(ភ្នំពេញ)៖ ក្រុមឡានចង្កូតស្តាំប្រមាណ២០០នាក់ នាព្រឹកថ្ងៃទី០៥ ខែកក្កដា ឆ្នាំ២០២២ បានធ្វើការតវ៉ានៅចំណុចរង្វង់មូលគួរស្រូវ សង្កាត់រលួស ខណ្ឌដង្កោ រាជធានីភ្នំពេញ ដោយបានបិទផ្លូវរង្វង់មូលគួរស្រូវទាំង៤ច្រក ដើម្បី​ស្នើសុំ​សម្តេច​តេ​ជោ ហ៊ុន សែន បង់ពន្ធនាំចូលរថយន្តចង្កូតស្ដាំដែលកំពុងមានចរាចរណ៍ក្នុងស្រុក ដោយមិនកែចង្កូត។ ការតវ៉ានេះបន្ទាប់ពី ការប្រមូលពន្ធ និង អាករនាំចូលលើរថយន្តគ្មានពន្ធមានស្រាប់ក្នុងប្រទេស នឹងត្រូវបញ្ចប់ថ្ងៃទី៣០ ខែមិថុនា ឆ្នាំ២០២២។ ដោយចាប់ពីថ្ងៃទី០១ ខែកក្កដា ឆ្នាំ២០២២ តទៅ អគ្គនាយកដ្ឋានគយនិង រដ្ឋាករកម្ពុជា នឹងអនុវត្តវិធានការបង្ក្រាបយ៉ាងម៉ឺងម៉ាត់។ ក្នុងសេចក្តីជូនដំណឹងបានបញ្ជាក់ថា រថយន្តចង្កូតស្តាំដែលជាប្រភេទទំនិញហាមឃាត់នាំចូល ក្នុងករណីបង្ក្រាបបាន នឹងត្រូវកម្ទេចចោល ឬដោះបំបែកជាគ្រឿងបន្លាស់ តាមនីតិវិធីជាធរមាន៕