កិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងសាធារណការ និងដឹកជញ្ជូន ដឹកនាំដោយ ឯកឧត្ដម តូច ចាន់កុសល រដ្ឋលេខាធិការប្រចាំការ ថ្ងៃចន្ទ ១រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២០ ខែវិច្ឆិកា ឆ្នាំ២០២១ នៅទីស្តីការក្រសួង ឯកឧត្ដម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន និងជាប្រធានគណៈកម្មការ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួង ដោយមានការចូលរួមពីថ្នាក់ដឹកនាំក្រសួង និងសមាជិកសមាជិកានៃអនុគណៈកម្មការក្រោមចំណុះទាំងអស់ ។ កិច្ចប្រជុំនេះធ្វើឡើងដើម្បីពិភាក្សាអំពីតួនាទី និងភារកិច្ចរបស់សមាជិកសមាជិកាគណៈកម្មការត្រៀមរៀបចំសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ ក៏ដូចជាពិនិត្យមើលវឌ្ឍនភាពការងារត្រៀមរៀបចំ សំដៅកំណត់នូវចំនុចខ្លាំង ចំនុចខ្សោយ និងស្វែងរកដំណោះស្រាយចំពោះបញ្ហាប្រឈម និងសំណូមពរនានា ដើម្បីឱ្យសន្និបាតអាចប្រព្រឹត្តទៅដោយរលូនតាមការគ្រោងទុក។ យោងតាមរបាយការណ៍ ឯកឧត្តម សឿន ប៊ុនលី អគ្គនាយក នៃអគ្គនាយកដ្ឋានផែនការ និងគោលនយោបាយ បានឱ្យដឹងថា៖ វឌ្ឍនភាពនៃ ការត្រៀមរៀបចំរបាយការណ៍បូកសរុបការងារសម្រាប់សន្និបាត គិតរហូតមកទល់ពេលនេះ សម្រេចបាន ៦៥%ហើយ ជាមួយការខិតខំប្រឹងប្រែងបំពេញការងារយ៉ាងយកចិត្តទុកដាក់ និងការទទួលខុសត្រូវខ្ពស់តាមបណ្តារអង្គភាពពាក់ព័ន្ធក្រោមឱវាទរបស់ក្រសួង។ សូមជម្រាបជូនថា៖ ពិធីសន្និបាតនេះ គ្រោងនឹងប្រារព្ធធ្វើឡើងនៅថ្ងៃទី២៦-២៧ ខែមករា ឆ្នាំ២០២២ ដោយមានសមាសភាពអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ជាមួយនឹងការប្រកាន់ខ្ជាប់តាមវិធានការការពាររបស់ក្រសួងសុខាភិបាលដើម្បីទប់ស្កាត់ការឆ្លងរីករាលដាលនៃជំងឺកូវីត-១៩។ ថ្លែងទៅកាន់អង្គប្រជុំនាឱកាសនោះ ឯកឧត្ដរដ្ឋលេខាធិការប្រចាំការ បានជំរុញឱ្យអនុគណៈកម្មការបទអន្តរាគមន៍ រៀបចំពង្រាង និងជ្រើសរើសប្រធានបទសម្រាប់សន្និបាតឱ្យបានសមស្របដោយផ្តោតជាសំខាន់ទៅលើការអភិវឌ្ឍហេដ្ឋារចនាសម្ព័ន្ធកម្ពុជាក្រោយវិបត្តិជំងឺកូវីដ-១៩ និងបានស្នើឱ្យអង្គភាពក្រោមឱវាទក្រសួងដែល ត្រូវឡើងធ្វើបទអន្តរាគមន៍នៅក្នុងសន្និបាត ត្រូវផ្ដោតជាសំខាន់ទៅលើបញ្ហាប្រឈម និងសំណូមពរ ចៀសវាងការធ្វើបទអន្តរាគមន៍ដោយការអានរបាយការណ៍របស់ខ្លួនទាំងស្រុង។ ឆ្លៀតក្នុងឱកាសនោះដែរ ឯកឧត្ដមរដ្ឋលេខាធិការប្រចាំការ និងជាប្រធានគណៈកម្មការ បានសម្តែងនូវក្តីសង្ឃឹមយ៉ាងមុតមាំថា សមាជិកសមាជិកាអនុគណៈកម្មការទាំងអស់ នឹងខិតខំប្រឹងប្រែងបំពេញការងារប្រកបដោយការទទួលខុសត្រូវខ្ពស់ ដើម្បីឱ្យពិធីសន្និបាតរបស់ក្រសួងមានដំណើរការប្រកបដោយជោគជ័យយ៉ាងរលូន៕