ខេត្តកណ្ដាល៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី២៣ ខែមីនា ឆ្នាំ២០២២ បានឱ្យដឹងថា ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានថ្លែងបញ្ជាក់ជូនប្រជាពលរដ្ឋនៅទូទាំងប្រទេស ពីទីតាំងសម្រាប់ការស្ថាននាស្ពានមិត្តភាពកម្ពុជា-កូរ៉េ ថា គឺកសាងជាស្ពានខ្សែកាបយោងខ្ពស់ដោយគ្មានសរសរស្ពាន គឺចាប់ផ្ដើមពីផ្សាររាត្រី(ផ្សារចាស់) ឆ្លងកាត់ទន្លេសាប ទៅជ្រោយចង្វារ ហើយបន្តចេញពីជ្រោយចង្វារ ឆ្លងកាត់ទន្លេមេគង្គទៅកាន់អរិយក្សត្រតែម្ដង ពោលគឺមានកសាងស្ពានចំនួនពីរ។ ក្នុងពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ២១ ដែលមានប្រវែងសរុប ៦៣,៦ គីឡូម៉ែត្រ ចាប់ពីរង្វង់មូលក្រុងតាខ្មៅ ទៅដល់ស្ពានជ្រៃធំ ស្រុកកោះធំ (ព្រំដែនកម្ពុជា-វៀតណាម) ដែលស្ថាបនាឡើងវិញក្រោមឥណទានសម្បទានពីរដ្ឋាភិបាលនៃសាធារណរដ្ឋកូរ៉ មានតម្លៃជាង ៦០លានដុល្លារសហរដ្ឋអាម៉េរិក នាព្រឹកថ្ងៃទី ២៣ ខែមីនា ឆ្នាំ២០២២ នៅខេត្តកណ្ដាល សម្ដេចតេជោ ហ៊ុន សែន បានថ្លែងថា «ជម្រើសនៃការសាងសង់ស្ពានមិត្តភាពកម្ពុជា-កូរ៉េ គឺមិត្តកូរ៉េបានយល់ព្រមជាមួយយើង ទៅលើការសិក្សា និងត្រៀមផ្ដល់ហិរញ្ញប្បទាន និងជំនួយឥតសំណងសម្រាប់ការសាងសង់ស្ពាន ហើយបានសិក្សានូវជម្រើសជាច្រើន។ ឥឡូវខ្ញុំសូមជម្រាបអំពីជម្រើសដែលខ្ញុំបានសម្រេច ហើយក៏បាននិយាយជាមួយប្រធានាធិបតីសាធារណរដ្ឋកូរ៉េ ក្នុងពេលដែលខ្ញុំទស្សនកិច្ចនៅទីនោះឱ្យគាត់ជួយគាំទ្រ ហើយសង្ឃឹមថា ប្រធានាធិបតីនៃសាធារណរដ្ឋកូរ៉េដែលទើបនឹងជាប់ឆ្នោតថ្មី ក៏នឹងគាំទ្រនេះផងដែរ»។ សម្ដេចតេជោនាយករដ្ឋមន្ត្រីគូសបញ្ជាក់ថា«នេះហើយជាផលប្រយោជន៍នៃការដាក់ចំណងទំនាក់ទំនងការទូត និងកិច្ចសហប្រតិបត្តិការរវាងព្រះរាជាណាចក្រកម្ពុជា និងសាធារណរដ្ឋកូរ៉េ ដែលខ្លួនខ្ញុំបានពុះពារត្រូវតែធ្វើឱ្យខាងតែបាន ហើយខ្ញុំមានមោទកភាពណាស់ ក្នុងឋានៈជាស្ថាបនិកនៃការបង្កើតទំនាក់ទំនងការទូតឡើងវិញ រវាងកម្ពុជា និងសាធារណរដ្ឋកូរ៉េ»។ សម្ដេចតេជោបានថ្លែងបញ្ជាក់ថា «ខ្ញុំកំពុងតែមានក្ដីស្រមៃថា ខ្ញុំនឹងធ្វើដំណើរលើស្ពានមិត្តភាពកម្ពុជា-កូរ៉េ នេះផងដែរ»។ ឯកឧត្តម Park Heung-Kyeong ឯកអគ្គរដ្ឋទូតនៃសាធារណរដ្ឋកូរ៉េ នៃប្រចាំព្រះរាជាណាចក្រកម្ពុជាបានឱ្យដឹងថា ឆ្នាំនេះគឺជាខួបឆ្នាំទី២៥ នៃការកសាងទំនាក់ទំនងការទូតឡើងវិញរវាប្រទេសកម្ពុជា និងកូរ៉េ។ កាលពីអតីតកាលទំនាក់ទំនងការទូតរវាងប្រទេសយើងទាំងពីរត្រូវបានកាត់ផ្ដាច់ដោយសារមានកត្តាលំបាក់ផ្សេងៗជាច្រើន ក៏ប៉ុន្តែដោយសារមានការតាំងចិត្តយ៉ាងមោះមុតរបស់សម្ដេចតេជោនាយករដ្ឋមន្ត្រី ដែលបានដើរតួនាទីយ៉ាងសំខាន់ក្នុងដំណើរការនៃការតភ្ជាប់ទំនាក់ទំនងការទូតឡើងវិញនៅឆ្នាំ១៩៩៧ ទើបរហូតមកដល់បច្ចុប្បនេះ ប្រទេសយើងទាំងពីរអាចធ្វើការសម្រេចបានក្នុងការអភិវឌ្ឍយ៉ាងខ្លាំងលើវិស័យនានាយ៉ាងច្រើន។ ឯកឧត្ដមបន្ដថា បន្ទាប់ពីការកសាងទំនាក់ទំនងការទូតឡើងវិញ ទំហំពាណិជ្ជកម្មរវាងប្រទេសទាំងពីរបានកើនឡើងជាង១៧ដង រហូតឈានដល់ជាងមួយពាន់លានដុល្លារអាម៉េរិកក្នុងមួយឆ្នាំ ហើយមានក្រុមហ៊ុនកូរ៉េប្រមាណជា៣០០ក្រុមហ៊ុនបានធ្វើការវិនិយោគផ្ទាល់នៅកម្ពុជាក្នុងវិស័យនានា។ ឯកឧត្តមឯកអគ្គរដ្ឋទូតបន្តទៀតថា កម្ពុជា គឺជាប្រទេសដៃគូស្នូលដ៏សំខាន់នៃកិច្ចសហប្រតិបត្តិការ ជំនួយអភិវឌ្ឍន៍ផ្លូវការរបស់កូរ៉េ ចាប់តាំងពីការកសាងទំនាក់ទំនងការទូតឡើងវិញក្នុងឆ្នាំ១៩៩៧មក ក្នុងរយៈពេល២០ឆ្នាំកន្លងមកនេះ ប្រទេសកូរ៉េបាននិងកំពុងអនុវត្តន៍គម្រោងកិច្ចសហប្រតិបត្តិការផ្ដល់ជំនួយឥតសំណង និងឥណទានសម្បទាន សរុបមានទំហំជាង ៩០០លានដុល្លារអាម៉េរិក លើវិស័យផ្សេងៗមានដូចជា វិស័យហេដ្ឋារចនាសម្ព័ន្ធ សុខាភិបាល និងការអប់រំជាដើម។ ក្នុងឆ្នាំនេះ កូរ៉េគ្រោងនឹងអនុវត្តគម្រោង ODA ដែលទំហំធំជាងឆ្នាំមុនៗ ដែលមានទំហំទឹកប្រាក់រហូតដល់១៥០លានដុល្លារ អាម៉េរិកហើយមិនត្រឹមតែប៉ុណ្ណោះគម្រោសាងសង់ស្ពានមិត្តភាពកម្ពុជា-កូរ៉េ ដែលត្រូវបានរំពឹងថា នឹងត្រូវក្លាយជាលែនម៉ាករបស់រាជធានីភ្នំពេញ និងជានិមិត្ករូបនៃកិច្ចសហប្រតិបត្តិការរវាងកម្ពុជា និងកូរ៉េ ក៏គ្រោងនឹងត្រូវអនុវត្តន៍ដែរ៕