កិច្ចប្រជុំអនុគណៈកម្មការសម្របសម្រួលបទអន្តរាគមន៍ ដើម្បីពិនិត្យ និងជ្រើសរើសប្រធានបទសម្រាប់សន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារបន្តឆ្នាំ២០២២ ត្រូវបានដឹកនាំដោយលោកជំទាវរដ្ឋលេខាធិការ កុយ សុដានី ថ្ងៃអង្គារ ២កើត ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៤ ខែមករា ឆ្នាំ២០២២ នៅទីស្តីការក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានអនុគណៈកម្មការសម្របសម្រួលបទអន្តរាគមន៍ បានដឹកនាំកិច្ចប្រជុំអនុគណៈកម្មការ ដើម្បីពិនិត្យ និងជ្រើសរើសប្រធានបទរបស់តំណាងទទួលធ្វើបទអន្តរាគមន៍សម្រាប់សន្និបាតបូកសរុបលទ្ធផលការងារ ឆ្នាំ២០២១ និងលើកទិសដៅការងារបន្តឆ្នាំ២០២២ ដោយមានការចូលរួមពីឯកឧត្តម ប៉េង ពោធិ៍នា អនុប្រធានគណៈកម្មការ និងសមាជិកសមាជិកាក្រុមការងារពាក់ព័ន្ធ។ លោកជំទាវរដ្ឋលេខាធិការ បានណែនាំឱ្យតំណាងទទួលធ្វើបទអន្តរាគមន៍ទាំងអស់រៀបចំបទអន្តរាគមន៍របស់ខ្លួនឱ្យស៊ីសង្វាក់ជាមួយប្រធានបទគោល ដោយផ្ដោតលើប្រាំចំណុចសំខាន់ៗរួមមាន៖ ចំណុចខ្លាំង ចំណុចខ្សោយ បញ្ហាប្រឈម សំណូមពរ និងដំណោះស្រាយ និងមានរយៈពេលត្រឹមតែ១០នាទីប៉ុណ្ណោះ ហើយត្រូវពិចារណានិងសង្កត់ធ្ងន់លើចំណុចសំខាន់ៗចំនួន៧ ដូចជា៖ ១) ការអភិវឌ្ឍធនធានមនុស្ស ២) បច្ចេកវិទ្យាឌីជីថល (កម្មវិធីថែទាំផ្លូវ “Road Care Mobile App” ប្រព័ន្ធស្វ័យប្រវត្តិកម្មចុះបញ្ជីយានជំនិះ “Vehicle Registration System” ប្រព័ន្ធស្វ័យប្រវត្តិកម្មត្រួតពិនិត្យលក្ខណៈបច្ចេកទេសយានយន្ត “Technical Inspection System”) ៣) គុណភាពការងារ (ការងាររដ្ឋបាល និងការងារហេដ្ឋារចនាសម្ព័ន្ធ) ៤) សេវាសាធារណៈ ៥) ស្ថានីយថ្លឹង និងយានដ្ឋានកែច្នៃយានយន្ត ៦) ទំនាក់ទំនងរវាងមន្ត្រី និងថ្នាក់ដឹកនាំ និង ៧)លំហូរការងារ (Process mapping)។ សូមជម្រាបជូនថា៖ អង្គប្រជុំបានសម្រេចបែងចែកឲ្យអគ្គនាយកដ្ឋានជំនាញ តំណាងមកពីក្រសួងស្ថាប័នពាកព័ន្ធរៀបចំបទអន្តរាគមន៏ស៊ីទៅនឹងប្រធានបទកំណត់ខាងលើ និងមន្ទីរសាធារណការ និងដឹកជញ្ជូនរាជធានី-ខេត្តទាំង អស់ជា៤ក្រុមឱ្យធ្វើជាតំណាងទទួលបន្ទុកធ្វើបទអន្តរាគមន៍ ដែលក្នុងនោះរួមមាន៖ ក្រុមទី១. ប្រធានមន្ទីរសាធារណការ និងដឹកជញ្ជូនខេត្តក្រចេះ តំណាងឱ្យខេត្តកំពង់ចាម ត្បូងឃ្មុំ ស្ទឹងត្រែង ព្រះវិហារ រតនគិរី មណ្ឌលគិរី។ ក្រុមទី២. ប្រធានមន្ទីរសាធារណការ និងដឹកជញ្ជូនខេត្តកំពត តំណាងឱ្យកំពង់ស្ពឺ ខេត្តព្រះសីហនុ ខេត្តកោះកុង កែប។ ក្រុមទី៣. ប្រធានមន្ទីរសាធារណការ និងដឹកជញ្ជូនខេត្តបន្ទាយមាន ជ័យ តំណាងឱ្យខេត្តកំពង់ធំ ពោធិ៍សាត់ បាត់ដំបង ប៉ៃលិន សៀមរាប ឧត្តរមានជ័យ។ ក្រុមទី៤. ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង តំណាងឱ្យរាជធានីភ្នំពេញ ខេត្តកណ្តាល ព្រៃវែង ស្វាយរៀង តាកែវ។ ជាមួយគ្នានោះផងដែរ អង្គប្រជុំបានពិភាក្សាលើការរៀបចំទីតាំងសាលប្រជុំសម្រាប់ភ្ជាប់ប្រព័ន្ធវីដេអូពី ចម្ងាយ ក៏ដូចជាការចែក Screen ជាពីរ ដែលបង្ហាញទាំងបទអន្តរាគមន៍ និងបង្ហាញទាំងតារាងកំណត់ពេលវេលាសម្រាប់បទអន្តរាគមន៍ ការប្រើប្រាស់គេហទំព័រ Slido (https://www.sli.do/) ដើម្បីរៀបចំចងក្រងកម្រងសំណួររបស់អ្នកចូលរួម មុននឹងដាក់ជូនឯកឧត្ដមទេសរដ្ឋមន្ត្រីសម្រេច និងការរៀបចំផ្ដល់ជាតំណភ្ជាប់(Link) តាមប្រព័ន្ធវីដេអូពីចម្ងាយ នៅតាមសាលប្រជុំនៅទីស្តីការក្រសួង និងតាមមន្ទីរ សាធារណការ និងដឹកជញ្ជូនរាជធានី-ខេត្ត៕