[Rasmei Kampuchea Daily News] - ក្រសួងសាធារណការ ចុះពិនិត្យមណ្ឌលផ្តល់សេវាសាធារណៈ ដើម្បីពង្រឹងគុណភាព ការផ្តល់សេវា ជូនប្រជាពលរដ្ឋ
ភ្នំពេញៈ លោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូន ផ្លូវគោក ក្រសួងសាធារណការ និងដឹកជញ្ជូន កាលពីថ្ងៃទី៩ ខែធ្នូ ឆ្នាំ២០២១ បាន អញ្ជើញដឹកនាំ ក្រុមការងារជំនាញពាក់ព័ន្ធ ចុះពិនិត្យមណ្ឌល ផ្តល់សេវាសាធារណៈ របស់ ក្រសួងសាធារណការ និងដឹកជញ្ជូន ដោយមានការចូលរួម អមដំណើរពីលោក ទេស តារារ័ត្ន ប្រធានមណ្ឌល ប្រឹក្សាយោបល់ សេវាសាធារណៈ នៃនាយកដ្ឋាន ព័ត៌មានវិទ្យា និងទំនាក់ទំនង សាធារណ: និងមន្ត្រីជំនាញពាក់ព័ន្ធ មកពីអគ្គនាយក ដ្ឋានដឹកជញ្ជូនផ្លូវគោក ផងដែរ។
ការចុះពិនិត្យនេះ ធ្វើឡើងក្នុងគោលបំណង ដើម្បីផ្សព្វផ្សាយដល់បងប្អូនប្រជាពលរដ្ឋ ឱ្យបានយល់ច្បាស់ អំពីការផ្តល់សេវាសាធារណៈរបស់ក្រសួងប្រកបដោយ ប្រសិទ្ធភាព និងតម្លាភាព ជៀសវាងការចំណាយក្រៅផ្លូវការផ្សេងៗ ស្របតាម អនុសាសន៍ណែនាំ ដ៏ខ្ពង់ខ្ពស់របស់លោក ទេសរដ្ឋមន្ត្រី ស៊ុន ចាន់ថុល និងជាពិសេស ដើម្បីណែនាំដល់មន្ត្រី ផ្តល់សេវា ឱ្យបំពេញការងាររបស់ខ្លួនកាន់តែមានប្រសិទ្ធភាព ជាងមុន ស្របពេលដែល បងប្អូនប្រជាពលរដ្ឋត្រូវការមកទទួលសេវាសាធារណៈលើ វិស័យដឹកជញ្ជូនផ្លូវគោក ជាពិសេស ក្រោយពីប្រមុខរាជរដ្ឋាភិបាលបានប្រកាសបើក ប្រទេស លើគ្រប់វិស័យឡើងវិញ ចាប់ពីថ្ងៃទី១ ខែវិច្ឆិកា ឆ្នាំ២០២១ តទៅ។
កម្មវិធីចុះពិនិត្យនេះ ត្រូវបានធ្វើឡើង ទៅលើមណ្ឌលផ្តល់សេវាសាធារណៈមួយចំនួន រួមមានៈ មណ្ឌលបណ្តុះបណ្តាល បើកបរយានយន្តធុនធ្ងន់ ផ្សារទំនើបអ៊ីនអន១ និងអ៊ីនអន២ ផ្សារទំនើបជីបម៉ុង ណូរ៉ម៉ល មណ្ឌលត្រួតពិនិត្យលក្ខណៈបច្ចេកទេស យានជំនិះ (ឆៀក) នៅបឹងបៃតង (HK) និងប្ញស្សីកែវ (CMVIC)។
លោកអគ្គនាយក ឈួន វ៉ន់ បានគូសបញ្ជាក់ ពីគំនិតផ្តួចផ្តើមរបស់លោក ទេសរដ្ឋមន្ត្រី ក្នុងការរៀបចំមណ្ឌល ផ្តល់សេវាសាធារណៈ នៅតាមផ្សារទំនើប និងទីកន្លែង សាធារណៈ និងប្រព័ន្ធស្វ័យប្រវត្តិកម្ម ផ្តល់សេវាសាធារណៈប្រកបដោយចក្ខុវិស័យ វែងឆ្ងាយ សំដៅជំរុញ ការផ្ដល់សេវា ប្រកបដោយប្រសិទ្ធភាព តម្លាភាព និងគ្មានការ ចំណាយក្រៅផ្លូវការ។
ជាមួយគ្នានោះ លោកអគ្គនាយក បានលើកឡើង អំពីសារសំខាន់ នៃការរៀបចំប្រព័ន្ធ ស្វ័យប្រវត្តិកម្ម ផ្តល់សេវាសាធារណៈផ្សេងទៀត ដើម្បីគាំទ្រដល់ការផ្ដល់សេវា សាធារណៈ ឱ្យស្របទៅនឹងបច្ចុប្បន្នភាព នៃបដិវត្តន៍ឧស្សាហកម្ម ជំនាន់ ៤.០ ឬហៅថា ឌីជីថល ភាវូបនីយកម្ម (Digitalization) និងគម្រោងធ្វើឱ្យប្រសើរឡើង ប្រព័ន្ធត្រួតពិនិត្យលក្ខណៈ បច្ចេកទេស យានជំនិះជំនាន់ថ្មី (ទីពីរ) ដែលគ្រោងនឹង ដាក់ឱ្យដំណើរការ នាពេលខាងមុខនេះ ដោយបងប្អូនប្រជាពលរដ្ឋ មិនចាំបាច់បំពេញ ទម្រង់ បែបបទ ដោយខ្លួនឯងទេ បងប្អូនគ្រាន់តែ យកកាតគ្រី ទៅកាន់ធនាគារ ជាដៃគូ រួចវាយបញ្ចូលព័ត៌មាន ទិន្នន័យយានជំនិះ ហើយបង់ប្រាក់ និងកាន់វិក្កយបត្រ មករោងឆៀក បងប្អូនអាចទទួលបាន សេវានោះតែម្តង។
បន្ថែមពីលើនេះ លោកអគ្គនាយក បានជម្រាបជូនផងដែរថាៈ កន្លងមក ក្រសួងបាន សាកល្បង ផ្ដល់ព័ត៌មាន តាមរយៈការផ្ញើសារ SMS ទៅកាន់បងប្អូនប្រជាពលរដ្ឋ ជាម្ចាស់យានជំនិះ ដើម្បីប្រាប់ថា យានជំនិះរបស់គាត់ ជិតផុតសុពលភាពហើយ សូមយកយានជំនិះ មកត្រួតពិនិត្យ លក្ខណៈបច្ចេកទេស ឱ្យបានមុនពេលផុតកំណត់ និងបានស្នើសុំឱ្យបងប្អូន ប្រជាពលរដ្ឋ ឈប់ប្រើសេវាក្រៅផ្លូវការ ដែលនាំឱ្យខាតបង់ ថវិកាបងប្អូន។
លោកអគ្គនាយក បានថ្លែងអំណរគុណ យ៉ាងជ្រាលជ្រៅ ដល់បងប្អូនប្រជាពលរដ្ឋ ដែលបាន ចូលរួម ជាមួយក្រសួង ក្នុងការអនុវត្តច្បាប់ទាំងអស់គ្នា ទោះបីជាស្ថិត ក្នុងវិបត្តិ ជំងឺកូវីដ-១៩ ធ្វើឱ្យកម្ពុជា ក៏ដូចជា ពិភពលោកទាំងមូលទទួលរងនូវផល ប៉ះពាល់ យ៉ាងណាក៏ដោយ ក៏ការអញ្ជើញមកទទួលសេវារបស់ក្រសួងពីសំណាក់ ប្រជាពលរដ្ឋ មិនមានការថយចុះ ប៉ុន្មានដែរ និងបានថ្លែងអំណរគុណដល់វិស័យ ឯកជន ដែលបានសហការ ក្នុងការបើកមណ្ឌល ផ្តល់សេវាសាធារណៈ របស់ក្រសួង និងជម្រាបជូនថា ក្រសួងគ្រោងនឹងពង្រីកការផ្តល់ សេវាសាធារណៈ នេះបន្ថែមទៀត ទៅតាមបណ្តារាជធានី-ខេត្ត សំដៅជំរុញធ្វើយ៉ាងណា បង្ខិតសេវាទៅកៀកនឹង ប្រជាពលរដ្ឋ។
ឆ្លៀតក្នុងឱកាសនេះដែរ លោកអគ្គនាយក បានអំពាវនាវដល់បងប្អូនប្រជាពលរដ្ឋ ឱ្យចូលរួមជាមួយ ក្រសួងសាធារណការ និងដឹកជញ្ជូន ក៏ដូចជា រាជរដ្ឋាភិបាល ដោយយក យានជំនិះរបស់ខ្លួន មកត្រួតពិនិត្យលក្ខណៈបច្ចេកទេស ឱ្យបានទៀងទាត់ ដើម្បីធានាសុវត្ថិ ភាព របស់បងប្អូនផ្ទាល់ និងប្ដូរបណ្ណបើកបរ កុំឱ្យផុតសុពលភាព ជាពិសេសកុំប្រើប្រាស់ សេវាក្រៅផ្លូវការ ដោយហេតុថា ក្រសួងបានរៀបចំកន្លែង ផ្ដល់សេវាសាធារណៈ ដើម្បីបង្ក ភាពងាយស្រួល ដល់បងប្អូនប្រជាពលរដ្ឋ ជាច្រើនកន្លែង៕
