពីរគឺ កំពងផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ សម្រាប់បម្រើសេវាដឹកជញ្ជូនតាម ផ្លូវទឹក ដែលមានផ្លូវទឹកតាមទន្លេមេគង្គ និងផ្លូវសមុទ្រក្នុងប្រទេស និងអន្តរជាតិ ហើយកំពង់ផែទាំងពីរនេះបានដំណើរការធ្វើបែបបទនាវាចូល-ចេញតាមនីតិវិធីរដ្ឋបាលដោយដៃ ដែលងាយជួបប្រទះបញ្ហាប្រឈមនៅពេលដែលចំនួននាវា និងទំនិញ កើនឡើងយ៉ាងច្រើននាពេលអនាគត៕​