នៅរសៀលថ្ងៃចន្ទ ១៣រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែមិថុនា ឆ្នាំ២០២២ នៅសាលប្រជុំរបស់អគ្គនាយកដ្ឋានដឹកជញ្ជូនផ្លូវគោក លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានអមលោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គ.ស.ច.គ. ក្នុងជំនួបសំដែងការគួរសម និងពិភាក្សាជាមួយ ប្រតិភូរបស់សាកវិទ្យាល័យ GACHON នៃប្រទេសកូរ៉េខាងត្បូង និងអង្គការ ខេមសេហ្វ អំពីគម្រោងការងារសុវត្ថិភាពចរាចរណ៍នៅប្រទេសកម្ពុជារយៈពេល ៥ឆ្នាំតទៅខាងមុខ។ គោលបំណងនៃជំនួបពិភាក្សានេះ ប្រតិភូរបស់សាកវិទ្យាល័យ GACHON នៃប្រទេសកូរ៉េខាងត្បូង និងអង្គការ ខេមសេហ្វ បានជូនដំណឹងអំពីគម្រោងសុវត្ថិភាពចរាចរណ៍ដែលផ្តោតសំខាន់ទៅលើតំបន់សាលារៀន ការអនុវត្តវិធានសុវត្ថិភាពចរាចរណ៍នៅតំបន់សាលារៀន រួមមានការអប់រំនិង ផ្សព្វផ្សាយអំពីសុវត្ថិភាពចរាចរណ៍ដល់សិស្សានុសិស្ស ប្រជាពលរដ្ឋជាមាតាបិតារបស់សិស្ស និងអ្នកធ្វើដំណើរ រួមទាំងការសិក្សា និងការបំពាក់បរិក្ខារសុវត្ថិភាពនៅតាមសាលារៀនគោលដៅ ដើម្បីកាត់បន្ថយគ្រោះថ្នាក់ចរាចរណ៍ផ្លូវគោក និងអ្នកស្លាប់ចំពោះកុមារនៅតំបន់សាលារៀន។