[Rasmei Kampuchea Daily News] - កំពង់ផែស្វយ័តក្រុងព្រះសីហនុ និងចៃកា សហការបច្ចេកទេស លើ «គម្រោងអភិវឌ្ឍន៍សមត្ថភាពលើការគ្រប់គ្រង និងប្រតិបត្តិការចំណតផែកុងតឺន័រជំហានទី៣»
ដោយៈសុផលភ្នំពេញៈកំពង់ផែស្វយ័តក្រុងព្រះសីហនុ និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(ចៃកា) នៅថ្ងៃទី១៧ខែមករាឆ្នាំ២០២២ បានចុះហត្ថលេខាលើកិច្ចព្រមព្រៀងគម្រោងសហប្រតិបត្តិការបច្ចេកទេសស្តីពី “គម្រោងអភិវឌ្ឍន៍សមត្ថភាពលើការគ្រប់គ្រង និងប្រតិបត្តិការចំណតផែកុងតឺន័រនៅកំពង់ផែក្រុងព្រះសីហនុ-ជំហានទី៣” ។
លោក លូ គឹមឈន់ ប្រតិភូរាជរដ្ឋាភិបាលកម្ពុជាទទួលបន្ទុកជាប្រធាន អគ្គនាយកកំពង់ផែស្វយ័តក្រុងព្រះសីហនុ និង លោកស្រី កាមេយ ហារូកុ ប្រធានតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនប្រចាំប្រទេសកម្ពុជាបាន សម្រេចចុះហត្ថលេខាលើកិច្ចព្រមព្រៀងដាក់ឱ្យដំណើរការជាផ្លូវការនូវគម្រោងសហប្រតិបត្តិការបច្ចេកទេសស្តីពី “គម្រោងអភិវឌ្ឍន៍សមត្ថភាពលើការគ្រប់គ្រង និងប្រតិបត្តិការចំណតផែកុងតឺន័រ នៅកំពង់ផែក្រុងព្រះសីហនុ-ជំហានទី៣” ដែលគម្រោងនេះមានរយៈពេល បួន(៤)ឆ្នាំ ហើយគ្រោងនឹងចាប់ផ្តើមអនុវត្តនៅខែ ឧសភា ឆ្នាំ២០២២ ខាងមុខនេះ។កន្លងមក ដោយមានការពិចារណាអំពីតម្រូវការចាំបាច់នូវប្រសិទ្ធភាពលើការងារប្រតិបត្តិការ និងការគ្រប់គ្រងចំណតផែកុងតឺន័រនៅកំពង់ផែក្រុងព្រះសីហនុ ទីភ្នាក់ងារចៃកាបានផ្តល់ការគាំទ្រផ្នែកបច្ចេកទេសដល់កំពង់ផែស្វយ័តក្រុងព្រះសីហនុ លើការអភិវឌ្ឍន៍សមត្ថភាពលើការគ្រប់គ្រង និងប្រតិបត្តិការចំណតផែកុងតឺន័រ ចាប់តាំងពីឆ្នាំ ២០១៣។
គម្រោងអភិវឌ្ឍន៍សមត្ថភាពជំហានទី៣ នេះ ត្រូវបានអនុវត្តឡើងទន្ទឹមគ្នានឹង គម្រោងប្រើប្រាស់កម្ចីហិរញ្ញប្បទានរបស់ជប៉ុនមួយទៀតដែលបាននឹងកំពុងដំណើរការ គឺ គម្រោងអភិវឌ្ឍន៍ចំណតផែកុងតឺន័រថ្មីនៅកំពង់ផែស្វយ័តក្រុងព្រះសីហនុ-ជំហានទី១ ដែលការងារសាងសង់គ្រោងនឹងត្រូវបញ្ចប់ និងដាក់ឱ្យប្របតិបត្តិការ នៅឆ្នាំ ២០២៥ ខាងមុខ។
តាមរយៈកិច្ចសហការនេះ រំពឹងថាការអភិវឌ្ឍសមត្ថភាពប្រកបដោយប្រសិទ្ធភាពតាមរយៈគម្រោង រួមជាមួយនឹងការសាងសង់នូវចំណតផែកុងតឺន័រថ្មី នឹងរួមចំណែកធ្វើឱ្យប្រសើរឡើងនូវការអភិវឌ្ឍន៍វិស័យកំពង់ផែ និងពង្រឹងភាពប្រកួតប្រជែងរ បស់កំពង់ផែស្វយ័តក្រុងព្រះសីហនុបន្ថែមទៀត៕សរន
