(ខេត្តស្វាយរៀង): លោក លឹម សៀងហេង អភិបាលក្រុងបាវិត បានស្នើឲ្យប្រជាពលរដ្ឋដែលរស់នៅក្នុងមូលដ្ឋាន​របស់ខ្លួនចូលរួមថែទាំផ្លូវថ្នល់​ដែលបានធ្វើរួចហើយទុកជាសម្បត្តិរួមដើម្បីប្រើប្រាស់បានយូរអង្វែងទៅថ្ងៃក្រោយ។ លោកអភិបាលក្រុង បានមានប្រសាសន៍ដូច្នេះក្នុងឱកាសដែលលោក អញ្ជើញចុះពិនិត្យមើលការឈូសឆាយ និងចាក់ក្រាលថ្មមិចពង្រីកធ្វើផ្លូវលំប្រវែង១២០០ម៉ែត្រ នៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង នៅព្រឹកថ្ងៃទី១៧ ខែឧសភា ឆ្នាំ២០២២ ។ ជាមួយគ្នានេះ លោក សាញ់ សាខុន ចៅសង្កាត់បាវិតក្រុងបាវិត បានឲ្យដឹងថា ផ្លូវលំមួយខ្សែនេះពីមុនជាផ្លូវ​លំមានសភាពតូចចង្អៀត ពិបាកធ្វើដំណើរ ជាពិសេសនៅរដូវវស្សាគឺមានទឹកដក់លិចផ្លូវដោយពុំមានផ្លូវទឹកចេញនោះទេ ដែលនាំឲ្យពិបាកដល់សិស្សសាលាដែលជាកូនចៅពលរដ្ឋនៅរៀនសូត្រម្តងៗតាមផ្លូវនេះ។ ក្រោយមានការយកចិត្តទុកដាក់ពីសំណាក់ថ្នាក់ដឹកនាំបែបនេះ ប្រជាពល បានថ្លែងអំណរគុណចំពោះអាជ្ញាធរក្រុង សង្កាត់ ដែលបានគិតគូពីសុខទុក្ខរបស់ប្រជាពលរដ្ឋក្នុងមូលដ្ឋានដែលមានសមិទ្ធផលជាច្រើននៅក្នុងក្រុងបាវិត។ ដោយ:ភក្ដី